ພິທີເຊັນສັນຍາສໍາປະທານທີ່ດິນລັດ ຢູ່ບ້ານໂຄກສະຫວ່າງ ເມືອງຈອມເພັດ ຂອງກຸ່ມບໍລິ ສັດ ຫລວງຈະເລີນຟາມ ຈັດຂຶ້ນໃນວັນທີ 29 ກັນຍາ 2020, ຢູ່ພະແນກແຜນການ ແລະ ການລົງທຶນແຂວງຫລວງພະບາງ,​ ໂດຍມີ ທ່ານ ສຸກັນ ບຸນຍົງ ຮອງເຈົ້າແຂວງຫລວງພະບາງ ພ້ອມດ້ວຍຕາງໜ້າພະແນກການກ່ຽວຂ້ອງ ແລະ ຜູ້ພັດທະນາໂຄງການເຂົ້າຮ່ວມ.

ໂຄງການພັດທະນາ ກະສິກໍາຄົບວົງຈອນ ເພື່ອຜະລິດເປັນສິນຄ້າ ເພື່ອຈໍາໜ່າຍພາຍໃນ ແລະ ສົ່ງອອກຕ່າງປະເທດ ເປັນການຮ່ວມມືພັດທະນາ ລະຫວ່າງ ກຸ່ມບໍລິສັດ ຫລວງຈະເລີນຟາມ ແລະ ອົງການປົກຄອງແຂວງຫລວງພະບາງ ຕັ້ງຢູ່ບ້ານໂຄກສະຫວ່າງ ເມືອງຈອມເພັດ ຫ່າງຈາກເທດສະບານເມືອງປະ ມານ 4 ກິໂລແມັດ ແລະ ຫ່າງຈາກເສັ້ນທາງຫລວງແຫ່ງຊາດ ເລກທີ່ 4B ອີກ 4 ກິໂລແມັດ, ໂດຍໄດ້ຮັບການອານຸມັດ ຈາກອົງການປົກຄອງແຂວງຕາມລະບຽບ ແລະ ກົດໝາຍການລົງທືນຂອງລັດ. ມີເນື້ອທີ່ສໍາປະທານຈໍານວນ 150 ເຮັກຕາ, ມີອາຍຸການສໍາປະທານ 30 ປີ, ເລີ່ມແຕ່ມື້ເຊັນສັນຍາເປັນຕົ້ນໄປ ເປັນການລົງທຶນເອກະຊົນພາຍໃນ 100%. ເບື້ອງຕົ້ນບໍລິສັດ ຈະສ້າງເສັ້ນທາງປູຢາງ ເຂົ້າຫາພື້ນທີ່ພັດທະ ນາໂຄງການ ກວ້າງ 7 ແມັດ ພ້ອມທັງຕິດຕັ້ງເສົາໄຟ, ຄວາມຍາວ 4 ກິໂລແມັດ ໃຫ້ສໍາເລັດພາຍໃນ 6 ເດືອນ. ຈາກນັ້ນ, ຈະສ້າງຕັ້ງຟາມງົວ, ປູກຕົ້ນໄມ້ໃຫ້ໝາກ, ພັດທະນາກະສິກໍາສະອາດ ແລະ ສ້າງສູນສຶກສາ ຮຽນຮູ້ດ້ານກະສິກໍາ, ໂດຍເນັ້ນໃສ່ການພັດທະນາ ກະສິກໍາຄົບວົງຈອນ ເພື່ອຜະລິດເປັນສິນຄ້າ ຈໍາໜ່າຍພາຍໃນ ແລະ ສົ່ງອອກ ລວມມູນຄ່າການພັດທະນາໂຄງການ 44 ລ້ານໂດລາສະຫະລັດ.

ໂອກາດນີ້, ທ່ານຮອງເຈົ້າແຂວງຫລວງພະບາງ ໄດ້ມີຄຳເຫັນ ເນັ້ນໃຫ້ຜູ້ພັດທະນາໂຄງການ ປະ ສານສົມທົບກັບທຸກພາກສ່ວນທີ່ກ່ຽວຂ້ອງ ເພື່ອສຸມໃສ່ບັນດາໜ້າວຽກທີ່ໄດ້ວາງແຜນໄວ້ ແນໃສ່ປະກອບ ສ່ວນການພັດທະນາ ແຂວງຫລວງພະບາງ ໃຫ້ນັບມື້ນັບດີຂື້ນ. ຮ່ວມລົງນາມໃນສັນຍາ ຝ່າຍອົງການປົກ ຄອງ ແຂວງຫລວງພະບາງ ຕາງໜ້າໂດຍ ທ່ານ ນາງ ສີລີພອນ ສຸພັນທອງ ຫົວໜ້າພະແນກແຜນການ ແລະ ການລົງທືນແຂວງ, ຝ່າຍກຸມບໍລິສັດ ສຳປະທານຕາງໜ້າໂດຍ ທ່ານ ວິລະເດດ ໂຄຕິເສນ ປະທານກຸ່ມບໍລິສັດ ຫລວງຈະເລີນ ໂດຍຊ່ອງໜ້າ ພາກສ່ວນກ່ຽວຂ້ອງ ຜູ້ເຂົ້າຮ່ວມເປັນສັກຂີພິຍານ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)