ສົ່ງເສີມເຊີດຊູບົດບາດ ແລະ ກຽດສັກສີ ຂອງ ຄູ-ອາຈານ ໃຫ້ສູງຂຶ້ນ

0
36

(ພາບປະກອບ)

ໃນວັນທີ 6 ຕຸລາ 2020 ພະແນກສຶກສາທິການ ແລະ ກິລາ ນະຄອນຫລວງວຽງຈັນ, ໄດ້ຈັດພິທີສະເຫລີມ, ສະຫລອງວັນຄູແຫ່ງຊາດ ຄົບຮອບ 26 ປີ (7/10/1994 – 7/10/2020) ເພື່ອປຸກລະດົມຈິດໃຈ ໃຫ້ທົ່ວສັງຄົມໄດ້ສະແດງ ອອກເຖິງການສົ່ງເສີມ, ເຊີດຊູບົດບາດ, ກຽດສັກສີ ຂອງຄູ-ອາຈານ ໃຫ້ສູງຂຶ້ນ. ພ້ອມກັນນີ້, ເພື່ອເປັນການໂຄສະນາ ເຜີຍແຜ່ຜົນງານຄຸນງາມ ຄວາມດີຂອງຄູ-ອາຈານ ໃຫ້ທຸກຄົນໃນສັງຄົມ ໄດ້ຮັບຮູ້ເຖິງຜົນງານຂອງຄູ ພ້ອມທັງສະແດງອອກ ເຖິງຄວາມກະຕັນຍູ, ຮູ້ບຸນຄຸນຕໍ່ ຄູ-ອາຈານ ທີ່ໄດ້ສິດສອນໃຫ້ຄວາມຮູ້ ນັບທັງອາດີດ ກໍຄື ປັດຈຸບັນ. ໂດຍການເຂົ້າຮ່ວມຂອງ ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫລວງວຽງຈັນ, ມີອະດີດການນໍາ, ພະນັກງານອາວຸໂສບໍານານ, ພະນັກງານ, ຄູ-ອາຈານ ແລະ ນ້ອງນັກຮຽນ, ນັກສຶກສາ ເຂົ້າຮ່ວມ.

ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລາ ນະຄອນຫລວງວຽງຈັນ, ແຈ້ງໃຫ້ຮູ້ວ່າ: ພາຍຫລັງປະເທດຊາດ ໄດ້ຮັບການປົດປ່ອຍທົ່ວປະເທດ ແລະ ສະຖາປະນາ ເປັນ ສາທາລະນະລັດ ປະຊາທິປະໄຕ ປະຊາຊົນລາວ ໃນວັນທີ 2 ທັນວາ 1975 ພັກປະຊາຊົນປະຕິວັດລາວ ໄດ້ມີນະໂຍບາຍຕໍ່ການສຶກສາ ໂດຍໃຫ້ມີລັກສະນະຊາດ, ວິທະຍາສາດ ແລະ ມະຫາຊົນ, ຈຶ່ງເຮັດໃຫ້ການສຶກສາຂອງລາວ ໄດ້ຮັບການພັດທະນາ ຈາກຕົວເມືອງໄປສູ່ຊົນນະບົດ, ຖັນແຖວຄູ-ອາ ຈານ ໄດ້ເພີ່ມຂຶ້ນເປັນຈໍານວນ ຫລວງຫລາຍ ຄູ-ອາຈານ ເຫລົ່ານັ້ນ ໄດ້ປະກອບສ່ວນສ້າງຊັບພະຍາ ກອນມະນຸດທີ່ດີ, ມີຈິດໃຈຮັກຊາດ, ຮັກລະບອບໃໝ່ ທີ່ປະຕິບັດໜ້າທີ່ຢູ່ທຸກຂະແໜງການທັງສູນກາງ ແລະ ທ້ອງຖິ່ນ.

ທ່ານ ສົມພອນ ສອນດາລາ ໃຫ້ຮູ້ຕື່ມວ່າ: ຜ່ານການຈັດຕັ້ງປະຕິບັດ ແຜນພັດທະນາການສຶກສາ-ກິລາ ໃນສົກຮຽນ 2019-2020 ພວກເຮົາມີຜົນສໍາເລັດຫລາຍດ້ານ ໂດຍສະເພາະ ແມ່ນການຂະຫຍາຍ ໂອກາດເຂົ້າຮຽນ ຈຳນວນໂຮງຮຽນ, ຫ້ອງຮຽນ, ຄູສອນ ແລະ ນັກຮຽນມີຈຳນວນເພີ່ມຂຶ້ນ, ການສຶກສາໄດ້ຮັບ ການພັດທະນາຄົບຕາມ 3 ລັກສະນະ ແລະ  5 ຫລັກມູນ ຂອງການສຶກສາ ແລະ ໄດ້ຂະຫຍາຍຕາໜ່າງ ໄປສູ່ທ້ອງຖິ່ນ. ປັດຈຸບັນ, ທົ່ວນະຄອນຫລວງວຽງຈັນ, ມີໂຮງຮຽນພາກລັດ ແລະ ເອກະຊົນທັງໝົດ 1.124 ແຫ່ງ, ທຽບໃສ່ສົກຜ່ານມາເພີ່ມຂຶ້ນ 25 ແຫ່ງ, ມີນັກຮຽນທັງໝົດ 204.130 ຄົນ, ເປັນຍິງ 99.644 ຄົນ. ຖ້າທຽບໃສ່ສົກຮຽນຜ່ານມາເພີ່ມຂຶ້ນ 1,46% ໃນນັ້ນມີໂຮງຮຽນລ້ຽງເດັກ ແລະ ອະນຸບານມີ 410 ແຫ່ງ, ທຽບໃສ່ສົກຜ່ານມາເພີ່ມຂຶ້ນ 5,39%, ມີຈໍານວນນັກຮຽນລ້ຽງເດັກ-ອະນຸບານ ແລະ ຫ້ອງກຽມ 40.882 ຄົນ, ຍິງ 20.091 ຄົນ, ທຽບໃສ່ສົກຜ່ານມາເພີ່ມຂຶ້ນ 3,13%, ຄູສອນຊັ້ນ ລ້ຽງເດັກອະນຸບານ ແລະ ຫ້ອງກຽມ 3.021 ຄົນ, ຍິງ 2.991 ຄົນ, ທຽບໃສ່ສົກຜ່ານມາ ຫລຸດລົງ 9,84%, ໂຮງຮຽນປະຖົມ ມີ 534 ແຫ່ງ ທຽບໃສ່ສົກຜ່ານມາເພີ່ມຂຶ້ນ 0,18% ມີຈຳນວນນັກຮຽນ 80.027 ຄົນ, ຍິງ 38.364 ຄົນ, ທຽບໃສ່ສົກຜ່ານມາເພີ່ມຂຶ້ນ 2,11%, ໂຮງຮຽນມັດທະຍົມ 180 ແຫ່ງ ທຽບໃສ່ສົກຜ່ານມາເພີ່ມຂຶ້ນ 1,69% (ໃນນີ້ລວມທັງໂຮງຮຽນສົງ 6 ແຫ່ງ), ມີນັກຮຽນຊັ້ນມັດທະຍົມ 83.221 ຄົນ, ຍິງ 41.189 ຄົນ, ທຽບໃສ່ສົກຜ່ານມາເພີ່ມຂຶ້ນ 0,06%, ໃນນັ້ນເປັນນັກຮຽນຊັ້ນມໍຕົ້ນ 52.672 ຄົນ, ຍິງ 25.810 ຄົນ, ທຽບໃສ່ສົກຜ່ານມາເພີ່ມຂຶ້ນ 1,80% ແລະ ນັກ ຮຽນຊັ້ນມໍປາຍ ຈໍານວນ 30.549 ຄົນ, ຍິງ 15.379 ຄົນ, ທຽບໃສ່ສົກຜ່ານມາຫລຸດລົງ 2,78%. ສຳລັບຄູສອນຊັ້ນມັດທັດທະຍົມ 4.503 ຄົນ, ຍິງ 2.582 ຄົນ, ທຽບໃສ່ສົກຜ່ານມາຫລຸດລົງ 2,97%. ໃນໜຶ່ງສົກຮຽນຜ່ານມາ ໄດ້ເອົາໃຈໃສ່ປັບປຸງຄຸນ ນະພາບການສຶກສາ ແລະ ກິລາ ໃຫ້ດີຂຶ້ນເລື້ອຍໆ ຊຶ່ງສະແດງອອກ ໃນການສອບເສັງ ນັກຮຽນເກັ່ງ ໃນລະດັບຕ່າງໆ ເປັນຕົ້ນ ເສັງຊັ້ນມັດທະຍົມຕອນຕົ້ນ ມີຈຳນວນນັກຮຽນ ເຂົ້າສອບເສັງທັງໝົດ 11.051 ຄົນ, ຍິງ 5.524 ຄົນ. ການແຂ່ງຂັນສອບເສັງ ນັກຮຽນເກັ່ງຊັ້ນ ມໍ7 ມີຈໍານວນນັກຮຽນ ເຂົ້າສອບເສັງທັງໝົດ 9.707ຄົນ, ຍິງ 4.874ຄົນ.

ນອກຈາກນັ້ນ, ການສຶກສານອກໂຮງຮຽນ ກໍໄດ້ເອົາໃຈໃສ່ເປັນພິເສດ, ເຊິ່ງໄດ້ຈັດຕັ້ງການເກັບກຳສະຖິຕິ, ຈັດບຳລຸງ ມໍຕົ້ນ, ມໍປາຍ ໃຫ້ແກ່ພະນັກງານ, ທະຫານ, ຕຳຫລວດ, ພ້ອມທັງຝຶກອົບຮົມພາສາອັງກິດ ແລະ ຝຶກອົບຮົມວິຊາຊີບ ຕັດຫຍິບ, ປຸງແຕ່ງ ແລະ ເສີມສວຍ ໃຫ້ແກ່ຊາວໜຸ່ມ-ຍິງໜຸ່ມ ທີ່ດ້ອຍໂອກາດ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)