ວັນທີ 7 ຕຸລາ ທຸກປີ ແມ່ນວັນຄູແຫ່ງຊາດຂອງ ສປປ ລາວ ແລະ ຖືເປັນບາງບຸນໃຫຍ່ທົ່ວປະເທດ ເພື່ອສະແດງຄວາມ ຮູ້ບຸນຄຸນຕໍ່ຄູບາ-ອາຈານ ທີ່ໄດ້ອຸທິດເຫື່ອແຮງ ແລະ ສະຕິປັນຍາ ເພື່ອສິດສອນລູກຫລານ, ນັກຮຽນ-ນັກສຶກ ຂອງປະຊາຊົນລາວບັນດາເຜົ່າ ໃຫ້ກາຍເປັນຜູ້ທີ່ມີຄວາມຮູ້, ຄວາມສາມາດ, ເປັນຄົນດີຂອງສັງຄົມ ກໍຄື ເປັນຊັບພະຍາກອນມະນຸດທີ່ມີຄຸນນະພາບ ເພື່ອສືບທອດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃນອານາຄົດ.

ພັກ ແລະ ລັດຖະບານ ເວລາໃດກໍໃຫ້ຄວາມສໍາຄັນ ເອົາໃຈໃສ່ຕໍ່ວຽກງານ ການສຶກສາຄູ ແລະ ຖືເອົາຄູເປັນກົກ ໃນການຍົກສູງຄຸນນະພາບ ຂອງການສຶກສາ ກໍຄື ການພັດທະນາ ຊັບພະຍາກອນມະນຸດ ເພາະຄູມີບົດບາດສໍາຄັນໃນການສ້າງອະນາຄົດໃຫ້ຄົນແຕ່ລະລຸ້ນ ແລະ ໃນພາລະກິດສ້າງ ສາພັດທະນາ ປະເທດຊາດ ໃຫ້ຈະເລີນຮຸ່ງເຮືອງ, ຄູປຽບເໝືອນພໍ່ແມ່ຜູ້ທີສອງ, ຄູ່ເໝືອນດັ່ງແມ່ພີມຂອງຊາດ, ຄູແມ່ນຜູ້ທີ່ມີຄວາມຮູ້, ຄວາມສາມາດ ແລະ ອື່ນໆ. ສະນັ້ນ, ຈຶ່ງສາມາດເວົ້າໄດ້ວ່າ ຄູແມ່ນມີພາລະໜ້າທີ່ ທີ່ໜັກໜ່ວງໃນການສິດສອນ ແລະ ສົ່ງຄວາມຮູ້ໃຫ້ນ້ອງ ນັກຮຽນ-ນັກສຶກສາ ທີ່ເປັນອານາຄົດຂອງຊາດ.

ຍ້ອນແນວນັ້ນ, ການສະເຫລີມສະຫລອງ ວັນຄູແຫ່ງຊາດໃນສົກປີນີ້, ລັດຖະມົນຕີ ກະຊວງສຶກສາທິການ ແລະ ກິລາ ຈຶ່ງໄດ້ອອກແຈ້ງການ ກ່ຽວກັບການສະເຫລີມ ສະຫລອງວັນສໍາຄັນດັ່ງກ່າວ ຄື: ໃຫ້​ຈັດຕັ້ງສະ​ເຫລີ​ມສະຫລອງ​ວັນ​ຄູ​ແຫ່ງ​ຊາດໃນ​ສະຖາບັນ​ການ​ສຶກສາ ​ໂດຍ​ເຊີນ​ຄະນຳ​ຂອງ​ຕົນ, ອົງການ​ປົກ ຄອງ​ທ້ອງ​ຖິ່ນ, ຜູ້​ປະກອບ​ການ, ສະມາຄົມ​ພໍ່​ແມ່ຜູ້​ປົກຄອງ​ນັກຮຽນ-ນັກ​ສຶກສາ, ຄະນະ​ພັດທະນາ​ການ​ສຶກສາ​ຂັ້ນບ້ານ, ຕົວ​ແທນ​ຜູ້​ປົກຄອງ ​ແລະ ນັກຮຽນ-ນັກ​ສຶກສາ​ເຂົ້າຮ່ວມ.

​ໂດຍ​ມີ​ຈຸດປະສົງ​ ເພື່ອ​ເຊີດ​ຊູ​ກຽດ ​ແລະ ຄຸນງາມຄວາມດີ​ຂອງ​ຄູ, ສ້າງ​ຈິດ​ສຳນຶກ​ໃຫ້​ສັງຄົມ, ພໍ່​ແມ່​ຜູ້​ປົກຄອງ, ນັກຮຽນ-ນັກ​ສຶກສາ ​ເຫັນ​ໄດ້​ຄວາມ​ໝາຍຄວາມສຳຄັນ​ຂອງ​ຄູ-ອາຈານ ​ແລະ ​ເອົາ​ໃຈ​ໃສ່​ປະກອບສ່ວນຕໍ່​ການ​ສຶກສາ ​ແລະ ການຄົ້ນຄວ້າ​ຮໍ່າຮຽນຝຶກ​ຝົນ​ຫລໍ່​ຫລອມໃຫ້​ເປັນ​ຄົນ​ດີ​ມີ​ຄວາມ​ຮູ້, ຄວາມ​ສາມາດ ​ແລະ ມີ​ຄຸນສົມບັດ​ສີນ​ທຳ​ປະຕິວັດກາຍ​ເປັນ​ຊັບພະຍາກອນ​ມະນຸດທີ່​ມີ​ຄຸນ​ນະພາ​ບຂອງ​ຊາດ.

ຈັດຕັ້ງການ​ຢ້ຽມຢາມອວຍພອນ​ຄະນະ​ນຳ, ຜູ້​ບໍລິຫານ​ການ​ສຶກສາ ຕາມ​ສຳນັກງານ​ອົງການ ​ແລະ ອະດີດ​ການ​ນຳ ນັກວິຊາການ ຄູ​-ອາ​ຈານ ອາວຸ​ໂສ​ບຳນານ ຕະຫລອດ​ເຖິງ​ຄູ​ສອນ​ ຢູ່​ເຂດ​ຫ່າງ​ໄກ​ສອກຫລີກ ຕາມ​ເງື່ອນ​ໄຂ​ຕົວ​ຈິງ​ຂອງ​ແຕ່​ລະ​ພາກສ່ວນ. ສ້າງ​ຂະ​ບວນການ​ຖາມ-ຕອບ ​ວິທະຍາສາດ, ການ​ແຂ່ງຂັນ​ກິລາ ​ແລະ ສິລະ​ປະ​-ວັນນະຄະດີ ສະທ້ອນ​ໃຫ້​ເຫັນ​ກ່ຽວ​ກັບ ​ມູນ​ເຊື້ອຂອງ​ພັກ​ປະຊາຊົນ​ ປະຕິວັດ​ລາວ​ ໃນ​ການ​ສ້າງ​ຊັບພະຍາກອນ​ມະນຸດ ​ແລະ ການ​ປະກອບສ່ວນ​ຂອງ​ຄູ-ອາຈານ ​ຕໍ່​ວຽກ​ງານ​ດັ່ງກ່າວ​ ຕາມ​ຄວາມ​ສາມາດ​ຕົວ​ຈິງຂອງ​ແຕ່​ລະ​ພາກສ່ວນ.

ສຳລັບ​ວິທະຍາ​ໄລ ​ແລະ ສະຖານ​ການ​ສຶກສາ​ຊັ້ນສູງ ​ໃຫ້​ຈັດ​ສຳ​ມະ​ນາ​ລະດົມ ​ແນວ​ຄິດ​ການ​ພັດ ທະນາ​ກາ​ນສຶກສາຄູ ກໍ​ຄື​ ການ​ພັດທະນາ​ຊັບພະຍາກອນ​ມະນຸດ ​ໃນ​ສະພາບ​ການລະບາດ​ ຂອງ​ພະຍາດ​ໂຄ​ວິດ-19, ການ​ປ່ຽນ​ແປງ​ໂຄງ​ສ້າງ ​ຂອງ​ຄວາມ​ຕ້ອງການ​ແຮງ​ງານ ​ໃນ​ອະນາຄົດ, ການ​ປັບປຸງ​ຄຸນ​ນະພາ​ບ ການ​ສຶກສາ​ໃນ​ຕົວ​ເມືອງ ​ແລະ ຊົນນະບົດ. ພ້ອມທັງ​ໃຫ້​ປະຕິບັດ​ຕາມ​ແຈ້ງ​ການ ​ແລະ ຄຳ​ແນະນຳ​ຂອງ​ລັດຖະບານ ​ແລະ ຄະນະ​ສະ​ເພາະ​ກິດ​ ເພື່ອ​ປ້ອງ​ກັນ ​ແລະ ຄວບ​ຄຸມ​ການລະບາດ ​ຂອງ​ພະຍາດ​ອັກ​ເສບ​ປອດ ​ຈາກ​ເຊື້ອຈຸລະ​ໂລກ​ສາຍ​ພັນ​ໃໝ່ ​ແຕ່ລະ​ຂັ້ນຢ່າງ​ເຂັ້ມງວດ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)