ຝຶກອົບຮົມ ວຽກງານພິທີການສາກົນ ສຳລັບຂະແໜງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ

0
75

ໃນວັນທີ 29 ກັນຍາ 2020, ທີ່ຫ້ອງປະຊຸມຊັ້ນ 1 ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຈັດຊຸດຝຶກອົບຮົມວຽກງານພິທີການສາກົນ ສຳລັບພະນັກງານທົ່ວຂະແໜງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ. ໂດຍການເປັນປະທານ ຂອງທ່ານ ສະຫວັນຄອນ ລາຊມຸນຕີ, ຄະນະປະຈຳພັກກະຊວງ, ຮອງລັດຖະມົນຕີ ກະຊວງ ຖວທ. ພ້ອມດ້ວຍ ທ່ານ ແສງແກ້ວ ປວງປະດິດ ຫົວໜ້າກົມພິທີການທູດ ກະຊວງການຕ່າງປະເທດ ເປັນວິທະຍາກອນໃນການບັນຍາຍໃຫ້ຄວາມຮູ້ຕໍ່ກັບວຽກງານພິທີການ ແລະ ມີບັນດາຫົວໜ້າກົມ, ຮອງກົມ, ຫົວໜ້າພະແນກ ແລະ ພະນັກງານວິຊາການອ້ອມຂ້າງກະຊວງ ເຂົ້າຮ່ວມ.

ຈຸດປະສົງ ເພື່ອໃຫ້ຄວາມຮູ້ພື້ນຖານກ່ຽວກັບວຽກງານພິທີການ, ນະໂຍບາຍການຕ່າງປະເທດ ແລະ ການພົວພັນສອງຝ່າຍ, ການກະກຽມຂື້ີນແຜນຮັບຕ້ອນແຂກລະດັບສູງຕ່າງປະເທດ ແລະ ມາລະຍາດສັງຄົມ-ມາລາຍາດສາກົນ.

ຊຸດຝຶກອົບຮົມໃນຄັ້ງ​ນີ້ ແມ່ນມີຄວາມໝາຍສຳຄັນທີ່ສຸດ ຊຶ່ງພວກເຮົາພວມຢູ່ໃນໄລຍະທີ່ ພັກ ແລະ ລັດ​ຖະ​ບານ​ເຮົາ ແມ່ນ​ເປີດກວ້າງ​ການ​ຮ່ວມມື​ກັບ​ຕ່າງ​ປະ​ເທດ ບົນ​ພື້ນ​ຖານ​ ສັນ​ຕິ​ພາບ ​ເອ​ກະ​ລາດ ມິດຕະພາບ ແລະ ການເຊື່ອມໂຍງກັບສາກົນ ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍດ. ເພື່ອ​ຍາດ​ແຍງ​ການ​ຊ່ວຍ​ເຫຼືອ​ດ້ານ​ທຶນ​ຮອນ ແລະ ເຕັກ​ນິກວິ​ຊາ​ການ ປະ​ກອບ​ສ່ວນ​ເຂົ້າ​ໃນການ​ພັດ​ທະ​ນາເສດ​ຖະ​ກິດ-ສັງ​ຄົມ​ຂອງ​ປະ​ເທດ; ພັກ-ລັດ ກໍ​ໄດ້​ຖື​ສຳ​ຄັນ​ໃຫ້ແກ່ການ​ຮ່ວມ​ມື​ກັບບັນດາປະເທດ​ຍຸດ​ທະ​ສາດ ແລະ ຮ່ວມມືກັບບັນດາປະເທດເພື່ອນມິດອ້ອມຂ້າງ ແລະ ສາກົນ.

ວຽກ​ງານ​ພິ​ທີ​ການ​ ​ແມ່ນ​ປະ​ຕູ​ດ້ານ​ທຳ​ອິດ ທີ່ສ້າງ​ຄວາມ​ປະ​ທັບ​ໃຈ​ໃຫ້​ແກ່ແຂກ​ທີ່​ມາ​ຢ້ຽມ​ຢາມ  ເຮັດ​ໃຫ້​ການ​ປະ​ຕິ​ບັດວຽກ​ງານ​ ຊຶ່ງກັນ ແລະ ກັນ ຈາກ​​ຄວາມ​ຫຍຸ້ງ​ຍາກ ສາ​ມາດ​ຫຼຸດ​ຜ່ອນ ຫຼື ແກ້​ໄຂ​ໄດ້​ຕາມ​ຄວາມ​ເໝາະ​ສົມ. ພ້ອມນີ້, ກໍແມ່ນກົດລະບຽບ ຂອງການບໍລິຫານມາລະຍາດສາກົນ ເພື່ອຮັບໃຊ້ໃນວຽກງານການທູດ, ການພົວພັນລະຫວ່າງປະເທດ ແລະ ເປັນເຄື່ອງມືທາງການເມືອງຂອງການພົວພັນການທູດ ແມ່ນແບບແຜນວິທີຂອງການຕິດຕໍ່ພົວພັນລະຫວ່າງສອງປະເທດ ຫລື ຫລາຍປະເທດ ເປັນມາດຕະເກນສາກົນ ຊື່ງມີຄວາມສະເຫມີພາບໃນພາກປະຕິບັດ ແລະ ຈະບໍ່ຂື້ນກັບການຂະຫຍາຍຕົວທາງດ້ານເສດຖະກິດ-ສັງຄົມ, ວັດທະນະທຳ, ການເມືອງ ແລະ ຄວາມເຂັ້ມແຂງທາງດ້ານການທະຫານຂອງລັດ. ມາດຕະເກນດັ່ງກ່າວ ຍັງເປັນລະບຽບການສາກົນ ທີ່ກຳນົດວິທີການປະຕິບັດຫນ້າທີ່ຂອງນັກການທູດຢູ່ໃນລັດທີ່ຮັບ ບົນພື້ນຖານຫລັກການຂອງກົດຫມາຍສາກົນ. ນອກນີ້, ຍັງມີສິດສະເຫມີພາບ ລະຫວ່າງປະເທດ, ເຄົາລົບອຳນາດ ອະທິປະໄຕ ແລະ ບໍ່ແຊກແຊງເຂົ້າກິດຈະການພາຍໃນຂອງກັນ ແລະ ກັນ.

ຊຸດຝຶກອົບຮົມໃນຄັ້ງນີ້, ຍັງຈະເປັນໂອກາດອັນດີ ໃຫ້ແກ່ນັກສຳມະນາກອນທຸກໆທ່ານ ມີ​ຄວາມ​ເຂົ້າໃຈ​, ​ເພີ່ມ​ຄວາມຮັບ​ຮູ້​ວຽກ​ພິ​ທີ​ການ ແລະ ເຫັນຄວາມສຳຄັນແກ່ວຽກງານພິທີການຫຼາຍຂື້ນ. ພ້ອມທັງມີຄວາມສາມາດເຂົ້າໃຈຂັ້ນຕອນກະກຽມດ້ານພິທີການ ແລະ ຂຶ້ນແຜນງົບປະມານຮັບໃຊ້ວຽກງານດັ່ງກ່າວ ຢ່າງຖືກຕ້ອງ ເພື່ອຫຼີກເວັ້ນຂໍ້ຜິດພາດໃຫ້ໜ້ອຍທີ່ສຸດລວມທັງຈະໄດ້ຮ່ວມກັນຖອດຖອນບົດຮຽນຈຸດດີ, ຂໍ້ຄົງຄ້າງ ແລະ ສິ່ງທ້າທ້າຍ ຮ່ວມກັບກົມພິທີການທູດ ແລະ ບາງກົມ, ກອງ ທີ່ສໍາເລັດໃນການເປັນເຈົ້າພາບຈັດ​ຕັ້ງ​ປະ​ຕິ​ບັດ​ວຽກ​ງານດັ່ງກ່າວໃນໄລຍະຜ່ານມາ​.

Medialaos MMD