ໃນວັນທີ 6 ຕຸລາ 2020 ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ໄດ້ຈັດພິທີເປີດການວາງສະແດງ ຫໍພິພິທະພັນແຫ່ງຊາດຫລັງ​ໃໝ່, ໂດຍມີ ທ່ານ ກິແກ້ວ ໄຂຄຳພິທູນ ລັດຖະມົນຕີກະຊວງ ຖວທ, ມີຮອງລັດຖະມົນຕີ, ພ້ອມດ້ວຍພາກສ່ວນກ່ຽວຂ້ອງ ແລະ ແຂກຖືກເຊີນ ເຂົ້າຮ່ວມ.

ຫໍພິພິທະພັນແຫ່ງຊາດ ຫລັງໃໝ່ ຕັ້ງຢູ່ຖະໜົນ ໄກສອນ ພົມວິຫານ ບ້ານສີວິໄລ, ເມືອງໄຊທານີ ນະຄອນຫລວງວຽງຈັນ, ເປີດໃຫ້ບໍລິການ ເພື່ອສະໜອງການບໍລິ ການແຂກພາຍໃນ ແລະ ຕ່າງປະເທດ ໄດ້ເຂົ້າມາທ່ຽວຊົມ, ສຶກສາ, ຮຽນຮູ້ປະຫວັດສາດ ແລະ ມໍລະດົກທາງວັດທະນະທໍາ ທີ່ໂດດເດັ່ນຂອງຊາດລາວ ແຕ່ແຜ່ນດິນລາວ ຍຸກດຶກດໍາບັນຈົນເຖິງປັດຈຸບັນ ທີ່ໄດ້ຈັດວາງສະແດງຢູ່ ຫໍພິ ພິທະພັນແຫ່ງນີ້. ຈະເປີດໃຫ້ບໍລິການທຸກວັນ ຈັນ-ສຸກ ເວລາ 8:00ໂມງ ຫາ 16:00ໂມງ, ໃນໄລຍະເປີດໃໝ່ ລາຄາປີ້ເຂົ້າຊົມສໍາລັບຄົນລາວ ແມ່ນ 2.000 ກີບ, ສ່ວນຄົນຕ່າງປະເທດແມ່ນ 10 ພັນກີບ.

ທ່ານ ນາງ ວັນເພັງ ແກ້ວປັນຍາ ຜູ້ອໍານວຍການ ຫໍພິິພິທະພັນແຫ່ງຊາດ ລາຍ​ງານ​ໃຫ້​ຮູ້​ວ່າ:ຫໍພິພິທະພັນແຫ່ງຊາດ ​ໃນເມື່ອກ່ອນ ແມ່ນຫໍວາງສະແດງມູນເຊື້ອ, ເຊິ່ງໄດ້ການສ້າງຕັ້ງຂຶ້ນ ໃນປີ 1980 ເພື່ອສະເຫລີມສະຫລອງ ວັນສະຖາປະນາ ສປປ ລາວ ຄົບຮອບ 5 ປີ (1975-1980) ຕໍ່ມາໄດ້ປ່ຽນເປັນຫໍພິພິ ທະພັນປະຕິວັດໃນ ປີ 1985, ມາຮອດປີ 2000 ໄດ້ຍົກລະດັບຂຶ້ນ ເປັນຫໍພິພິທະພັນແຫ່ງຊາດ, ໂດຍນໍາໃຊ້ອາຄານເກົ່າ ສ້າງຂຶ້ນໃນ ປີ 1925 ເຊິ່ງເປັນສະຖາ​ປັດຕະຍະ​ກຳ ​ຍຸກ​ອະ​ນານິຄົມ. ອາ​ຄານ​ຫລັງ​ນີ້, ​ເຄີ​ຍນຳ​ໃຊ້​ເປັນ​ສະຖານ​ທີ່​ ປະກາດ​ເອກະລາດ​ ອະທິປະ​ໄຕແຫ່ງຊາດ ເໜືອການຄອບຄອງ ຂອງລະບອບອະນານິຄົມຝຣັ່ງ ບົນຜືນແຜ່ນດິນລາວ 12 ຕຸລາ 1945.

ມາ​ຮອ​ດປີ 2017 ຫໍພິພິທະພັນແຫ່ງຊາດ ​ໄດ້​ຍ້າຍ​ມາ​ຢູ່​ອາຄານ​ຫລັງ​ໃໝ່ ຫລັງ​ຈາກ​ນັ້ນ ໃນປີ 2018 ຫໍພິພິທະພັນແຫ່ງຊາດ ໄດ້ຮັບງົບປະມານພາກລົງທຶນ ຂອງລັດລວມມູນຄ່າ 2.911.760.000 ກີບ (ສອງຕື້ເກົ້າຮ້ອຍສິບເອັດລ້ານກວ່າກີບ) ເພື່ອນໍາໃຊ້ເຂົ້າໃນການອອກແບບ ແລະ ຕິດຕັ້ງຝາຂັ້ນຫ້ອງ, ຕູ້ວາງສະແດງ ແລະ ແທ່ນວາງສະແດງ ໃນຫ້ອງວາງສະແດງ 1 ສະໄໝກ່ອນປະຫວັດສາດ, ໂດຍແມ່ນກຸ່ມບໍລິສັດ ຄໍາໄພ ຊະນະ ຈໍາກັດຜູ້ດຽວ ເປັນຜູ້ອອກແບບ ແລະ ຕິດຕັ້ງ, ​ເຊິ່ງການຕິດຕັ້ງສໍາເລັດ 100% ​ໃນເດືອນຕຸລາ 2019.

ຫລັງຈາກນັ້ນ, ກໍ່ໄດ້ເລີ່ມຕິດຕັ້ງ ການວາງສະແດງ ຕາມໂຄງຮ່າງ ເນື້ອໃນວາງສະແດງທີ່ໄດ້ກໍານົດ ແລະ ຮັບຮອງເອົາ 3 ຫົວຂໍ້ໃຫຍ່ ຄື: ແຜ່ນດິນລາວຍຸກດຶກດໍາບັນ, ຍຸກກ່ອນປະຫວັດສາດ ແລະ ປະຫວັດສາດຊາດລາວ ສະໄໝກ່ອນລ້ານຊ້າງ. ແຕ່ລະຫົວຂໍ້ໃຫຍ່ ປະກອບມີຫົວຂໍ້ນ້ອຍ ເພື່ອລົງເລິກລາຍລະອຽດ ຂອງແຕ່ລະຍຸກສະໄໝ ໃຫ້ເຂົ້າໃຈແຈ້ງ ແລະ ງ່າຍຂຶ້ນສໍາລັບແຂກເຂົ້າຊົມ. ພ້ອມດຽວກັນນີ້, ກໍໄດ້ມີການຈັດວາງສະແດງເພີ່ມ ບັນດາວັດຖຸບູຮານ ທີ່ໄດ້ຮັບຈາກໂຄງການ ຂຸດຄົ້ນບໍ່ຄໍາເຊໂປນ ໃນປີ 2019 ແລະ ເພີ່ມຕູ້ວາງສະແດງ ຈຳນວນໜຶ່ງ, ເຊິ່ງວັດຖຸບູ ຮານທີ່ໄດ້ຈັດວາງສະແດງ ຢູ່ໃນພາກນີ້ປະກອບ ມີ: ຊາກພືດ ແລະ ສັດ, ເຄື່ອງມືຫີນ, ກະດູກມະນຸດບູຮານ, ເຄື່ອງປັ້ນດິນເຜົາ, ເຄື່ອງທອງສໍາລິດ, ພະພຸດທະຮູບຫີນ, ເທວະຮູບຫີນ ແລະ ອື່ນໆອີກ ລວມທັງໝົດມີ 279 ລາຍການ.

ສໍາລັບຫ້ອງວາງສະແດງ 2 ປະຫວັດສາດຊາດລາວ ສະໄໝລ້ານຊ້າງ ແມ່ນຍັງບໍ່ທັນໄດ້ອອກແບບ ວາງສະແດງຖາວອນເທື່ອ ແຕ່ປັດຈຸບັນໄດ້ຈັດວາງ ສະແດງແລ້ວ ແບບເຄິ່ງຖາວອນ ໂດຍນໍາໃຊ້ຕູ້ວາງສະແດງເກົ່າ ທີ່ຍົກຍ້າຍມາຈາກອາຄານຫລັງເກົ່າ ເປັນການຊົ່ວຄາວຊໍາຊາໄດ້ ມີການອອກແບບວາງສະແດງ ແລະ ຕິດຕັ້ງຫ້ອງວາງສະແດງໃໝ່ ​ເຊິ່ງເນື້ອໃນວາງສະແດງ ປະກອບມີ 4 ຫົວຂໍ້ນ້ອຍຄື: ອານາຈັກລາວລ້ານຊ້າງ ສະໄໝຊຽງທອງ ເປັນນະຄອນຫລວງ ໃນສະຕະວັດທີ 14-15, ອານາຈັກລາວລ້ານຊ້າງ ສະໄໝວຽງຈັນ ເປັນນະຄອນຫລວງ ໃນສະຕະວັດທີ 16-17, ອານາຈັກລາວລ້ານຊ້າງ ສະໄໝຖືກແຍກອອກ ເປັນສາມອານາຈັກ ໃນສະຕະວັດທີ 18 ແລະ ອານາຈັກລາວລ້ານຊ້າງ ຕົກເປັນເມືອງສ່ວຍ ຂອງສັກດິນາສະຫຍາມ ໃນສະຕະວັດທີ 18-19, ບັນດາວັດຖຸບູຮານ ທີ່ໄດ້ຈັດວາງສະແດງ ຢູ່ຫ້ອງວາງສະແດງ 2 ນີ້ ກໍມີຫລາກຫລາຍ ປະເພດເຊັ່ນກັນ ລວມທັງໝົດມີ 585 ລາຍການ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)