ທ່ານ ນາງ ສຸວັນ​ເພັງ ບຸບຜານຸວົງ ລັດຖະມົນຕີ​ປະຈຳ​ສຳນັກງານ​ນາຍົກ ໄດ້​ໃຫ້​ກຽດ​ຕ້ອນຮັບ​ການ​ເຂົ້າ​ຢ້ຽມ​ຂໍ່າ​ນັບ​ອຳ​ລາ ຂອງ​ທ່ານ Jean-Bernard Carrasco ເອກ​ອັກ​ຄະ​ລັດ​ຖະ​ທູດອົສຕຣາ​ລີ ປະຈຳ ສປປ ລາວ ທີ່ຫ້ອງວ່າການ​ສຳນັກງານ​ນາຍົກລັດຖະມົນຕີເມື່ອບໍ່​ດົນ​ຜ່ານ​ມານີ້, ໃນ​ໂອກາດ​ສຳເລັດ​ການ​ປະຕິບັດ​ໜ້າທີ່​ການ​ທູດ ຢູ່ ສປປ ລາວ ໃນ​ໄລຍະ​ປີ 2018-2020.

ໃນ​ໂອກາດ​ດັ່ງກ່າວ, ທ່ານ ນາງ ສຸວັນ​ເພັງ ບຸບຜາ​ນຸ​ວົງ ໄດ້​ສະແດງ​ຄວາມ​ຍິນດີ​ຕ້ອນຮັບ ແລະ ຕີ​ລາຄາ​ສູງ ຕໍ່​ຜົນສຳເລັດ ໃນ​ການ​ປະຕິບັດ​ໜ້າທີ່​ການ​ທູດ ຢູ່ ສປປ ລາວ ຂອງ​ທ່ານ Jean-Bernard Carasco ຊຶ່ງ​ໄດ້​ປະກອບສ່ວນ​ເພີ່ມ​ພູນ​ຄູນ​ສ້າງສາຍ​ພົວພັນ ແລະ ການ​ຮ່ວມ​ມື ລະຫວ່າງ ສປປ ລາວ ແລະ ອົສ​ຕຣາ​ລີ ນັບ​ມື້​ແໜ້ນ​ແຟ້ນ ແລະ ເຕີບ​ໃຫຍ່​ຂະຫຍາຍຕົວ ເປັນ​ກ້າວໆເວົ້າ​ລວມ, ເວົ້າ​ສະເພາະ ແມ່ນ​ສະແດງ​ຄວາມ​ຂອບໃຈ ຕໍ່​ການ​ອຳນວຍ​ຄວາມ​ສະດວກ, ສະໜັບສະໜູນ ແລະ ໃຫ້​ການຊ່ວຍເຫຼືອແກ່ ສປປ ລາວ ໃນ​ຫຼາຍ​ດ້ານຂອງ​ທ່ານ​ເອກ​ອັກ​ຄະ​ລັດ​ຖະ​ທູດ ກໍຄື​ລັດຖະບານ ແຫ່ງ ອົສ​ຕຣາ​ລີ ໃນ​ໄລຍະ​ຜ່ານ​ມາ ໂດຍສະເພາະການ​ສ້າງ​ນິຕິ​ກຳ ໃນ​ຂົງເຂດ​ພະລັງງານ ແລະ ບໍ່​ແຮ່, ການ​ສະໜອງ​ຂໍ້​ມູນ​ຂ່າວສານ, ການ​ຊ່ວຍເຫຼືອ​ທາງ​ດ້ານ​ການ​ສຶກສາ ແລະ ສາທາລະນະ​ສຸກ, ການ​ແກ້​ໄຂ​ບັນຫາ​ຜົນ​ກະທົບ​ຈາກ​ໄພພິບັດ, ການ​ປະກາດ​ໃຫ້ການ​ຊ່ວຍເຫຼືອ​ແກ້​ໄຂ​ບັນຫາ​ການ​ແຜ່​ລະບາດ​ຂອງ​ພະຍາດໂຄ​ວິດ-19 ແລະ ອື່ນໆ.

ນອກຈາກ​ນັ້ນ ຍັງ​ໄດ້​ສະເໜີ ລັດຖະບານ​ອົສ​ຕຣາ​ລີ ໃນ​ການ​ສືບຕໍ່​ໃຫ້​ທຶນ​ການ​ສຶກສາ ແລະ ແລກປ່ຽນ​ຊາວ​ໜຸ່ມ, ນັກ​ສຶກສາລາວ​ -​ ອົສ​​ຕຣາ​ລີ ໃຫ້​ຫຼາຍ​ຂຶ້ນ. ໃນ​ຕອນ​ທ້າຍ ກໍໄດ້​ອວຍພອນ ໃຫ້​ທ່ານ​ເອກ​ອັກ​ຄະ​ລັດ​ຖະ ທູດເດີນທາງ​ກັບ​ປະເທດ​ດ້ວຍ​ຄວາມສະຫວັດດີ​ພາບ ແລະ ສືບຕໍ່​ປະຕິບັດ​ສຳເລັດ​ໜ້າທີ່​ໃໝ່ ທີ່​ຈະ​ໄດ້​ຮັບ​ການ​ມອບ​ໝາຍ ໃນຕໍ່ໜ້າ ໃຫ້​ໄດ້​ຮັບ​ຜົນສຳເລັດ​ເປັນ​ຢ່າງ​ດີ.

ໃນ​ໂອກາດ​ດຽວ​ກັນ, ທ່ານ ເອກອັກ​ຄະ​ລັດ​ຖະ​ທູດໄດ້​ສະແດງ​ຄວາມ​ຂອບໃຈ ຕໍ່​ທ່ານລັດຖະມົນຕີ​ປະຈຳ​ສຳນັກງານ​ນາຍົກ ທີ່​ໄດ້​ໃຫ້​ກຽດ​ຕ້ອນຮັບ​ຢ່າງ​ອົບ​ອຸ່ນ ໃນ​ຄັ້ງ​ນີ້, ລວມ​ທັງການ​ພົວພັນ, ການ​ອຳນວຍ​ຄວາມ​ສະດວກ ແລະ ຊ່ວຍເຫຼືອຕະຫຼອດ​ໄລຍະ​ທີ່​ປະຕິບັດ​ໜ້າທີ່​ການ​ທູດ ຢູ່ ສປປ ລາວ ຂອງ​ທ່ານເອກອັກ​ຄະ​ລັດ​ຖະ​ທູດ ເຮັດ​ໃຫ້​ມີ​ຜົນສຳເລັດ​ຕາມ​ຄາດໝາຍ​ທີ່​ວາງ​ໄວ້.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)