ໃນວັນທີ 23 ກັນຍາ 2020 ທີ່ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ຄະນະບໍລິຫານງານ ສະຫະພັນແມ່ຍິງ ຖວທ ໄດ້ຈັດກອງປະຊຸມ ເຜີຍແຜ່ມະຕິກອງປະຊຸມຄົບຄະນະ ບໍລິຫານງານສູນກາງ ສະຫະພັນແມ່ຍິງລາວ ຄັ້ງທີ 6 ສະໄໝທີ 7, ວຽກງານກວດກາ ຂອງສະຫະພັນ ແມ່ຍິງລາວ ແລະ ວຽກງານຈັດຕັ້ງ ປະຕິບັດຄຳຂວັນ ແລະ ຂໍ້ແຂ່ງຂັນ 3 ດີ ຂອງສະຫະພັນແມ່ຍິງລາວ, ໂດຍການເປັນປະທານຂອງ ທ່ານ ນາງ ບົວໄຂ ເພັງພະຈັນ ປະທານຄະນະ ບໍລິຫານງານສະຫະພັນແມ່ຍິງ ກະຊວງ ຖວທ, ທ່ານ ນາງ ສຸພະລັກ ທິລະວົງ ຄະນະບໍລິຫານງານສູນກາງສະຫະພັນແມ່ຍິງລາວ, ອະດີດປະທານ ຄະນະບໍລິຫານງານສະຫະພັນແມ່ຍິງ ກະຊວງ ຖວທ, ມີບັນດາຄະນະ ບໍລິຫານງານສະຫະ ພັນແມ່ຍິງຮາກຖານ ແລະ ຄະນະໜ່ວຍສະຫະ ພັນແມ່ຍິງ ອ້ອມຂ້າງ ກະຊວງ ຖວທ ເຂົ້າຮ່ວມ.

ທ່ານ ນາງ ບົວມະນີ ໄຊທິລາດ ຮອງຫົວໜ້າກົມກວດກາ ກະຊວງ ຖວທ ໄດ້ເຜີຍແຜ່ຄວາມຮູ້ດ້ານວຽກງານກວດກາ, ໂດຍທ່ານໄດ້ຍົກໃຫ້ເຫັນເຖິງສິດ ແລະ ໜ້າທີ່ ຂອງຄະນະກວດກາ ຂອງສະຫະ ພັນແມ່ຍິງ, ເນື້ອໃນການກວດກາ ແລະ ຮູບການກວດກາ, ເຊິ່ງການກວດກາວຽກງານ ຂອງສະຫະພັນແມ່ຍິງ ແມ່ນໃຫ້ ປະຕິບັດຕາມ ລະບຽບກົດໝາຍຢ່າງເຂັ້ມງວດ.

ໂອກາດດຽວກັນນີ້, ທ່ານ ນາງ ສຸພະລັກ ໄດ້ເນັ້ນໃຫ້ບັນດາ ຄະນະບໍລິຫານງານ ສະຫະພັນແມ່ຍິງຮາກຖານ ແລະ ຄະນະໜ່ວຍສະຫະພັນແມ່ຍິງ ອ້ອມຂ້າງ ກະຊວງ ຖວທ ເອົາໃຈໃສ່ຍົກລະດັບຄວາມຮູ້ຄວາມສາມາດ ໃຫ້ແກ່ບັນດາສະມາຊິກແມ່ຍິງ ໃນກົມກອງຂອງຕົນ ໃນດ້ານຕ່າງໆ ໂດຍສະເພາະ ທິດສະດີ ການເມືອງ, ພາສາຕ່າງປະເທດ ກໍຄື ດ້ານວຽກງານວິຊາສະເພາະ. ພ້ອມນີ້, ກໍໄດ້ປຸກລະດົມໃຫ້ເອື້ອຍນ້ອງແມ່ຍິງ ສ້າງເສດຖະກິດ ແລະ ສ້າງຄວາມເຂັ້ມແຂງ ໃຫ້ກັບຄອບຄົວ ຂອງຕົນເອງ ພາຍໃຕ້ຂໍ້ແຂ່ງຂັນ 3 ດີ ຂອງຂອງສະຫະພັນ ແມ່ຍິງລາວວາງອອກ ແລະ ພ້ອມກັນເອົາໃຈໃສ່ ສຶກສາອົບຮູບລູກຫລານ ຂອງຕົນໃນຮູບແບບຕ່າງໆ ເພື່ອບໍ່ໃຫ້ຕົກ ເປັນເຫຍື່ອ ຂອງການຄ້າມະນຸດ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)