ເປີດນໍາໃຊ້ ສະຖານີວິທະຍຸຊຸມຊົນ ເພື່ອການພັດທະນາ ແຫ່ງທີ 10 ໃນ ສປປ ລາວ

0
55

ສະຖານີວິທະຍຸຊຸມຊົນ ເພື່ອການພັດທະນາເມືອງນາກາຍ ແຂວງຄໍາມ່ວນ, ເຊິ່ງເປັນສະຖາ ນີວິທະຍຸຊຸມຊົນ ແຫ່ງທີ 10 ໃນ ສປປ ລາວ ໄດ້ເປີດນໍາໃຊ້ ແລະ ອອກອາກາດຢ່າງເປັນທາງການ ໃນວັນທີ 25 ກັນຍາ 2020 ພາຍຫລັງສຳເລັດການປັບປຸງ ໂດຍມີເປົ້າໝາຍ ເພື່ອໃຫ້ປະຊາຊົນ ພາຍໃນເມືອງນາກາຍ ທີ່ອາໄສຢູ່ເຂດຫ່າງໄກຊອກຫລີກ, ລວມເຖິງປະຊາຊົນພາຍໃນ ເມືອງອ້ອມຂ້າງ ສາມາດໄດ້ເຂົ້າເຖິງ ຂໍ້ມູນຂ່າວສານຕ່າງໆ ໄດ້ທົ່ວເຖິງກວ່າເກົ່າ ແລະ ເຮັດໃຫ້ຊຸມຊົນ ສາມາດເຂົ້າມາ ມີສ່ວນຮ່ວມໃນການຕັດສິນໃຈ ເພື່ອພັດທະນາຊຸມຊົນ ກໍຄື ຊ່ວຍປັບປຸງຄຸນນະພາບຊີວິດ ຂອງເຂົາເຈົ້າໃຫ້ນັບມື້ດີຂຶ້ນ.

ສະຖານີວິທະຍຸເມືອງນາກາຍ ໄດ້ສ້າງຕັ້ງຂຶ້ນໃນປີ 2012 ໃນຄື້ນຄວມຖີ່ FM 98,00 mhz, ມີກຳລັງສົ່ງ 120 ວັດ, ສາມາດອອກອາກາດກວມເອົາ 85% ຂອງພື້ນທີ່ໃນທົ່ວເມືອງ, ຕໍ່ມາພັກ-ລັດຖະ ບານ ກໍຄື ອຳນາດການປົກຄອງ ໃນແຕ່ລະຂັ້ນ ເຫັນໄດ້ຄວາມສຳຄັນ ໃນການເຮັດໜ້າທີ່ ເປັນກະບອກສຽງອັນແຫລມຄົມຂອງພັກ ໃນການໂຄສະນາເຜີຍແຜ່ ຂໍ້ມູນຂ່າວສານ, ແນວທາງນະໂຍບາຍຕ່າງໆ ຂອງພັກຈຶ່ງມີຄວາມ ຈຳເປັນປັບປຸງ ແລະ ຍົກລະດັບວິທະຍຸ ເມືອງນາກາຍ ພາຍໃຕ້ໂຄງການ ສະໜັບສະໜູນການມີສ່ວນຮ່ວມ ຂອງປະຊາຊົນຜ່ານວິທະຍຸຊຸມຊົນ ໂດຍໄດ້ຮັບທຶນສະໜັບສະໜູນ ຈາກບໍລິສັດໄຟຟ້ານ້ຳເທີນ 2 ແລະ ອົງການສະຫະປະຊາຊາດ ເພື່ອການພັດທະນາໃນມູນຄ່າ 200.000 ໂດລາສະຫະລັດ.

ໃນນັ້ນບໍລິ ສັດໄຟຟ້ານ້ຳເທີນ 2 ຈຳນວນ 60% ແລະ ອົງການສະຫະປະຊາຊາດ ເພື່ອການພັດທະນາ ປະຈຳລາວ 40% ໂດຍມີໄລຍະການຈັດຕັ້ງ ປະຕິບັດໂຄງການ 3 ປີ ເລີ່ມແຕ່ເດືອນກັນຍາ 2019 ຫາເດືອນສິງຫາ 2022. ໃນນັ້ນ, ໄດ້ມີການຍົກລະດັບ ເຄື່ອງສົ່ງຈາກ 120 ວັດ ມາເປັນ 1 ກິໂລວັດ, ສາມາດອອກອາ ກາດກວມເອົາ 100% ຂອງພື້ນທີ່ໃນທົ່ວເມືອງ ແລະ ບາງສ່ວນຂອງເມືອງ ອ້ອມຂ້າງ ພ້ອມທັງຕໍ່ເຕີມຕຶກ ອາຄານຂອງສະຖານີວິທະຍຸ, ສ້າງຫ້ອງເຄື່ອງສົ່ງ, ຫ້ອງອັດລາຍການ, ປະກອບອຸປະກອນ ເອເລັກໂຕຣນິກຕ່າງໆ, ປັບປຸງຕຶກອາຄານຫ້ອງອັດ ຂອງສູນບ້ານໜອງບົວຄຳ ພ້ອມຈັດຝຶກອົບຮົມການຜະລິດລາຍການ, ຝຶກອົບຮົມການຄຸ້ມຄອງເຕັກນິກ ແລະ ການບໍລິຫານໃຫ້ແກ່ ໂຄສົກຫ້ອງການອ້ອມຂ້າງ ແລະ ບັນດາອາ ສາສະໝັກບ້ານ ທີ່ເຂົ້າມາມີສ່ວນຮ່ວມຈັດລາຍການ. ສໍາລັບລາຍການທີ່ ອອກອາກາດແມ່ນມີເນື້ອໃນ ກວມແຕ່ລະຂະແໜງການ ເປັນຕົ້ນ ກະສິກໍາ, ສຶກສາ, ສາທາລະນະສຸກ, ແນວລາວສ້າງຊາດ ແລະ ອື່ນໆ.

ໂອກາດນີ້, ທ່ານ ສະຫວັນຄອນ ລາຊະມຸນຕີ ຮອງລັດຖະມົນຕີ ກະຊວງຖະແຫລງຂ່າວ, ວັດທະ ນະທໍາ ແລະ ທ່ອງທ່ຽວ ໄດ້ມີຄໍາເຫັນວ່າ: ສິ່ງສໍາຄັນໃນການສ້າງ ຄວາມຍືນຍົງ ໃຫ້ແກ່ວິທະຍຸຊຸມຊົນ ແມ່ນການປະກອບສ່ວນ ແລະ ການມີສ່ວນຮ່ວມ ຢ່າງຫ້າວຫັນຂອງຊຸມຊົນ, ເຊິ່ງປະກອບມີ 5 ປັດໄຈສໍາຄັນ ຄື: ປະກອບສ່ວນມາເປັນ ອາສາສະໝັກຈັດລາຍການ, ປະກອບສ່ວນດ້ານວັດຖຸເງິນຄໍາ, ການປະກອບສ່ວນສະໜອງ ຂໍ້ມູນຂ່າວສານຕ່າງໆ, ການປະກອບສ່ວນຮັບ ຟັງລາຍການຂອງສະຖານີ ແລະ ການປະກອບ ສ່ວນ ຕໍານິຕິຊົມ ເພື່ອເຮັດໃຫ້ການກະຈາຍ ຂໍ້ມູນຂ່າວສານໄດ້ຢ່າງ ມີປະສິດທິພາບ ແລະ ທົ່ວເຖິງ.

Medialaos MMD (ແຫູ່ງຂໍ້ມູນຈາກ: ສຳນັກຂ່າວສານປະເທດລາວ)