ໃນວັນທີ 28 ກັນຍາ 2020 ທີ່ ກະຊວງການຕ່າງປະເທດ ໄດ້ມີພິທີເຊັນບົດບັນທຶກຄວາມເຂົ້າໃຈ (MoU) ລະຫວ່າງ ສະຖາບັນການຕ່າງປະເທດ, ກະຊວງການຕ່າງປະເທດ ຂອງ ສປປ ລາວ ແລະ ສະຖາບັນການຕ່າງປະເທດ ເທວະວົງ ວະໂຣປະການ ແຫ່ງ ຣາຊະອານາຈັກໄທ ວ່າດ້ວຍ ການຮ່ວມມືສອງຝ່າຍ ຂອງສອງສະຖາບັນການຕ່າງປະເທດ.

 ຜູ້ຕາງໜ້າລົງນາມ ຝ່າຍລາວ ໂດຍ ທ່ານ ໄມ ໄຊຍະວົງສ໌ ຫົວໜ້າສະຖາບັນການຕ່າງ ປະເທດ ແລະ ຝ່າຍໄທ ໂດຍ ທ່ານ ດຳຣົງ ໃຄ່ຣຄວນ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ຣາຊະອານາຈັກໄທ ປະຈໍາ ສາທາລະນະລັດ ປະຊາທິປະໄຕ ປະຊາຊົນລາວ, ໂດຍການໃຫ້ກຽດເຂົ້າຮ່ວມ ເປັນສັກຂີພະຍານ ຂອງ ທ່ານ ທອງຜ່ານ ສະຫວັນເພັດ ຮອງລັດຖະມົນຕີ ກະຊວງການຕ່າງປະເທດ, ຄະນະກົມ, ຄະນະພະແນກ ແລະ ພະນັກງານວິຊາການ ທີ່ກ່ຽວຂ້ອງຂອງ ກະຊວງການຕ່າງປະເທດ ແລະ ສະຖານເອກອັກຄະລັດຖະທູດແຫ່ງ ຣາຊະອານາຈັກໄທ ປະຈຳ ສປປ ລາວ ເຂົ້າຮ່ວມ.

      ການເຊັນບົດບັນທຶກຄວາມເຂົ້າໃຈຄັ້ງນີ້, ແມ່ນເພື່ອເປັນການປະກອບ ສ່ວນຮັດແໜ້ນ ແລະ  ເສີມຂະຫຍາຍ ສາຍພົວພັນມິດຕະພາບ ລະຫວ່າງສອງປະເທດ ລາວ-ໄທ ກໍຄື ສົ່ງເສີມການຮ່ວມມື ລະຫວ່າງ ສະຖາບັນການຕ່າງປະເທດລາວ ແລະ ສະຖາບັນການຕ່າງປະເທດ ເທວະວົງ ວະໂຣປະການ ແຫ່ງ ຣາຊະອານາຈັກໄທ ກ່ຽວກັບການສ້າງຂີດ ຄວາມອາດສາມາດ ໃນການປະຕິບັດ ວຽກງານຂອງສອງສະຖາບັນ ການຕ່າງປະເທດ ເປັນຕົ້ນແມ່ນ ການຈັດຊຸດຝຶກອົບຮົມ ວຽກງານການທູດ ແລະ ສົ່ງເສີມການແລກປ່ຽນຢ້ຽມຢາມຊຶ່ງກັນ ແລະ ກັນ ໃຫ້ມີປະສິດທິພາບກວ່າເກົ່າ, ເຊິ່ງ MoU ສະບັບນີ້ ຈະມີຜົນບັງຄັບໃຊ້ເປັນເວລາ 3 ປີ.

ສປປ ລາວ ແລະ ຣາຊະອານາຈັກໄທ ເປັນປະເທດບ້ານໃກ້ເຮືອນຄຽງ ທີ່ມີການຜູກພັນກັນທາງ ດ້ານຮີດຄອງປະເພນີ, ວັດທະນະທໍາ, ພາສາປາກເວົ້າ, ມີຊາຍແດນຕິດຈອດ ກັນທັງທາງບົກ ແລະ ທາງນໍ້າ ຕັ້ງແຕ່ເໜືອນຕະຫລອດໃຕ້. ສອງປະເທດໄດ້ສ້າງຕັ້ງ ສາຍພົວພັນການທູດ ຮ່ວມກັນ ເລີ່ມແຕ່ວັນທີ 19 ທັນວາ 1950 ເປັນຕົ້ນມາ. ຕະຫລອດໄລຍະຜ່ານມາ ການພົວພັນ ແລະ ຮ່ວມມືສອງຝ່າຍ ແມ່ນນັບມື້ນັບໄດ້ຮັບການ ເສີມຂະຫຍາຍຢ່າງກວ້າງຂວາງ ແລະ ມີຜົນສໍາເລັດ ຫລາຍດ້ານ. ສອງປະເທດ ໄດ້ມີການແລກປ່ຽນການຢ້ຽມຢາມ ລະຫວ່າງ ການນໍາຂອງສອງປະເທດ ແລະ ກົນໄກການຮ່ວມມືຕ່າງໆ ທີ່ມີຢູ່ຢ່າງ ເປັນປົກກະຕິ ແລະ ມີການຮ່ວມມືທີ່ດີ ນໍາກັນຕະຫລອດມາ. ບັນດາໂຄງການຮ່ວມມືດ້ານຕ່າງໆ ໄດ້ຮັບການຈັດຕັ້ງປະຕິບັດ ຢ່າງເປັນຮູບປະທຳ ເຊັ່ນ: ການພັດທະນາພື້ນຖານໂຄງລ່າງ ເພື່ອເຊື່ອມໂຍງເສັ້ນທາງ ຄົມມະນາຄົມຂົນສົ່ງ, ການຊຸກຍູ້ສົ່ງເສີມ ການຮ່ວມມືດ້ານການສຶກສາ, ສາທາລະນະສຸກ, ກະສິກຳ, ເສດຖະກິດ, ທ່ອງທ່ຽວ ແລະ ອື່ນໆ, ຊຶ່ງມີຫລາຍໂຄງການສຳເລັດແລ້ວ ແລະ ຫລາຍໂຄງການກໍ່ກຳລັງ ດຳເນີນການ ແລະ ມີຄວາມຄືບໜ້າດີ.

ພິເສດ, ໃນໄລຍະການແຜ່ລະບາດ ຂອງເຊື້ອພະຍາດຈຸລະໂລກ ສາຍພັນໃໝ່ ຫລື ພະຍາດໂຄວິດ-19, ທາງພາກລັດຖະບານ, ເອກະຊົນ ແລະ ປະ ຊາຊົນໄທ ໄດ້ໃຫ້ການຊ່ວຍເຫລືອ ທາງດ້ານວັດ ຖຸ ແລະ ປັດໄຈ ໃຫ້ແກ່ລັດຖະບານ ແລະ ປະຊາຊົນລາວ ເພື່ອຕ້ານ ແລະ ສະກັດກັ້ນກັບການແຜ່ລະບາດ ຂອງພະຍາດດັ່ງກ່າວ. ການເຊັນ MoU ໃນຄັ້ງນີ້, ແມ່ນກິດຈະກຳໜຶ່ງ ເພື່ອປະກອບສ່ວນສະເຫລີມ ສະຫລອງວັນສ້າງຕັ້ງ ສາຍພົວພັນການທູດ ລະຫວ່າງ ລາວ-ໄທ ຄົບຮອບ 70 ປີ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)