2 ສະຖາບັນການເງິນຈຸລະພາກ ແຂວງຫຼວງພະບາງ ເປີດການບໍລິການຜ່ານລະບົບທະນາຄານ

0
65

ວັນທີ 1 ກັນຍາ 2020 ຜ່ານມາທີ່ຫ້ອງປະຊຸມຂອງທະນາຄານພັດທະນາລາວ ໄດ້ມີພິທີເຊັນສັນຍາວ່າດ້ວຍການບໍລິການຜ່ານລະບົບທະນາຄານ ຂອງສະຖາບັນການເງິນຈຸລະພາກທີ່ຮັບເງິນຝາກສິນຊັບເມືອງ  ເໜືອຈຳກັດ ແລະ ສະຖາບັນການເງິນຈຸລະພາກທີ່ຮັບເງິນຝາກຈຳປາລາວ ກັບ ທະນາຄານພັດທະນາລາວສາຂາແຂວງຫຼວງພະບາງ ໂດຍ ທ່ານ ສົມແພງ ລັດຕະນະວົງ ຫົວໜ້າທະນາຄານພັດທະນາລາວ ສາຂາແຂວງຫຼວງພະບາງ ພ້ອມດ້ວຍອຳນວຍການ, ຫົວໜ້າຂະແໜງ ແລະ ພະນັກງານທັງສາມຝ່າຍເຂົ້າຮ່ວມ. ພິທີ ທ່ານ ສົມແພງ ລັດຕະນະວົງ ໄດ້ກ່າວວ່າ: ການເຊັນບົດບັນທຶກຄັ້ງນີ້ເປັນການສ້າງບົດບາດການຮ່ວມມື ລະຫວ່າງທະນາຄານພັດທະນາລາວ ກັບຂົງເຂດສະຖາບັນການເງິນຈຸລະພາກ, ດ້ວຍການນໍາເອົາເຕັກໂນໂລຊີ ທີ່ທັນສະໄໝເຂົ້າໃນການບໍລິການປະກອບສ່ວນໝູນໃຊ້ເຂົ້າໃນວຽກງານ, ການຄຸ້ມຄອງພະນັກງານ ແລະ ການຊໍາລະສິນເຊື່ອ ສໍາລັບລູກຄ້າຂອງສະບັນການເງິນຈຸລະພາກ, ເປັນຕົ້ນແມ່ນການໃຫ້ບໍລິການຝາກ-ຖອນ ໃຫ້ແກ່ລູກຄ້າທະນາຄານພັດທະນາລາວ ແນໃສ່ສ້າງຄວາມສະດວກໃຫ້ແກ້ພະນັກງານ ແລະ ລູກຄ້າຂອງແຕ່ລະຝ່າຍ ໃຫ້ສາມາດດຳເນີນທຸລະກຳທາງດ້ານການ ເງິນໄດ້ສະດວກວ່ອງໄວ ແລະ ເຂົ້າມາໃຊ້ບໍລິການຫຼາຍຂື້ນ, ປະກອບສ່ວນກະຕຸກຊຸກຍູ້ປະຊາຊົນ ຫັນໄປສູ່ການນໍາໃຊ້ລະບົບເອເລັກໂຕຼນິກທີ່ທັນສະໄໝໃນການຊຳລະສະສາງຫຼາຍຂື້ນ ຕາມແນວທາງນະ ໂຍບາຍຂອງພັກ-ລັດວາງອອກ, ທັງຮັບປະກັນຄວາມຖືກຕ້ອງ, ວ່ອງໄວ ແລະ ປອດໄພ.

ຫົວໜ້າທະນາຄານພັດທະນາລາວ ສາຂາແຂວງຫຼວງພະບາງ ກ່າວຕື່ມວ່າ: ຜ່ານມາມະນາຄານພັດທະນາລາວ ໄດ້ເປີດໂຕຜະລິດຕະພັນໃໝ່ຈຳນວນໜື່ງ ສຳລັບການຮ່ວມມືກັບສະຖາບັນການເງີນຈຸລະພາກ ປະກອບມີ ການໂອນເງິນເດືອນພະນັກງານ ຜ່ານລະບົບຂອງທະນາຄານພັດທະນາລາວ, ການເປີດບັນຊີ ແລະການອອກບັດ ເອທີເອັມ ໃຫ້ລູກຄ້າຂອງສະຖາບັນການເງິນ, ການບໍລິການຊຳລະສີນເຊື່ອ ຈາກລູກຄ້າຂອງສະຖາບັນຜ່ານຊ່ອງທາງປ່ອງບໍລິການ ໂອໂຕດີບິດ ແລະ ແອວດີບີ ເທີດ, ທັງເປັນຕົວແທນຝາກ-ຖອນເງິນ ຂອງທະນາຄານພັດທະນາລາວ ຕື່ມອີກ.

ພິທີ ລົງນາມເຊັ່ນບົດບັນທຶກໃນຄັ້ງນີ້ໂດຍຊອງໜ້າຜູ້ເຂົ້າຮ່ວມເປັນສັກຂີພະຍານ ລະຫວ່າງ ທ່ານ ສົມແພງ ລັດຕະນະວົງ ຫົວໜ້າທະນາຄານພັດທະນາລາວ ສາຂາແຂວງຫຼວງພະບາງ, ທ່ານ ສັນຕິ ອູ່ສິດທິເດດ ອຳນວຍການສະຖາບັນການເງິນຈຸລະພາກທີ່ຮັບເງິນຝາກສິນຊັບເມືອງເໜືອ ຈຳກັດ ແລະ ທ່ານ ສຸພົນ ຣາຊພົນ ອຳນວຍການກັບສະຖາບັນການເງິນຈຸລະພາກທີ່ຮັບເງິນຝາກຈຳປາລາວ ໄດ້ຮ່ວມກັນ.

ຂ່າວ: ແຫຼ້ ສຸລີນພອນ