ກະຊວງ​ວິທະຍາສາດ ແລະ​ ເຕັກ​ໂນ​ໂລ​ຊີ ຮ່ວມ​ກັບ ແຂວງ​ຈຳປາ​ສັກ ໄດ້ຈັດພິທີ ມອບ​-ຮັບ ໃບຢັ້ງຢືນ​ຖິ່ນ​ກຳເນີດ ໃຫ້​ແກ່ສະມາຄົມ ກາເຟ​ບໍລະ​ ເວນ ແລະ​ ຊາ​ປາກ​ຊ່ອງ (ຖິ່ນ​ ກຳເນີດ​ຢູ່​ລາວ LAO GEO- GRAPHICAL INDICATION) ຄື: ໃບຢັ້ງຢືນ​ຖິ່ນ​ກຳ ເນີດກາເຟ​ບໍ​ລະ​ເວນ ເລກ​ທີ LA/ GI/03 ແລະ ໃບຢັ້ງຢືນຖິ່ນ ​ກຳເນີດ​ຊາ​ປາກ​ຊ່ອງ ເລກທີ LA/GI/04, ລົງ​ວັນ​ທີ 14 ກັນ ຍາ 2020, ໃບຢັ້ງຢືນ​ນີ້ ໄດ້​ຈົດ​ເຂົ້າ​ຢູ່​ໃນ​ການ​ຂຶ້ນ​ທະບຽນ​ຖິ່ນ​ກຳເນີດ​ແຫ່ງ​ຊາດ ​ເມື່ອບໍ່ດົນ ຜ່ານ​ມາ ທີ່​ເມືອງ​ປາກ​ຊ່ອງ ແຂວງ​ຈຳປາ​ສັກ ໂດຍ​ການ​ເຂົ້າ​ຮ່ວມ​ຂອງ​ທ່ານ ບົວ​ສອນ ບຸບຜາ​ວັນ ອະດີດ​ນາຍົກລັດຖະມົນຕີ ແຫ່ງ ສປປ ລາວ, ທ່ານ ບໍ່​ວຽງ​ຄຳ ວົງ​ດາລາ ກຳມະການ​ສູນ​ກາງ​ພັກ ລັດຖະມົນຕີ​ກະຊວງ​ວິທະຍາສາດ ແລະ ​ເຕັກ​ໂນ​ໂລ​ຊີ ປະທານ​ສະພາ​ວິທະຍາ ສາດແຫ່ງ​ຊາດ, ທ່ານ ວິໄລ​ວົງ ບຸດ​ດາ​ຄຳ ກຳມະການສູນກາງພັກ ເລຂາ​ພັກ​ແຂວງ ເຈົ້າແຂວງ​ຈຳປາ​ສັກ, ທ່ານ ເຫຼັກໄຫຼ ສີວິໄລ ເລຂາ​ພັກ​ແຂວງ ເຈົ້າແຂວງ​ເຊ​ກອງ ມີ​ບັນດາ​ທ່ານຮອງ​ເຈົ້າແຂວງ, ມີ​ສະມາຄົມກາເຟ​ບໍ​ລະ​ເວນ ແລະ ສະມາຄົມຊາ​ປາກ​ຊ່ອງ, ພາກສ່ວນກ່ຽວຂ້ອງ ພ້ອມ​ດ້ວຍແຂກ​ຖືກ​ເຊີນຈາກ​ສູນ​ກາງ ແລະ ​ທ້ອງຖິ່ນເຂົ້າ​ຮ່ວມ.

ທ່ານ ບໍ່​ວຽງ​ຄຳ ວົງ​ດາລາ ໄດ້​ມີ​ຄຳ​ເຫັນ​ວ່າ: ການ​ຈົດ​ທະບຽນ​ປົກ​ປ້ອງ​ຖິ່ນ​ກຳເນີ​ດ​ຊາ​ປາກ​ຊ່ອງ ແລະ ກາເຟ​ບໍ​ລະ​ເວນ ແມ່ນ​ແນໃສ່​ປົກ​ປ້ອງ​ຊື່​ສຽງ ແລະ ອະນຸລັກ​ຮັກສາ ຄຸນ​ນະ​ພາບ​ທີ່​ມີ​ເອກະລັກ ສະເພາະ ຂອງ​ຊາ​ປາກ​ຊ່ອງ ແລະ ກາເຟ ບໍ​ລະ​ເວນ, ມີ​ປະຫວັດ​ຄວາມ​ເປັນ​ມາ​ທີ່​ຍາວ​ນານ ຕິດ​ພັນ​ກັບ​ວັດ​ທະ​ນະ​ທໍາ ແລະ ວິຖີ​ການ​ດໍາ​ລົງ​ຊີວິດ​ຂອງ​ປະຊາຊົນ​ຢູ່​ພູ​ພຽງ​ບໍ​ລະ​ເວນ ມາ​ໄດ້​ຫຼາຍ​ສະຕະວັດ​ແລ້ວ, ການ​ປົກ​ປ້ອງ​ ພູມ​ປັນຍາ​ທ້ອງ​ຖິ່ນ​ແບບ​ດັ່ງ ເດີມ ໃຫ້​ເປັນ​ຊັບ​ສິນ​ທາງ​ປັນຍາ​ຂອງ​ທ້ອງຖິ່ນ​ນັ້ນ ທີ່​ເປັນ​ການ​ສົ່ງເສີມໃຫ້​ມີ​ການ​ສືບ​ທອດ​ພູມ​ປັນຍາ​ທ້ອງຖິ່ນ​ຈາກ​ບັນ​ພະ​ບູ​ລຸ​ດ​ສູ່​ຄົນ​ຮຸ່ນ​ປັດຈຸບັນ ແລະ ຈະ​ອະນຸລັກ​ຕໍ່ໆ ໄປ​ຢ່າງ​ຍືນ​ຍົງ, ພ້ອມ​ດຽວ​ກັນ​ນັ້ນ ການ​ອະນຸລັກ​ດັ່ງກ່າວ ຍັງ​ຈະ​ເປັນ ການ​ສົ່ງເສີມການທ່ອງທ່ຽວ, ສ້າງ​ມູນ​ຄ່າ​ເພີ່ມ​ໃຫ້​ສິນຄ້າເອ ກະລັກ​ຂອງ​ທ້ອງ​ຖິ່ນ.

ໂອກາດ​ນີ້ ທ່ານ ວິໄລ​ວົງ ບຸດ​ດາ​ຄຳ ໄດ້​ມີ​ຄຳ​ເຫັນ​ວ່າ: ຄຸນ​ນະ​ພາບ​ທີ່​ມີ​ເອກະລັກສະ ເພາະ​ຂອງ​ຊາ​ປາກ​ຊ່ອງ ແລະ ກາເຟ​ບໍ​ລະ​ເວນ ຍ້ອນ​ປັດໄຈ​ ທາງ​ລະບົບ​ນິເວດ​ທີ່​ອຸດົມສົມ ບູນຕິດ​ພັນ​ກັບ​ພູມ​ປັນຍາ​ທ້ອງ ຖິ່ນແບບ​ດັ່ງເດີມ, ວິຖີ​ການ​ດໍາ​ລົງ​ຊີວິດ, ມີ​ປະຫວັດ​ຄວາມ​ເປັນ​ມາ ແລະ ຊື່​ສຽງ​ອັນ​ເປັນ​ທີ່​ຮັບ​ຮູ້​ຂອງ​ຜູ້​ບໍລິໂພກ​ທັງ​ພາຍ​ໃນ ແລະ ຕ່າງປະເທດ​ມາ​ໄດ້​ຫຼາຍ​ສະຕະວັດ​ແລ້ວ​ນັ້ນ ຈຶ່ງ​ເຮັດ​ໃຫ້​ຜູ້​ຜະ​ລິດ​-​ຜູ້​ປະກອບ​ການ ຊາ​ປາກ​ຊ່ອງ ແລະ ກາເຟ​ບໍ​ລະ​ເວນ ຂອງ​ແຂວງ​ຈໍາ​ປາ​ສັກ, ແຂວງ​ເຊ​ກອງ ແລະ ແຂວງ​ສາລະ​ວັນ ເຕົ້າໂຮມ​ກັນ ເປັນ​ສະມາຄົມ​ສົ່ງເສີມ ຊາ​ປາກ​ຊ່ອງ ແລະ ສະມາຄົມ​ສົ່ງເສີມ​ກາເຟ​ບໍ​ລະ​ເວນ ກໍາ​ນົດ​ເອົາ​ຊາ 4 ລາຍການ​ຄື: 1. ຊາ​ຂຽວ, 2. ຊາ​ແດງ, 3. ຊາ​ດໍາ, 4. ຊາ​ຂາວ ແລະ ກາເຟ 8 ລາຍການ​ຄື: 1. ກາເຟ​ນ້ອຍ​ໝາກ​ຊ້ອມ ປຸງ​ແຕ່ງ​ແບບ​ປຽກ, 2 ກາເຟ​ນ້ອຍ​ໝາກ​ຊ້ອມ​ປຸງ​ແຕ່ງ ແບບ​ແຫ້ງ, 3. ກາເຟ​ກາງ​ໝາກ​ຊ້ອມ​ປຸງ​ແຕ່ງ​ແບບ​ປຽກ, 4. ກາເຟ​ກາງ​ໝາກ​ຊ້ອມ ປຸງ​ແຕ່ງ​ແບບ​ແຫ້ງ, 5. ກາເຟ​ນ້ອຍ​ຂົ້ວ, 6. ກາເຟ​ກາງ​ຂົ້ວ, 7. ກາເຟ​ຂົ້ວ ທີ່​ໄດ້​ມາ​ຈາກ​ການ​ປະສົມ ກາເຟ​ໝາກ​ຊ້ອມ, 8. ກາເຟ​ຂົ້ວ ແລະ ຂົ້ວ​ບົດ ທີ່​ໄດ້​ມາ​ຈາກ​ກາ​ເຟ​ໝາກ​ຊ້ອມ ປົກ​ປ້ອງ​ ເປັນ​ສິນຄ້າ​ຖິ່ນ​ກໍາ​ເນີດ, ທາງ​ກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ​ໂດຍ​ຮ່ວມ​ກັບ​ແຂວງ​ຈໍາ​ປາ​ສັກ​ ຈຶ່ງ​ໄດ້​ຈັດ​ພິທີ ມອບ​-​ຮັບ​ໃບຢັ້ງຢືນ​ຖິ່ນ​ກໍາ​ເນີ​ດ​ຊາ​ປາກ​ຊ່ອງ ແລະ ກາເຟ​ບໍ​ລະ​ເວນ​ຂຶ້ນ​ຢ່າງ​ເປັນ​ທາງ​ການ.

ສະນັ້ນ​ຈຶ່ງ​ສະເໜີ​ໃຫ້​ສະມາຄົມ​ສົ່ງເສີມ​ຊາ​ປາກ​ຊ່ອງ ແລະ ກາເຟ​ບໍ​ລະ​ເວນ ຈົ່ງ​ຮ່ວມ​ແຮງ​ຮ່ວມ​ໃຈ​ກັນ​ຮັກສາ​ຄວາມ​ອຸດົມສົມບູນ​ຂອງ​ລະບົບ​ນິເວດ, ຮັກສາ​ຄຸນ​ນະ​ພາບ​ທີ່​ມີ​ເອກະລັກ​ສະເພາະ ຂອງ​ຊາ​ປາກ​ຊ່ອງ ແລະ ກາເຟ​ບໍ​ລະ​ເວນ, ອະນຸລັກ​ພູມ​ປັນຍາ​ທ້ອງຖິ່ນ​ແບບ​ດັ່ງເດີມ​ໄວ້​ໃຫ້​ຍືນ​ຍົງ ໄປ​ຮອດ​ຄົນ​ຮຸ່ນ​ລູກ ຮຸ່ນ​ຫຼານ​ໃນ​ອະນາຄົດກາຍເປັນ​ແຫຼ່ງ​ທ່ອງ​ທ່ຽວແບບ​ອະນຸລັກ ພ້ອມ​ກັນ​ຂະຫຍາຍ​ສະມາຊິກ​ໃຫ້​ທົ່ວ​ເຖິງ ທັງ​ເອົາໃຈໃສ່​ບໍລິຫານ​ຄຸ້ມ​ຄອງ​ສະມາຄົມ​ໃຫ້​ມີ​ຄວາມ​ເຂັ້ມແຂງ, ໝັ້ນຄົງ ແລະ ຍືນ​ຍົງ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)