ປະໂຫຍດຂອງການດື່ມນົມກ່ອນນອນ!!.

0
64

ເປັນຫຍັງຈື່ງຄວນດື່ມນົມກ່ອນເຂົ້ານອນ? ການດື່ມນົມກ່ອນເຂົ້ານອນມີປະໂຫຍດ ແລະ ດີຕໍ່ສຸຂະພາບຂອງທ່ານ ເຄື່ອງດື່ມທີ່ພວກເຮົາຄວນດື່ມກ່ອນເຂົ້ານອນຫຼາຍທີ່ສຸດໃນນາທີນີ້ ຂໍແນະນຳໃຫ້ເປັນນົມ ເພາະນອກຈາກຈະຊ່ວຍ ບັນເທົາຄວາມອຶດຫິວໃນຕອນກາງຄືນ ຄຸນປະໂຫຍດຂອງການດື່ມນົມກ່ອນນອນກໍ່ເປັນຜົນດີຕໍ່ສຸຂະພາບຂອງພວກເຮົາຫຼາຍຢ່າງ ເຖິງຢ່າງໃດກໍ່ຕາມການດື່ມນົມກ່ອນນອນໃຫ້ໄດ້ຮັບສຸຂະພາບທີ່ດີຕະຫຼອດ ຄວນເລືອກນົມທີ່ມີໄຂ ມັນຕໍ່າ ຫຼື ນົມທີ່ບໍ່ມີໄຂມັນ ຄວນດື່ມກ່ອນເຂົ້ານອນປະມານ 3 ຊົ່ວໂມງ ແລະ ບໍ່ຄວນດື່ມນົມແລ້ວເຂົ້ານອນທັນທີ ເພາະອາດມີບັນຫາກົດໄຫຼຍ້ອນ ເຮັດໃຫ້ຕຸ້ຍ ແລະ ນໍ້ານົມທີ່ຕິດຢູ່ເທິງແຂ້ວອາດຈະກາຍເປັນກົດ ແລະ ທຳລາຍແຂ້ວ ເຊີ່ງເປັນສາເຫດເຮັດໃຫ້ເກີດແຂ້ວຫຼົ່ນໄດ້ເຊັ່ນກັນ ເພາະສະນັ້ນຫຼັງຈາກດື່ມນົມຢ່າລືມຖູແຂ້ວກ່ອນນອນ ແລະ ຖ້າເຮັດໄດ້ຕາມນີ້ກໍ່ສາມາດຮັບປະໂຫຍດຈາກການດື່ມນົມກ່ອນນອນ.

  • ແກ້ອາການນອນບໍ່ຫຼັບ.

ບາງຄົນນອນບໍ່ຫຼັບເພາະຮູ້ສຶກຫິວ ເຖີງວ່າຈະເຫດຜົນໃດກໍ່ຕາມທີ່ນອນບໍ່ຫຼັບ ຖ້າລອງດື່ມນົມທີ່ມີໄຂມັນຕໍ່າ ແລະ ອຸ່ນໆ ໜຶ່ງຈອກເບີ່ງ? ເພາະນົມມີໂປຣຕີນທີ່ຊ່ວຍເຮັດໃຫ້ຮ່າງກາຍຮູ້ສຶກອີ່ມ ມີ Tryptophan ເປັນກົດອະມິໂນທີ່ສ້າງຮໍໂມນ serotonin ເຊິ່ງເປັນສື່ກາງປະສາດສະໝອງທີ່ຊ່ວຍໃນຂະບວນການນອນຫຼັບ ເຮັດໃຫ້ເຮົານອນຫຼັບໄວ.

  • ສ້າງກະດູກໃຫ້ມີຄວາມແຂງແຮງ.

ນົມແມ່ນມີແຄລຊຽມສູງ ແລະ ດີທີ່ສຸດສຳລັບກະດູກ ຂໍ້ຕໍ່ ຊ່ວຍຫຼຸດຄວາມສ່ຽງຂອງໂລກຂໍ້ອັກເສບ ແລະ ພະຍາດກະດູກຕ່າງໆ ຖ້າເຮົາດື່ມນົມໄຂມັນຕໍ່າອຸ່ນໆ ສານອາຫານໃນນົມກໍ່ຈະເຂົ້າໄປຊ່ວຍໃຫ້ກ້າມເນື້ອຜ່ອນຄາຍ ແລະ ຫຼັບສະບາຍຂື້ນ.

  • ແກ້ອາການເຈັບຫົວ

ນອກຈາກນົມຈະມີແຄລຊຽມສູງແລ້ວ ໃນນົມຍັງມີແມກນີຊຽມຫຼາຍສົມຄວນ ເພາະສານອາຫານຊະນິດນີ້ສາມາດຊ່ວຍຫຼຸດອາການເຈັບຫົວຂອງໄມແກຣນ (migraine) ລວມທັງອາການເຈັບຫົວປະເພດຕ່າງໆ ເພາະສານອາຫານໃນນົມສາມາດຊ່ວຍຜ່ອນຄາຍລະບົບປະສາດໄດ້ ຄົນທີ່ມັກເຈັບຫົວຈາກຄວາມຄຽດຈົນນອນບໍ່ຫຼັບ ເມື່ອເວລາດື່ມນົມອຸ່ນໆ ສາມາດຊ່ວຍແກ້ໄຂບາງບັນຫາເຫຼົ່ານີ້ໄດ້.

  • ບັນເທົາອາການເຈັບທ້ອງປະຈຳເດືອນ

ບັນດາຜູ້ຍິງທີ່ເປັນປະຈຳເດືອນຖ້າດື່ມນົມອຸ່ນໆ ໜຶ່ງຈອກກ່ອນນອນກໍ່ຈະຊ່ວຍໃຫ້ອາການເຈັບຫາຍໄປ ເພາະແມັກ ນີຊຽມ ໃນນົມສາມາດຊ່ວຍຫຼຸດອາການເຈັບທ້ອງປະຈຳເດືອນໄດ້ ແລະ ຄວາມອຸ່ນຮ້ອນຂອງນົມກໍ່ຈະຊ່ວຍຫຼຸດການເຄັງຂອງກ້າມຊີ້ນ ເຮັດໃຫ້ສາວໆ ຮູ້ສຶກສະບາຍໂຕຂື້ນ.

  • ປ້ອງກັນອາການປັ້ນ (ຕະຄິວ)

ສາເຫດທີ່ເຮັດໃຫ້ຮ່າງກາຍຂອງເຮົາມີອາການປັ້ນ ຫຼື ເປັນຕະຄິວ ຍ້ອນຂາດທາດສານອາຫານທີ່ສຳຄັນ ເຊັ່ນ: ວິຕາ ມິນ B, ແມກນີຊຽມ ແລະ ໂພແທດຊຽມ ເພາະສະນັ້ນຜູ້ທີ່ມີອາການອາການປັ້ນ  ຫຼື ເປັນຕະຄິວເລື້ອຍໆ ສາມາດທົດລອງດື່ມນົມຫຼັງອາຫານຄໍ່າ ເພາະສານອາຫານທີ່ຈະຊ່ວຍປ້ອງກັນອາການປັ້ນ ຫຼື ເປັນຕະຄິວ ທີ່ພວກເຮົາໄດ້ກ່າວມາຂ້າງເທິງນັ້ນ ມີຢູ່ໃນນົມທັງໝົດ.

  • ປ້ອງກັນພະຍາດຫົວໃຈ.

ສານອາຫານທີ່ສຳຄັນໃນນົມທີ່ສົ່ງຜົນກະທົບໃນການປ້ອງກັນພະຍາດຫົວໃຈກໍ່ຄືໂພແທດຊຽມ ເຊິ່ງມີສ່ວນຊ່ວຍໃນການຮັກສາລະດັບຄວາມດັນເລືອດໃຫ້ຄົງທີ່ ແນະນຳໃຫ້ດື່ມນົມທີ່ບໍ່ມີໄຂມັນ ແລະ ບໍ່ມີນໍ້າຕານຈະຍິ່ງເປັນການດີ.

  • ສ້ອມແປງສ່ວນທີ່ເພໃນຮ່າງກາຍ.

ທາດໂປຼຕີນຈາກນົມບໍ່ພຽງແຕ່ຊ່ວຍການຈະເລີນເຕີບໂຕຂອງເຮົາເທົ່ານັ້ນ ແຕ່ຍັງມີສ່ວນຊ່ວຍສ້ອມແປງສ່ວນທີ່ເພໃນຮ່າງກາຍ ຖ້າເຮົາດື່ມນົມກ່ອນນອນສານອາຫານດີໆ ຈາກນົມຈະຊ່ວຍເຮັດໃຫ້ກົນໄກຂອງຮ່າງກາຍ ເຮັດໜ້າທີ່ແຂງແຮງ, ຟື້ນຟູ, ບຳລຸງ ແລະ ສ້ອມແປງສ່ວນທີ່ເພໃນຮ່າງກາຍໃຫ້ມີປະສິດທິພາບຫຼາຍຂື້ນ.

  • ປັບການເຮັດວຽກຂອງລຳໃສ້.

ຖ້າທ່ານມັກດື່ມນົມສົ້ມຫຼາຍກວ່ານົມງົວທຳມະດາ ຜົນປະໂຫຍດທີ່ໄດ້ຮັບແມ່ນເຊື້ອແບັດທີເລຍຊະນິດດີຄືກັບ lactobacillus ເພາະຈະຊ່ວຍປັບໃຫ້ແບັດທີເລຍໃນລຳໃສ້ ສົ່ງຜົນໃຫ້ລະບົບຍ່ອຍອາຫານອອກມາເຊັ່ນດຽວກັນກັບລະບົບອື່ນໆ ຂອງລໍາໃສ້ໃຫ້ມີຄວາມສົມດຸນ ຫຼຸດອາການໃສ້ປັ່ນປ່ວນ ແລະ ຍັງຊ່ວຍໃຫ້ລະບົບຂັບຖ່າຍດີຂື້ນ ຄວນດື່ມນົມສົ້ມທີ່ມີນ້ໍາຕານໜ້ອຍ.

  • ເພີ່ມພະລັງງານໃນຕອນເຊົ້າ.

ເມື່ອຮ່າງກາຍນອນຫຼັບ ພັກຜ່ອນພຽງພໍ ແລະ ຍັງໄດ້ຮັບສານອາຫານທີ່ດີຈາກນໍ້ານົມເພື່ອເຂົ້າໄປບຳລຸງໃນຮ່າງກາຍ ສະນັ້ນເມື່ອເຮົາຕື່ນຂື້ນມາໃນຕອນເຊົ້າຮ່າງກາຍຈະຮູ້ສຶກສົດຊື່ນ ມີພະລັງງານໃນການເຮັດກິດຈະກຳຕ່າງໆ ຢ່າງເຕັມທີ່.

ຄຸນປະໂຫຍດຂອງການດື່ມນົມກ່ອນນອນແມ່ນສິ່ງທີ່ດີ ໃຜທີ່ບໍ່ມີອາການແພ້ນົມງົວ ຫຼື ສາມາດດື່ມນົມໄດ້ຕາມປົກກະຕິ ຢ່າລືມກ່ຽວກັບເງື່ອນໄຂທີ່ພວກເຮົາບອກໄວ້ຂ້າງເທີງນັ້ນ ຄວນດື່ມນົມ 3 ຊົ່ວໂມງກ່ອນເຂົ້ານອນ ເລືອກນົມທີ່ບໍ່ມີໄຂມັນ ນໍ້າຕານໜ້ອຍ ຫຼື ບໍ່ມີນໍ້າຕານເລີຍ ສີ່ງສຳຄັນຄວນຖູແຂ້ວກ່ອນເຂົ້ານອນທຸກໆ ຄັ້ງນຳ.