ເພື່ອເປັນການສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ຄັ້ງທີ XI ຂອງສູນກາງພັກ, ວັນຊາດທີ 2 ທັນວາຄົບຮອບ 45 ປີກໍ່ຄືວັນຄູແຫ່ງຊາດວັນທີ 7 ຕຸລາທີ່ຈະມາເຖິງນີ້, ທ່ານນາງ ຈັນຄຳໃບກອງມະນີວົງ ຜູ້ອຳນວຍການໂຮງຮຽນອະນຸບານສຶກສາ ( ກະຊວງສຶກສາທິການ ແລະ ກິລາ ) ໄດ້ໃຫ້ສຳພາດຜ່ານສື່ມວນຊົນໃນໂອກາດວັນສຳຄັນດັ່ງກ່າວວ່າ: ໂຮງຮຽນອະນຸບານສຶກສາໄດ້ຮັບການສ້າງຕັ້ງໃນເດືອນກັນຍາ ປີ 1976 ນັບແຕ່ມື້ສ້າງຕັ້ງຈົນເຖິງປັດຈຸບັນເປັນເວລາ 40 ປີທີ່ຂັ້ນເທິງກໍ່ຄືພະນັກງານຄູ-ອາຈານໄດ້ເອົາໃຈໃສ່ເຫັນຄວາມສຳຄັນຂອງການສຶກສາກ່ອນໄວຮຽນ ເພື່ອເປັນການສ້າງພື້ນຖານກຽມສູ່ການເຂົ້າຮຽນຂັ້ນປະຖົມ.

ທ່ານຜູ້ອຳນວຍການໂຮງຮຽນກ່າວໃຫ້ຮູ້ອີກວ່າ: ການຮຽນ-ການສອນຂອງພວກເຮົາໄດ້ຕິດພັນກັບຂະບວນການຮັກຊາດ ແລະ ພັດທະນາ ຊຶ່ງສະແດງອອກຜ່ານວິໄສທັດທີ່ວ່າ: ບໍລິການດີມີຈັນຍາບັນ ແລະ ມີຄຸນນະພາບ ພັດທະນາບົດບາດເປັນໂຮງຮຽນຕົວແບບ ສຶກສາທຸກຮູບແບບ ວຽກງານການສຶກສາໄດ້ມາດຕະຖານສາກົນ ທຸກຄົນພໍໃຈ ສິ່ງແວດລ້ອມສົດໃສ ສະອາດງາມຕາ, ພາຍໄຕ້ການຊີ້ນໍາໆພາອັນສະຫຼາດສ່ອງໃສຂອງພັກມາເຖິງທຸກວັນນີ້ເຮັດໃຫ້ຂະແໜງການສຶກສາມີການພັດທະນາໃນຫຼາຍດ້ານທຽບໃສ່ 40 ປີກ່ອນ, ເວົ້າສະເພາະເດັກກ່ອນໄວຮຽນກໍມີການພັດທະນາຫຼັກສູດໃໝ່ຈາກ 36 ໜ່ວຍມາເປັນ 8 ໜ່ວຍການຮຽນ-ການສອນເຮັດໃຫ້ເດັກມີຄວາມຮັບຮູ້ໄດ້ດີຂຶ້ນມີຄູ່ມື, ມີປື້ມຝຶກຫັດ ໃຫ້ເດັກໄດ້ຝຶກຄວາມສາມາດຢ່າງມີຄຸນນະພາບ, ສຳລັບປີນີ້ທາງໂຮງຮຽນມີຈຳນວນນັກຮຽນທັງໝົດ 318 ຄົນ, ຍິງ 154 ຄົນ, ມີພະນັກງານຄູສອນ 34 ຄົນ, ຍິງ 27 ຄົນ, ມີຫ້ອງຮຽນອະນຸບານທັງໝົດ 8 ຫ້ອງ ແລະ ລ້ຽງເດັກ 5 ຫ້ອງ, ເພື່ອເປັນການລະນຶກ ແລະ ສະແດງຄວາມກະຕັນຍູຮູ້ບຸນຄຸນຕໍ່ຄູ ເນື່ອງໃນໂອກາດວັນຄູແຫ່ງຊາດທີ່ຈະມາເຖິງນີ້, ທ່ານຍັງໄດ້ຕາງໜ້າໃຫ້ພະນັກງານຄູ-ອາຈານກ່າວສະແດງທັດສະນະບາງຕອນສຳຄັນວ່າ: ຄໍາວ່າຄູມີຄວາມໝາຍຄວາມສຳຄັນຫຼາຍເພາະຄູແມ່ນຜູ້ຖ່າຍທອດຄວາມຮູ້ໃຫ້ຜູ້ອື່ນ, ຄູແມ່ນແມ່ພິມຂອງຊາດ, ຄູອະນຸບານແມ່ນແມ່ຜູ້ທີສອງຂອງເດັກ, ຄູແມ່ນມີກຽດທີ່ສຸດ ເພາະເປັນບຸກຄົນທີ່ມີຫຼາຍຄົນນັບຖື.

ດັ່ງນັ້ນເພື່ອຕ້ອນ ຮັບວັນສຳຄັນດັ່ງກ່າວທາງໂຮງຮຽນໄດ້ມີການກະກຽມຝຶກແອບບົດເພງ, ບົດຟ້ອນ, ກິລາຈຳນວນໜຶ່ງ ເພື່ອຕ້ອນຮັບວັນຄູ ຊຶ່ງຈະມີການສະເຫຼີມສະຫຼອງໃນວັນທີ 6 ຕຸລານີ້, ເປົ້າໝາຍເພື່ອປູກຈິດໃຈສຳນຶກໃຫ້ເດັກເຫັນຄວາມສຳຄັນຂອງຄູ ແລະ ເປັນການເປີດໂອກາດໃນການສະແດງອອກເຖິງຄວາມສາມາດຂອງເຂົາເຈົ້າຊຶ່ງທາງໂຮງຮຽນໄດ້ເຫັນຄວາມສຳຄັນ ແລະ ຖືເດັກເປັນຈຸດໃຈກາງໃນການຮຽນ-ການສອນຄວບຄູ່ໄປກັບກິດຈະກຳການຫຼິ້ນສອດແຊກໃຫ້ກັບເດັກຮຽນ ເພື່ອສະແດງທັກສະຂອງເດັກ ຊຶ່ງໃນໄລຍະ 1 ປີຜ່ານມາທາງໂຮງຮຽນໄດ້ສົ່ງນັກຮຽນໄປເຂົ້າສູ່ປະຖົມໄດ້ 70 ຄົນ, ມີພະນັກງານຄູດີເດັ່ນຂັ້ນກະຊວງ 24 ຄົນ, ຊາຍ 2 ຄົນ,ໄດ້ປະດັບປະດາຫ້ອງຮຽນ ຈັດມູມປະສົບການໃຫ້ເດັກໄດ້ເຂົ້າຮຽນໃຫ້ເໝາະສົມກັບຊໍ່າອາຍຸ, ສົ່ງຜົນງານທີ່ເປັນລາຍມືຂອງເດັກໃຫ້ຜູ້ປົກຄອງເບິ່ງ, ສິ່ງທີ່ພວກເຮົາຈະຕ້ອງໄດ້ປັບປຸງໃນຕໍ່ໜ້າຄືເດັກທຸກຄົນຕ້ອງເຂົ້າຮຽນໃນໂຮງຮຽລະດັບອະນຸບານ ຈຶ່ງມີພື້ນຖານ ເພື່ອກຽມຄວາມພ້ອມເຂົ້າສູ່ໂຮງຮຽນປະຖົມ ສິ່ງສຳຄັນອຸປະກອນການຮຽນ-ການສອນຕ້ອງໃຫ້ຄົບກັບຈຳນວນນັກຮຽນ ບົດເພງສຳລັບອະນຸບານ-ລ້ຽງເດັກໃຫ້ມີຫຼາກຫຼາຍ ແຕ່ພວກເຮົາກໍ່ຍັງມີສິ່ງທ້າທາຍໃນການແຈກຢາຍປື້ມສຳລັບການຮຽນ-ການສອນເດັກເຫັນວ່າຍັງຊັກຊ້າ ບໍ່ທັນກັບຄວາມຕ້ອງການຂອງເດັກ, ຕໍ່ກັບມາດຕະການປ້ອງກັນພະຍາດໂຄວິດ-19 ທາງໂຮງຮຽນໄດ້ມີການເອົາໃຈ ໃສ່ໂຄສະນາໂດຍໄດ້ມີການວັດແທກອຸນຫະພູມ, ໃສ່ເຈວລ້າງມື, ໃສ່ຜ້າປິດປາກ-ດັງ ແລະ ອື່ນ ໆ ເພື່ອສະກັດກັ້ນບໍ່ ໃຫ້ມີການຕິດເຊື້ອ ແລະ ແຜ່ລະບາດເກີດຂຶ້ນ.

ສຳລັບຄູຍຸກໃໝ່ຕ້ອງໄດ້ເອົາໃຈໃສ່ສ້າງຕົນເອງຄື ຕ້ອງໝັ່ນຊອກຮູ້ຮໍ່າຮຽນນຳສື່ສານໂຄສະນາຕ່າງໆປັບປຸງຕົນເອງໃຫ້ເໝາະສົມ ບຸກຄະລິກຕ້ອງວາງຖືກຕ້ອງ, ປະຕິບັດໂມງເວລາຖືກຕ້ອງໃນການຈັດ ການຮຽນ-ການສອນ, ຢຶດຖືຈັນຍາບັນຂອງຄູໃຫ້ດີປະຕິບັດໃຫ້ຖືກຕ້ອງ, ຄູສອນເດັກກ່ອນໄວຮຽນຕ້ອງເປັນຄົນມີລັກສະນະຜ່າເຜີຍ, ມີຈິດໃຈດີງາມ, ອ່ອນນ້ອມ, ຮັກເດັກຄືລູກຂອງຕົນເອງ, ພ້ອມນີ້ຕ້ອງເປັນຄົນທີ່ມີຄວາມຮູ້ທາງດ້ານວິຊາສະເພາະຢ່າງແນ່ນອນເພື່ອຊຸບຫຼໍ່ກໍ່ສ້າງເດັກໃຫ້ເປັນຜູ້ໃຫຍ່ທີ່ມີຄຸນນະພາບ.

ໃນໂອກາດນີ້ຂ້າພະເຈົ້າຂໍຕາງໜ້າໃຫ້ຄູທັງໝົດອວຍພອນໄຊໃຫ້ຄູໃນໂຮງຮຽນກໍຄືຄູທົ່ວປະເທດຂໍໃຫ້ທ່ານທັງຫຼາຍມີສຸຂະພາບແຂງແຮງ ມີຄວາມສຸກ ມີພະລານາໄມດີ ປະຕິບັດໜ້າທີ່ໃຫ້ສຳເລັດ ສົມກັບໄດ້ນາມມະຍົດວ່າຄູ ຄູແມ່ນແມ່່ພິມຂອງຊາດ, ນໍ້າໃຈວັນຄູແຫ່ງຊາດ 7 ຕຸລາໝັ້ນຍືນ.

Medialaos MMD (ແຫູ່ງຂໍ້ມູນຈາກ: ໜັງສືພິມ ປະຊາຊົນ)