ໃນວັນທີ 25 ກັນຍາ 2020, ທີ່ຫໍປະຊຸມແຫ່ງຊາດ ທ່ານ ທອງລຸນ ສີສຸລິດ ນາຍົກລັດ ຖະມົນຕີ ແຫ່ງ ສປປ ລາວ ໄດ້ໃຫ້ກຽດເຂົ້າຮ່ວມ ແລະ ໂອ້ລົມຕໍ່ກອງປະຊຸມໃຫຍ່ສະພາການຄ້າ ແລະ ອຸດສາຫະກຳແຫ່ງຊາດລາວ ຊຸດທີ VIII ໂດຍທ່ານ ນາຍົກ ໄດ້ເນັ້ນໃຫ້ສະພາອຸດສາຫະກຳ ແລະ ການຄ້າແຫ່ງຊາດ (ສຄອຊ) ນັກທຸລະກິດຕ້ອງຄິດແບບມືອາຊີບ ເພາະໃນຕະຫລາດໂລກ ແມ່ນມີການແຂ່ງຂັນສູງ ການແຂ່ງຂັນແມ່ນ ເພື່ອການພັດທະນາ, ແຂ່ງຂັນເພື່ອປັບປຸງ ໃຫ້ດີຂຶ້ນ ບໍ່ແມ່ນແຂ່ງຂັນເພື່ອທໍາລາຍ, ນັກທຸລະກິດຍຸກໃໝ່ຕ້ອງ ໄດ້ມີການແຂ່ງຂັນກັນທຸກເວລາ.

ພ້ອມນີ້, ທ່ານ ນາຍົກລັດຖະມົນຕີ ຍັງເນັ້ນອີກວ່າ: ນັກທຸລະກິດຕ້ອງຄິດທົບທວນ ປັບປ່ຽນຮູບແບບການດຳເນີນທຸລະກິດແບບໃໝ່ ໃຫ້ຫັນກັບ ຍຸກໃນປັດຈຸບັນ ເພື່ອຫັນປ່ຽນຮູບແບບ ການດຳເນີນທຸລະກິດ ໃຫ້ມີຫລາກຫລາຍວິທີທາງ ໃນການດຳເນີນທຸລະກິດ ໂດຍສະເພາະ ແມ່ນການຄົ້ນຫາວິທີ ສ້າງມູນຄ່າ ເພີ່ມ ໃຫ້ກັບ ທຸລະກິດ ຂອງຕົນເອງ ແລະ ນັກທຸລະກິດຕ້ອງ ມີການຕັ້ງບັນຫາ ໃນການສ້າງມູນຄ່າເພີ່ມຈະເຮັດໄດ້ແນວໃດ ແລະ ຈະສ້າງຄວາມ ສາມາດແຂ່ງຂັນ ໃນຕະຫລາດ ຂອງພາກພື້ນ ແລະ ຂອງໂລກໄດ້ແນວໃດ, ຊຶ່ງຕ້ອງມີລະບົບການເງິນ ລະບົບບໍລິຫານທີ່ທັນສະໄໝ ແລະ ນໍາໃຊ້ເຕັກໂນໂລຊີ ທີ່ທັນສະໄໝອື່ນໆ ເຂົ້າໃນການ ດຳເນີນທຸລະກິດ ແນໃສ່ສ້າງສະພາບແວດລ້ອມ ທີ່ດີໃຫ້ກັບການດຳເນີນ ທຸລະກິດ ແລະ ກ້າວສູ່ການດຳເນີນ ທຸລະກິດແບບດິຈີຕອນ. ຕ້ອງຄິດແບບ ສ້າງສັນ ແລະ ເບິ່ງການໄກ ຕໍ່ກັບທຸລະກິດຂອງຕົນເອງ, ຊຶ່ງນັກທຸລະກິດລາວ ຕ້ອງໄດ້ມີການພົບປະແລກປ່ຽນ ເພື່ອສົ່ງເສີມໃຫ້ມີ ການຮ່ວມມືກັນ ໃຫ້ຫລາຍຂຶ້ນ, ມີການປະສົມ ປະສານກັນ ທາງດ້ານຄວາມຄິດ ໃນວິທີການດຳເນີນທຸລະກິດ ພ້ອມກັນກ້າວໄປຂ້້າງໜ້າ ເພື່ອສ້າງຄວາມສາມາດ ໃນການແຂ່ງຂັນໃນຕະຫລາດ ແລະ ສາມາດປະກອບສ່ວນ ສ້າງສາພັດທະນາ ເສດຖະກິດ-ສັງຄົມຂອງຊາດ.

ໂອກາດນີ້, ທ່ານ ທອງລຸນ ສີສຸລິດ ໄດ້ສະແດງຄວາມຍ້ອງຍໍ ຊົມເຊີຍຕໍ່ຜົນງານ ແລະ ຄວາມສາ ມັກຄີ ຂອງບັນດານັກທຸລະກິດ ທີ່ປະກອບສ່ວນເຂົ້າໃນ ວຽກງານຕ່າງໆທາງພາກລັດ ແລະ ເອກະຊົນ ພ້ອມກັນນັ້ນ ກໍ່ໄດ້ຮຽກຮ້ອງມາຍັງຄະນະ ບໍລິຫານງານຊຸດໃໝ່ ກໍ່ຄື ສະມາຊິກສະພາການຄ້າ ຕ້ອງເອົາໃຈໃສ່ແກ້ໄຂ ຈຸດອ່ອນຂໍ້ຄົງຄ້າງ ໄລຍະຜ່ານມາ ສືບຕໍ່ສ້າງຄວາມເຂັ້ມແຂງໃຫ້ບັນດາ SME ໃນການເຂົ້າເຖິງແຫລ່ງທຶນ ສ້າງສະພາບແວດລ້ອມ ທີ່ດີໃນການລົງທຶນ ແກ້ໄຂວຽກ ງານການຄ້າ ການບໍລິການພາຍໃນໃຫ້ເຂັ້ມແຂງ ຂຸດຄົ້ນທ່າແຮງບົ່ມຊ້ອນພາຍໃນປະເທດ ໃນການດຳເນີນທຸລະກິດ ໃຫ້ສາມາດກຸ້ມຕົນເອງໄດ້ ໃນໄລຍະການລະບາດຂອງ ໂຄວິດ-19 ມັນຮຽກຮ້ອງໃຫ້ມີການ ປ່ຽນແປງການບໍລິຫານ, ໃຫ້ມີການປະຢັດມັດທະຍັດດ້ານຕ່າງໆ ກຳນົດຈຸດສຸມໃນການພັດທະນາແຕ່ລະດ້ານ ໃຫ້ສອດຄ່ອງກັບແຕ່ລະໄລຍະກຳນົດແຜນການໃນຕໍ່ໜ້າ ດ້ວຍຫລາຍຮູບແບບ ຫລາຍເສັ້ນທາງໃນການ ດຳເນີນທຸລະກິດແບບມືອາຊີບ ເປັນຕົ້ນ ລະບົບການບໍລິຫານ ງົບປະມານຂອງຕົນເອງ ວິທີການສ້າງມູນຄ່າ ແລະ ຜົນຕອບແທນເພີ່ມນັກທຸລະກິດຍຸກໃໝ່ ຕ້ອງມີການແຂ່ງຂັນ ຢູ່ຕະຫລອດເວລາ ຈຶ່ງຈະສາມາດ ສ້າງມູນຄ່າເພີ່ມ ໃຫ້ແກ່ຜະລິດຕະພັນ ເພື່ອໃຫ້ມີການພັດທະນາ ພ້ອມທັງມີຄວາມຄິດທີ່ສ້າງສັນໃນມຸມມອງການດຳເນີນທຸລະກິດການດຳເນີນກິດຈະການໃນຂະແໜງການຕ່າງໆ ໃຫ້ປະເທດຊາດມີການ ຫັນປ່ຽນຕາມຍຸກສະໄໝ ຂອງການພັດທະນາໃນໄລຍະໃໝ່ ພັກ-ລັດຈະເປັນ ກຳລັງແຮງໃຫ້ແກ່ ສຄອຊ ເດີນໜ້າຕໍ່ໄປ ຜ່ານຜ່າວິກິດ ສຳຄັນຕ້ອງໄດ້ປັບປຸງໂຄງສ້າງ ແລະ ປ່ຽນຄວາມຄິດຂອງຜູ້ບໍລິຫານພະນັກງານໃຫ້ມີການປ່ຽນແປງ ໂດຍທຸກພາກສ່ວນຕ້ອງຮ່ວມມືກັນຕໍ່ສູ້ຢ່າງມີສະຕິ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)