ໃນວັນທີ 5 ຕຸລາ 2020, ລັດວິ​ສາ​ຫະກິດ​ໄຟຟ້າ​ລາວ ຮ່ວມ​ກັບ ກະຊວງ​ພະລັງງານ ​ແລະ ບໍ່​ແຮ່ ​ແລະ ພາກສ່ວນ​ກ່ຽວຂ້ອງ ຈັດ​ເວທີ ​ເສວະນາ ​ເພື່ອ​ປຶກສາ​ຫາລື, ​ແລກປ່ຽນ​ຄຳ​ຄິດ​ຄຳ​ເຫັນ ກ່ຽວກັບໂຄງສ້າງລາຄາໄຟຟ້າ ສະບັບ​ປັບປຸງ​ໃໝ່ 2021-2025, ໂດຍ​ໄດ້ເຊື້ອເຊີນ​ເອົາທຸກພາກ ສ່ວນທີ່ມີຄວາມສົນໃຈ ກ່ຽວ​ກັບລາຄາໄຟຟ້າ ​ໃຫ້ສາມາດອອກຄໍາຄິດ, ຄຳເຫັນ, ​ແລກປ່ຽນ​ບົດຮຽນ ຢ່າງ​ກົງ​ໄປ​ກົງ​ມາ ແບບສ້າງສັນ ແລະ ຢ່າງມີວິທະຍາສາດ.

​​ໃນ​ເວທີເສວະນາໃນ​ຄັ້ງ​ນີ້, ​ນັກ​ເສວະນາ​ກອນ ຢູ່ເທິງເວທີ​ ປະກອບ​​ມີ​ ທ່ານ ສາຍທອງ ແກ້ວດວງດີ ຄະນະປະຈໍາສະພາແຫ່ງ, ປະທານກໍາມະທິການກົດໝາຍ, ທ່ານ ດາວ​ວົງ ພອນ​ແກ້ວ ຮອງ​ລັດຖະມົນ​ຕີ ກະຊວງ​ພະລັງງານ ​ແລະ ບໍ່​ແຮ່, ທ່ານ ຈັນທະ​ບູນ ສຸກ​ອາ​ລຸນ ຜູ້ອຳນວຍການ​ໃຫຍ່ລັດວິ​ສາ​ຫະກິດ​ໄຟຟ້າ​ລາວ, ທ່ານ ພູ​ເພັດ ​ກ້ຽວພິລາ​ວົງ ຄະນະບໍດີ​ຂອງ​ຄະນະ ​ເສດຖະສາດ ​ແລະ ບໍລິຫານ​ທຸລະ​ກິດ  ​ແລະ ທ່ານ ທະ​ນົງ​ສິນ ກັນລະຍາ​ ຮອງ​ປະທານ​ສະພາ​ການ​ຄ້າ ​ແລະ ອຸດສາຫະກຳ ​ແຫ່ງ​ຊາດ​ລາວ, ​ໂດຍ​ມີ ພະນັກງານອາວຸໂສ ແລະ ບັນດາຄູ-ອາຈານ, ນັກຮຽນ-ນັກສຶກສາ ​ເຂົ້າ​ຮ່ວມ.

ໂອກາດ​ດັ່ງກ່າວ, ທ່ານ ດາວ​ວົງ ພອນ​ແກ້ວ ກ່າວ​ວ່າ: ການເສວະນາ​ໃນຄັ້ງນີ້ ແມ່ນສືບເນື່ອງຈາກ ການທີ່ລັດຖະບານ ໄດ້ມີທິດຊີ້ນໍາ ໃຫ້ກະຊວງ ພະລັງງານ ແລະ ບໍ່ແຮ່ ຮ່ວມກັບໄຟຟ້າລາວ ໃຫ້ມີການຄົ້ນຄວ້າ ຮູບແບບຕ່າງໆ ກ່ຽວກັບໂຄງສ້າງລາຄາໄຟຟ້າ ແລ້ວນໍາໄປອະທິບາຍ ທາບທາມຄໍາຄິດເຫັນ ຈາກປະຊາຊົນທຸກຊັ້ນຄົນ ເພື່ອສັງລວມ ເອົາບັນດາຂໍ້ສະ​ເໜີ ລາຍງານຕໍ່ລັດຖະບານ.

​ໂດຍ​ມີຈຸດປະສົງ ​ເພື່ອສົ່ງເສີມບັນດາ ນະໂຍບາຍຂອງລັດຖະບານ ຂອງການພັດທະນາ ດ້ານເສດຖະກິດ, ຢາກໃຫ້ປະຊາຊົນລາວ ເຮັດການຜະລິດ ເປັນສິນຄ້າເພີ່ມຂຶ້ນ ຈະແມ່ນລະດັບຈຸນລະພາກ ຂະໜາດນ້ອຍ ຫລື ເປັນອຸດສາຫະກໍາປຸງ ແຕ່ງປະເພດຕ່າງໆ. ສໍາຄັນແມ່ນໃຫ້ສາມາດ ແຂ່ງຂັນໄດ້, ຢາກໃຫ້ມີການນໍາໃຊ້ ໄຟຟ້າໃນປະເທດໃຫ້ຫລາຍຂຶ້ນ, ຫລຸດຜ່ອນການສົ່ງອອກ ວັດຖຸດິບ ທີ່ບໍ່​ໄດ້​ຮັບ​ການ​ປຸງ​ແຕ່ງ ​ເພື່ອ​ໃຫ້​ເກີດ​ມູນ​ຄ່າ​ເພີ່ມ​ ເປັນ​ຫລາຍ​ເທົ່າ, ໃຫ້ສາມາດດຶງດູດ ການລົງທຶນຕ່າງປະເທດໃຫ້ໄດ້ຫລາຍໆ, ໃຫ້ ຟຟລ ຍັງສາມາດສືບຕໍ່ ດໍາເນີນທຸລະກິດ ມີຜົນກໍາໄລ ຮັບປະກັນການ ສະໜອງໄຟຟ້າ ດ້ວຍຄຸນນະພາບ, ເປັນແບບຢ່າງນໍາໜ້າ ໃນການດໍາເນີນທຸລະກິດ.

Medialaos MMD (ແຫູ່ງຂໍ້ມູນຈາກ: ສຳນັກຂ່າວສານປະເທດລາວ)