ສຳນັກງານນາຍົກລັດຖະມົນຕີ ມອບໃບຍ້ອງຍໍໃຫ້ ບໍລິສັດ ຫົວເຫວີຍ

0
84

ໃນວັນທີ 23 ກັນຍາ 2020, ທ່ານ ເພັດ ພົມພິພັກ ລັດຖະມົນຕີ, ຫົວໜ້າຫ້ອງວ່າການສໍານັກງານ ນາຍົກລັດຖະມົນຕີ ໄດ້ໃຫ້ກຽດຕ້ອນຮັບຄະນະຈາກ ບໍລິສັດ ຫົວເຫວີຍ, ເຊິ່ງເປັນບໍລິສັດ ນະວັດຕະກໍາໄອຊີທີຊັ້ນນຳຂອງໂລກ ເຂົ້າຢ້ຽມຢາມ.

ໂອກາດດັ່ງກ່າວ, ທ່ານ ເພັດ ພົມພິພັກ ໄດ້ສະແດງຄວາມຍ້ອງຍໍຊົມເຊີຍ ແລະ ຂອບໃຈ ບໍລິສັດ ຫົວເຫວີຍ ຕໍ່ຜົນງານ ແລະ ການສະໜັບສະໜຸນ ອຸປະກອນໄອທີ ໃຫ້ກັບສຳນັກງານ ນາຍົກລັດຖະມົນຕີ ກໍຄື ສປປ ລາວ ເພື່ອນຳໃຊ້ເຂົ້າໃນການ ຮັບໃຊ້ກອງປະຊຸມ ແລະ ວຽກງານຕ່າງໆ ທີ່ກ່ຽວຂ້ອງໃນການຕ້ານ ແລະ ສະກັດກັ້ນການແຜ່ລະບາດ ຂອງພະຍາດໂຄວິດ-19 ຢູ່ ສປປ ລາວ ໃນໄລຍະຜ່ານມາ, ໂດຍສະເພາະ ໄດ້ຖ່າຍທອດສິ່ງທີ່ ທ່ານ ທອງລຸນ ສີສຸລິດ ນາຍົກລັດຖະມົນຕີແຫ່ງ ສປປ ລາວ ໄດ້ກ່າວຄຳຂອບ ໃຈຕໍ່ຫົວເຫວີຍ ໃນການປະກອບສ່ວນ ການສະໜອງອຸປະກອນ ລະບົບການປະຊຸມທາງໄກ ແລະ ອຸ ປະ ກອນຕ່າງໆ ເພື່ອຮັບໃຊ້ກອງປະຊຸມ ພົບປະລະຫວ່າງ ທ່ານນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ນາຍົກລັດຖະມົນຕີ ສປ ຈີນ.

ພ້ອມກັນນັ້ນ, ກໍຍັງມີກອງປະຊຸມຜູ້ນຳແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 3 ໂດຍ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ແລະ ທ່ານ ຫລີ ເຄີ້ສຽງ ນາຍົກລັດຖະມົນຕີ ແຫ່ງ ສປ ຈີນ ເປັນປະທານກອງປະຊຸມ, ໂດຍມີ ທ່ານ ຮຸນເຊັນ ນາຍົກລັດຖະມົນຕີກຳປູເຈຍ, ທ່ານ ເຫວີນ ມິນ ປະທານາທິບໍດີມຽນມາ, ທ່ານ ປະຍຸດ ຈັນໂອຊາ ນາຍົກລັດຖະມົນຕີ ແຫ່ງ ປະເທດໄທ ແລະ ທ່ານ ຫງຽນ ຊຸນຟຸກ ນາຍົກລັດຖະມົນຕີ ແຫ່ງ ສສ ຫວຽດນາມ ເຂົ້າຮ່ວມ.

ຕາງໜ້ານາຍົກລັດຖະມົນຕີ ແຫ່ງ ສປປ ລາວ, ທ່ານ ເພັດ ພົມພິພັກ ລັດຖະມົນຕີ ກໍໄດ້ມອບໃບຍ້ອງຍໍໃຫ້ກັບ ທ່ານ ຫູ ເຫວີຍຫົວ ປະທານ ບໍລິສັດ ຫົວເຫວີຍ ປະຈຳລາວ, ພ້ອມກ່າວສະແດງຄວາມຂອບໃຈ ຕໍ່ການສະໜັບສະໜູນຂອງຫົວເຫວີຍ ສຳລັບການປັບປຸງສຳນັກ ງານນາຍົກລັດຖະມົນຕີ ໃຫ້ມີຄວາມທັນສະໄໝ ແລະ ຫວັງວ່າ ຫົວເຫວີຍ ປະຈໍາລາວ ຈະຍັງສືບນໍາໃຊ້ເທັກໂນໂລຢີ ທີ່ທັນສະໄໝ ເຂົ້າມານຳໃຊ້ໃນ ການພັດທະນາ ເສດຖະກິດໃນລາວ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)