ໃນຕອນຄ່ຳຂອງວັນທີ 28 ກັນຍາ 2020 ທີ່ໂຮງລະຄອນແຫ່ງຊາດ ນະຄອນຫລວງບາງກອກ, ກະຊວງວັດທະນະທຳ ແຫ່ງ ຣາຊະອານາຈັກໄທ ຮ່ວມກັບ ກະຊວງຖະແຫລງຂ່າວ, ວັດ ທະນະທໍາ ແລະ ທ່ອງທ່ຽວ ແຫ່ງ ສປປ ລາວ ໄດ້ຈັດການສະແດງດົນຕີ ແລະ ສິລະປະວັດທະນະທໍາພື້ນບ້ານ ພາຍໃຕ້ຫົວຂໍ້ “ນໍ້າຂອງບໍ່ກັ້ນ ໂຄວິດບໍ່ໃກ້ 70 ປີ ໄທ-ລາວ ຮັກແພງແບ່ງປັນ ແລະ ໝັ້ນຄົງ”, ເພື່ອສະເຫລີມສະຫລອງ ວັນສ້າງຕັ້ງ ສາຍພົວພັນການທູດ ລະຫວ່າງ ສປປ ລາວ ກັບ ຣາຊະອານາຈັກໄທ ຄົບຮອບ 70 ປີ ໂດຍຖ່າຍທອດສົດ ຜ່ານລະບົບອອນລາຍ ທາງ Facebook Live (https://www.facebook.com/ThaiMCulture) ແລະ YouTube Live (https://www. youtube.com/channel/UCmS0EQJD2PYBmlp6o8aUxkQ). ໂດຍການເຂົ້າຮ່ວມຂອງທ່ານ ອິດທິພົນ ຄຸນປື້ມ ລັດຖະມົນຕີກະຊວງວັດທະນະທຳ ຣາຊະອານາຈັກໄທ, ທ່ານ ແສງ ສຸຂະຕິວົງ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳຣາຊະອານາຈັກໄທ ມີບັນດາທູຕານຸທູດ ແລະ ອົງການຈັດຕັ້ງຕ່າງໆ.

ທ່ານ ອິດທິພົນ ຄຸນປື້ມ ໄດ້ກ່າວວ່າ: ງານຄັ້ງນີ້, ຈັດຂຶ້ນເພື່ອເປັນການ ສະເຫລີມສະຫລອງວັນສ້າງຕັ້ງ ສາຍພົວພັນການທູດ ລະຫວ່າງ ສປປ ລາວ ກັບຣາຊະອານາຈັກໄທ ຄົບຮອບ 70 ປີ, ປະ ຊາຊົນໄທ ແລະ ລາວ ໄດ້ມີປະຫວັດສາດ ແລະ ວັດທະນະທຳ ການພົວພັນ ແລະ ໄປມາຫາສູ່ກັນມາແຕ່ດົນນານແລ້ວ, ໄທ-ລາວ, ລາວ-ໄທ ປຽບເໝືອນສາຍເລືອດດຽວກັນ ໃນການພົວພັນທີ່ແໜ້ນແຟ້ນ. ນອກຈາກນີ້, ຍັງມີການພົວພັນທາງ ດ້ານເສດຖະກິດ ໂດຍສະເພາະ ມີຂົວມິດຕະພາບລາວ-ໄທ ຫລາຍແຫ່ງ, ເຊິ່ງໄດ້ເປັນຂົວຕໍ່ໃນການ ເຊື່ອມໂຍງທາງດ້ານການ ຄົມມະນາຄົມ ແລະ ການຄ້າ. ໃນໄລຍະຂອງການລະບາດ ພະຍາໂຄວິດ-19 ນີ້ ລັດຖະບານທັງສອງປະເທດ ກໍໄດ້ມີການສຶກສາຫາລື ແລະ ແລກປ່ຽນບົດຮຽນ ໃນການປ້ອງກັນ ແລະ ຄວບຄຸມພະຍາດດັ່ງກ່າວ ເຊິ່ງກັນ ແລະ ກັນ.

ໂອກາດດຽວກັນນີ້, ທ່ານ ກິແກ້ວ ໄຂຄໍາພິທູນ ລັດຖະມົນຕີຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແຫ່ງ ສປປ ລາວ ໄດ້ສະແດງຄວາມດີໃຈ ແລະ ພາກພູມໃຈເປັນຢ່າງຍິ່ງ ທີ່ໄດ້ຕາງໜ້າໃຫ້ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ແຫ່ງ ສປປ ລາວ ນໍາເອົາ ລາຍການສິລະປະຂອງ ສປປ ລາວ ມາເຂົ້າຮ່ວມການສະແດງດົນຕີ ແລະ ສິລະປະວັດທະນະທໍາພື້ນບ້ານ ໃນຄັ້ງນີ້. ພ້ອມນີ້, ທ່ານຍັງໄດ້ສະແດງ ຄວາມເສົ້າເສຍໃຈ ແລະ ຄວາມເຫັນໃຈຢ່າງສຸດຊຶ້ງ ມາຍັງລັດ ຖະບານ ແລະ ປະຊາຊົນໄທ ທີ່ໄດ້ສູນເສຍຊີວິດ ຍ້ອນຖືກຜົນກະທົບ ຈາກການລະບາດ ຂອງພະຍາດອັກເສບປອດ ທີ່ເກີດຈາກເຊື້ອຈຸລະໂລກ ສາຍພັນໃໝ່ (ໂຄວິດ-19).

ທ່ານ ກິແກ້ວ ໄຂຄໍາພິທູນ ໄດ້ສະແດງຄວາມຂອບໃຈ ແລະ ຍ້ອງຍໍຊົມເຊີຍຢ່າງຈິງໃຈ ຕໍ່ກະ ຊວງວັດທະນະທຳ ແຫ່ງຣາຊະອານາຈັກໄທ ທີ່ໄດ້ເປັນເຈົ້າພາບຈັດງານ ສະແດງວັດທະນະທຳທາງໄກ ໃນເທື່ອນີ້ ແລະ ເຊື່ອໝັ້ນວ່າ ການສະແດງສິລະປະຮ່ວມ ລາວ-ໄທ ໃນຄ່ຳຄືນນີ້ ຈະປະກອບສ່ວນສຳຄັນ ເຂົ້າໃນການຮັດແໜ້ນສາຍ ພົວພັນມິດຕະພາບ ແລະ ການຮ່ວມມືທີ່ມີມູນເຊື້ອ ມາແຕ່ດົນນານ ລະ ຫວ່າງສອງຊາດ ພວກເຮົາ ໃຫ້ນັບມື້ຈະເລີນງອກງາມຍິ່ງໆຂຶ້ນ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)