(ພາບປະກອບ)

ເພື່ອເປັນການປະກອບສ່ວນສ້າງບັນຍາກາດ ໃຫ້ງານບຸນອອກພັນສາ ປະວໍລະນາ ປະຈຳປີ 2020 ມີຄວາມໝາຍເລິກເຊິ່ງ ສົ່ງເສີມການທ່ອງທ່ຽວພາຍໃນ ແລະ ມີຄວາມເບີກບານມ່ວນຊື່ນຖືກຕ້ອງຕາມປະເພນີອັນດີງາມ ທີ່ເປັນມູນເຊື້ອຂອງປະຊາຊົນລາວ ທີ່ເຄີຍປະຕິບັດສືບທອດປະກັນມາແຕ່ບູຮານນະການ ແລະ ເພື່ອເປັນການປະຕິບັດນະໂຍບາຍຂອງພັກ-ລັດ ທີ່ວາງອອກ ໃນການສົ່ງເສີມການຜະລິດສິນຄ້າ ແລະ ເພື່ອເປັນການສົ່ງເສີມ ,ໂຄສະນາ,ວາງສະແດງ ແລະ ຈຳໜ່າຍສິນຄ້າ ເພື່ອສ້າງຕາໜ່າງຜະລິດຕະພັນພາຍໃນນະຄອນຫຼວງວຽງຈັນໃຫ້ນັບມື້ຂຶ້ນເທື່ອລະກ້າວ ,ດັ່ງນັ້ນ ທ່ານ ບຸນໜາ ຜາທຸມມະວົງ ເຈົ້າເມືອງຈັນທະບູລີ ປະທານ ຄະນະກຳມະການຈັດງານບຸນອອກພັນສາ ປະວໍລະນາ ປະຈຳປີ 2020 ທີ່ທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ ອອກລະບຽບວ່າດ້ວຍຂໍ້ຫ້າມມີດັ່ງນີ້:

1. ຫ້າມບໍ່ໃຫ້ມີການໂຄສະນາທຸກຮູບແບບ ທີ່ຜິດຕໍ່ກົດໝາຍຂອງ ສປປ ລາວ.

2. ຫ້າມຂາຍ ຫຼື ນໍາເອົາອາວຸດທຸກປະເພດ ລວມທັງ: ຟ້າ, ມີດ, ງ້າວ, ໜ້າເກັກ, ກະຖຸນ, ສະໜັບມື, ໂຄມໄຟລອຍ ແລະ ປະເພດມີຄົມຕ່າງໆ ເຂົ້າໄປໃນງານໂດຍເດັດຂາດ ເວັ້ນເສຍແຕ່ເຈົ້າໜ້າທີ່ ທີ່ໄດ້ຮັບອະນຸຍາດ.

3. ຫ້າມນໍາເອົາຢາເສບຕິດ, ທາດເບື່ອ, ສານເຄມີທີ່ອອກລິດທາງປະສາດທຸກຊະນິດ, ສິ່ງທີ່ພາໃຫ້ເກີດສຽງດັງເກີນຂອບເຂດ ເຊັ່ນ:ກະໂພກ ເຂົ້າມາຈູດ ເເລະ ວາງຂາຍພາຍໃນງານຢ່າງເດັດຂາດ.

4. ຫ້າມນໍາເອົາຜະລິດຕະພັນທີ່ລອກແບບສິ້ນລາວ ຫຼື ເຄື່ອງນຸ່ງລາວ ນໍາເອົາມາຂາຍ-ຈໍາໜ່າຍ ພາຍໃນງານ ຢ່າງເດັດຂາດ.

5. ຫ້າມວາງ, ຂາຍເຄື່ອງ ແລະ ນໍາເຄື່ອງສຽງອອກມາໂຄສະນາສິນຄ້າ ຢູ່ນອກບໍລິເວນຮ້ານ ເກີນຂອບເຂດ ທີ່ຄະນະກໍາມະການຈັດງານ ໄດ້ກໍານົດໃຫ້.

6. ຫ້າມຂາຍ ແລະ ນໍາເອົາຜະລິດຕະພັນ ວັດທະນະທໍາລາມົກເຊັ່ນ: ແຜ່ນຊີດີ ( CD , DVD ) ລາມົກ ແລະ ຮູບພາບລາມົກຕ່າງໆ ເຂົ້າມາວາງຂາຍຢູ່ໃນງານຢ່າງເດັດຂາດ.

7. ຫ້າມຫຼິ້ນການພະນັນທຸກປະເພດ ແລະ ອາລະວາດ ຕີກັນ ຢ່າງເດັດຂາດ.

8. ຫ້າມຂາຍເຄື່ອງຊະຊາຍໂດຍບໍ່ໄດ້ຮັບອະນຸຍາດ ຈາກຄະນະກໍາມະການຈັດງານຕະຫຼາດນັດ, ງານບຸນອອກພັນສາ ປະວໍລະນາ ປະຈໍາປີ 2020 ທີ່ທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ.

9. ຫ້າມດື່ມສິ່ງມຶນເມົາເກີນຂອບເຂດ ຖ້າຜູ້ໃດລະເມີດ ຈະຖືກເຈົ້າໜ້າທີ່ກ່າວເຕືອນ ຫຼື ນໍາຕົວໄປພັກຜ່ອນໄວ້ກ່ອນ.

10. ຫ້າມບຸກຄົນ, ນິຕິບຸກຄົນ, ສໍານັກງານ ອົງການປົກຄອງບ້ານກີດຂວາງ ການຈັດສັນສະຖານທີ່ວາງສະແດງຂາຍສິນຄ້າ ຂອງຄະນະກໍາມະການຈັດງານຕະຫຼາດນັດ.

11. ຫ້າມຕອກເຫຼັກ ຫຼື ສິ່ງຂອງຕ່າງໆ ໃສ່ພື້ນທີ່ຢ່າງເດັດຂາດ.

12. ຫ້າມແຈກຢາຍ ແຜ່ນພັບ ຫຼື ແຜ່ນເຈ້ຍໂຄສະນາສິນຄ້າຕ່າງໆ ຢູ່ພາຍໃນງານບຸນ.

13. ຫ້າມຜູ້ສໍາປະທານສະຖານທີ່ງານບຸນ ມອບສະຖານທີ່ໃຫ້ແກ່ຜູ້ສໍາປະທານອື່ນຈັບຈອງຕໍ່ເດັດຂາດ.

14. ຫ້າມມີການໂຄສະນາສິນຄ້າ ໂດຍການເຕັ້ນໂຊ ນາງສາວ ແລະ ບໍ່ໃຫ້ມີ ມິນິຄອນເສີດ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)