ຄະນະ​ກຳມາ​ທິ​ການ​ເພື່ອ​ຄວາມ​ກ້າວໜ້າ​ຂອງ​ແມ່ຍິງ ແລະ ແມ່​-​ເດັກ ກະຊວງ ໄປສະນີ, ໂທລະ​ຄົມມະນາຄົມ ແລະ ການ​ສື່ສານ (ປທສ) ໄດ້​ຈັດ​ກອງ​ປະຊຸມ ເວທີ​ສົນທະນາ ໃນ​ຫົວຂໍ້: ‘‘ການ​ປົກ​ປ້ອງ​ເດັກ​ຈາກ​ໄພ​ຄຸກ​ຄາມ​ສື່​ສັງຄົມ​ອອນ​ລາຍ’’ ຂຶ້ນ​ໃນ​ວັນ​ທີ 25 ກັນ​ຍາ ຜ່ານ​ມາ ໃຫ້​ກຽດ​ເຂົ້າ​ຮ່ວມ​ເປີດ​ກອງ​ປະຊຸມ​ໂດຍ ທ່ານ ທອງ​ໃສ ຊານ​ໄຊ​ຍະ ຮອງ​ລັດຖະມົນຕີ ປະທານ​ຄະນະ​ກຳມາ​ທິ​ການ ເພື່ອ​ຄວາມ​ກ້າວໜ້າ​ຂອງ​ແມ່ຍິງ, ແມ່ ແລະ ເດັກ ກະຊວງ ປທສ; ມີ​ບັນດາ​ທ່ານ​ຄະນະ​ກົມ/ທຽບ​ເທົ່າ ແລະ ຄະ​ນະ​ອໍາ​ນວຍ​ການ ບໍລິສັດ ລັດ​ວິ​ສາ​ຫະ​ກິດ, ຄະນະ​ກຳມາ​ທິ​ການ​ເພື່ອ​ຄວາມ​ກ້າວໜ້າ​ຂອງ​ແມ່ຍິງ ແລະ ແມ່-​ເດັກ ກະຊວງ ປທສ ແລະ ພະນັກ​ງານ​-​ລັດຖະກອນ ອ້ອມ​ຂ້າງ​ກະຊວງ ປທສ ເຂົ້າ​ຮ່ວມ ຊຶ່ງ​ເວທີ​ສົນທະນາ​ໃນ​ຄັ້ງ​ນີ້: ມີ​ວິທະຍາກອນ​ຈາກ ສູນ​ສະກັດ​ກັ້ນ ແລະ ແກ້​ໄຂ​ເຫດ​ສຸກ​ເສີນ​ທາງ​ຄອມ​ພິວ​ເຕີ, ສູນ​ກາງ​ຊາວ​ໜຸ່ມ​ປະຊາຊົນ​ປະຕິວັດ​ລາວ, ອົງການ​ອຸຍ​ນີ​ເຊັບ ປະຈຳ ສປປ ລາວ (Unicef) ແລະ ອົງການ​ຊາຍ​ຟັນ ລາວ (Child Fund Laos).

ທ່ານ ທອງ​ໃສ ຊານ​ໄຊ​ຍະ ໄດ້​ກ່າວ​ວ່າ: ນັບ​ວ່າ​ເປັນ​ຄັ້ງ​ທຳອິດ ທີ່​ຄະນະ​ກຳມາ​ທິ​ການ ເພື່ອ​ຄວາມ​ກ້າວໜ້າ​ຂອງ​ແມ່ຍິງ ແລະ ແມ່​-​ເດັກ ໄດ້​ຈັດ​ເວທີ​ສົນທະນາ​ນີ້​ຂຶ້ນ ເພື່ອ​ເປັນ​ການ​ສົນທະນາ​ແລກປ່ຽນ​ບົດ ຮຽນ​ຊຶ່ງ​ກັນ ແລະ ກັນ ລະຫວ່າງ​ພາກ​ລັດ ແລະ ອົງການ​ຈັດ​ຕັ້ງ​ສາກົນ ພ້ອມ​ທັງ​ເປັນ​ການ​ຊຸກຍູ້​ໃຫ້​ແກ່​ພະນັກ​ງານ​-​ລັດຖະກອນ ກໍ​ຄື​ພໍ່​ແມ່​ຜູ້​ປົກຄອງ​ໃນ​ຂົງເຂດ ປທສ ໄດ້​ຮັບ​ຮູ້, ເຂົ້າໃຈ​ການ​ນຳ​ໃຊ້​ສື່​ສັງຄົມ​ອອນ​ລາຍ​ໃຫ້​ຖືກຕ້ອງ ແລະ ປອດ​ໄພ ໂດຍ​ສະເພາະ​ກົດໝາຍ, ລະບຽບ​ການ​ໃນ​ການ​ນຳ​ໃຊ້​ສື່​ສັງຄົມ​ອອນ​ລາຍ, ພ້ອມ​ທັງ​ບັນດາ​ອຸປະສັກ, ສິ່ງ​ທ້າ​ທ້າຍ​ໃນ​ການ​ຕ້ານ ແລະ ສະກັດ​ກັ້ນ​ປະກົດ​ການ​ຫຍໍ້ທໍ້​ຕ່າງໆ.

ຄື​ດັ່ງ​ພວກ​ເຮົາ​ຮູ້​ນຳ​ກັນ​ແລ້ວ​ວ່າ ປັດຈຸບັນ ພັກ ແລະ ລັດຖະບານ ແຫ່ງ ສປປ​ ລາວ ໄດ້​ໃຫ້​ຄວາມ​ສໍາ​ຄັນ​ຫຼາຍ ແລະ ເອົາໃຈໃສ່​ທີ່​ສຸດ​ຕໍ່​ການ​ນຳ​ໃຊ້​ສື່​ສັງຄົມ​ອອນ​ລາຍ​ໃຫ້​ມີ​ຄວາມ​ປອດ​ໄພ ຊຶ່ງ​ສະແດງ​ອອກ​ໃນ​ສະຖິຕິ​ຂອງ​ຜູ້​ຊົມໃຊ້​ອິນ​ເຕີ​ເນັດ ແລະ ສື່​ສັງຄົມ​ອອນ​ລາຍ​ຕ່າງໆ ທີ່​ນັບ​ມື້​ນັບ​ເພີ່ມ​ຈຳນວນ​ຫຼວງຫຼາຍ​ບໍ່​ວ່າ​ຈະ​ເປັນ​ຜູ້​ໃຫຍ່ ຫຼື ເດັກນ້ອຍ ທີ່​ນໍາ​ໃຊ້​ເຂົ້າ​ໃນ​ການ​ແລກປ່ຽນ​ຂໍ້​ມູນ​ຄວາມ​ຮູ້, ເຜີຍແຜ່​ຂໍ້​ມູນ​ຂ່າວສານ ແລະ ສາລະ​ຄວາມ​ຮູ້, ເປັນ​ຄັງ​ຂໍ້​ມູນ, ໂຄສະນາ ແລະ ປະ​ຊາ​ສໍາ​ພັນ ແລະ ທັງ​ເປັນ​ການ​ສ້າງ​ຕະຫຼາດ​ການ​ຄ້າຂາຍ ​ທີ່​ເປັນ​ທີ່​ນິຍົມ​ກັນ​ໃນ​ປັດຈຸບັນ ແລະ ອື່ນໆ ຄຽງ​ຄູ່​ກັນ​ນັ້ນ ກໍ​ຍັງ​ມີ​ຜົນ​ກະທົບ​ທາງ​ດ້ານ​ລົບ​ເປັນຕົ້ນ​ເຊັ່ນ: ການ​ໃສ່​ຮ້າຍ​ປ້າຍ​ສີ, ຂໍ້​ມູນ​ທີ່​ບໍ່​ເປັນຄວາມ​ຈິງ, ເປັນ​ເຄື່ອງມື​ສວຍ​ໃຊ້​ກໍ່​ຄວາມ​ບໍ່​ສະຫງົບ, ຄວາມ​ບໍ່​ເປັນ​ລະບຽບ​ຮຽບຮ້ອຍ​ຂອງ​ສັງຄົມ ແລະ ທັງ​ເປັນ​ການ​ແບ່ງ​ແຍກ​ຄວາມ​ສາມັກຄີ, ປອງ​ດອງ​ຂອງ​ປະຊາ​ຊົນ.

ກອງ​ປະຊຸມ​ດັ່ງກ່າວ​ໄດ້​ດໍາ​ເນີນ​ໄປ​ເປັນ​ເວລາ​ເຄິ່ງ​ຕອນ ດ້ວຍ​ບັນຍາກາດ​ຟົດຟື້ນ ແລະ ມີ​ຄວາມ​ໝາຍ ຊຶ່ງ​ຜູ້​ເຂົ້າ​ຮ່ວມ​ກອງ​ປະຊຸມ​ຍັງໄດ້​ຍົກ​ສູງ​ຄວາມ​ຮັບຜິດຊອບ​ເອົາໃຈໃສ່​ຮັບ​ຟັງ, ສົນທະນາ​ແລກປ່ຽນ​ຄວາມ​ຄິດ​ເຫັນຮ່ວມ​ກັນ​ດ້ວຍ​ບັນຍາກາດ​ສ້າງສັນ, ກົງ​ໄປ​ກົງ​ມາ ແລະ ໄດ້​ຮັບ​ຜົນສຳເລັດ​ຢ່າງ​​ຈົບ​ງາມ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)