ໃນວັນທີ 8 ຕຸລາ 2020 ທີ່ກະຊວງປ້ອງກັນປະເທດ, ໄດ້ຈັດພິທີໂຮມຊຸມນຸມ ລະນຶກວັນສ້າງຕັ້ງສາຍພົວພັນ ການທູດລະຫວ່າງ ສປປ ລາວ-ສະຫະພັນ ຣັດເຊຍ ຄົບຮອບ 60 ປີ (7/10/1960-7/10/2020) ຈຸດປະສົງເພື່ອເສີມຂະຫຍາຍ ສາຍພົວພັນມິດຕະພາບທີ່ຮັດແໜ້ນ ເປັນຄູ່ຮ່ວມມືທີ່ມີມາຍາວນານ, ເປັນເພື່ອມິດທີ່ໃກ້ສິດ ແລະ ຄູ່ຮ່ວມມືຍຸດທະສາດ ໃນການສະໜັບສະໜູນຊຶ່ງກັນ ແລະ ກັນ ໃນເວທີພາກພື້ນ ແລະ ສາກົນ.

ທ່ານ ພົ.ອ ຈັນສະໝອນ ຈັນຍາລາດ ກໍາມະການກົມການເມືອງສູນກາງພັກ, ລັດຖະມົນຕີກະ ຊວງປ້ອງກັນປະເທດ ໄດ້ກ່າວວ່າ: ພາຍຫລັງ ສປປ ລາວ ໄດ້ຮັບການສະຖາປະນາຂຶ້ນ, ອາດີດສະຫະ ພາບໂຊວຽດ ຍັງໄດ້ສືບຕໍ່ປະກອບສ່ວນ ໃຫ້ການຊ່ວຍເຫລືອ ສປປ ລາວ ໃນໄລຍະຮໍາບາດແຜສົງຄາມ ກໍຄື ໄລຍະປົກປັກຮັກສາ ແລະ ພັດທະນາປະເທດຊາດ ເປັນຕົ້ນ ການການຊ່ວຍເຫລືອ ພື້ນຟູພື້ນຖານໂຄ່ງລ່າງ, ວັດຖຸພາຫະນະ-ເຕັກນິກ, ເຂື່ອນໄຟຟ້ານໍ້າຕົກ, ຂົວ-ທາງ, ດ້ານອຸດສະຫະກຳ, ກະສິກຳ, ການສຶກສາ, ສາທາລະນະສຸກ, ເຕັກນິກການທະຫານ ແລະ ອື່ນໆ ໄດ້ກາຍເປັນສັນຍາລັກ ແຫ່ງມິດຕະພາບອັນດີງາມ ລະຫວ່າງປະຊາຊົນສອງຊາດລາວ ແລະ ຣັດເຊຍ. ອັນພົ້ນເດັ່ນແມ່ນ ການກໍ່ສ້າງຊັບພະຍາກອນມະ ນຸດ ເຊິ່ງໄດ້ສ້າງນັກວິຊາການ ດ້ານຕ່າງໆຈໍານວນຫລວງຫລາຍໃຫ້ແກ່ ສປປ ລາວ ແລະ ບັນດາອາດີດນັກສຶກສາ ທີ່ຈົບມາຈາກອາດີດ ສະຫະພາບໂຊວຽດ ກໍຄື ສະຫະພັນ ຣັດເຊຍປັດຈຸບັນ ໄດ້ຖືກບັນຈຸຢູ່ ໃນກົງຈັກລັດຖະບານ, ໃນຂະແໜງການຕ່າງໆ, ເຂົາເຈົ້າເຫລົ່ານັ້ນ ໄດ້ກາຍເປັນພະນັກງານຫລັກແຫລ່ງ ໃນການຄຸ້ມຄອງລັດ, ບັນຊາເຫລົ່າທັບ ແລະ ມີຈໍານວນບໍ່ໜ້ອຍກໍ່ໄດ້ ກາຍເປັນການນຳໃນບັນດາອົງການ, ກະຊວງຕ່າງໆໃນ ສປປ ລາວ ລວມທັງການນຳ ກະຊວງປ້ອງກັນປະເທດ ນັບແຕ່ສະໄໝອາດີດ ຈົນມາເຖິງປະຈຸບັນ.

ລາວ ແລະ ຣັດເຊຍ ມີການພົວພັນອັນລໍ້າຄ່າຮ່ວມກັນ ບົນພື້ນຖານມູນເຊື້ອ ແຫ່ງສາຍພົວພັນມິດຕະພາບ ແລະ ການຮ່ວມມືອັນດີງາມມາດົນນານ, ມີຄວາມໄວ້ເນື້ອເຊື່ອໃຈ ແລະ ຊ່ວຍເຫລືອເຊິ່ງກັນ ແລະ ກັນ, ເປັນສາຍພົວພັນມິດຕະພາບທີ່ຮັດແໜ້ນ ແລະ ເປັນຄູ່ຮ່ວມມືທີ່ມີມາຍາວນານ, ເປັນປະເທດເພື່ອນມິດທີ່ໃກ້ຊິດ ແລະ ຄູ່ຮ່ວມມືຍຸດທະສາດ, ໃຫ້ການສະໜັບ ໜູນເຊິ່ງກັນ ແລະ ກັນ ໃນເວທີພາກພື້ນ ແລະ ສາກົນ.

ການພົວພັນຮ່ວມມື ໃນຂົງເຂດການທະຫານ ລະຫວ່າງສອງຊາດ ລາວ-ຣັດເຊຍ ໂດຍສະເພາະ ລະຫວ່າງ ສອງກະຊວງປ້ອງກັນປະເທດ ໄດ້ມີບາດກ້າວຂະຫຍາຍຕົວ ຂຶ້ນຢ່າງບໍ່ຢຸດຢັ້ງ. ໂດຍປະຕິບັດຕາມການເຊື້ອເຊີນ ຂອງລັດຖະມົນຕີ ກະຊວງປ້ອງກັນປະເທດ ແຫ່ງ ສ ຣັດເຊຍ ຄະນະຜູ້ແທນກະຊວງປ້ອງກັນປະເທດ ແຫ່ງ ສປປ ລາວ ກໍ່ໄດ້ເດີນທາງໄປຮ່ວມກອງປະຊຸມ ຄວາມໝັ້ນຄົງສາກົນ ມົດສະກູ ຄັ້ງທີ 6, 7, 8, 9 ຢູ່ ສະຫະພັນ ຣັດເຊຍ ເປັນປະຈໍາທຸກໆປີ ໃນແຕ່ລະຄັ້ງ ກໍມີການພົບປະສອງຝ່າຍລະ ຫວ່າງການນຳຂັ້ັນສູງ ຂອງສອງກະຊວງ ປ້ອງກັນປະເທດ. ນອກຈາກນີ້, ກະຊວງປ້ອງກັນປະເທດ ແຫ່ງ ສະຫະພັນ ຣັດເຊຍ ຍັງໄດ້ໃຫ້ການຊ່ວຍເຫລືອ ທາງດ້ານພາຫະນະເຕັກນິກ ພ້ອມທັງຝຶກອົບຮົມການນໍາໃຊ້ໃຫ້ ແຕ່ລະເຫລົ່າລົບຂອງ ກອງທັບປະຊາຊົນລາວ ເປັນຕົ້ນ ເຫລົ່າລົບລົດຕັງ-ຍານເກາະ, ເຫລົ່າລົບທະ ຫານອາກາດ, ເຫລົ່າລົບປືນໃຫຍ່, ເຫລົ່າລົບຊ່າງແສງ, ເຫລົ່າລົບແຜນທີ່ ແລະ ເຫລົ່າລົບອື່ນໆ.

ໂອກາດດຽວກັນນີ້, ທ່ານ ວະລາດີເມຍ ກາລີນິນ ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ສ ຣັດເຊຍ ປະຈຳ ສປປ ລາວ ໄດ້ໃຫ້ຮູ້ວ່າ: ເລີ່ມຕັ້ງແຕ່ການປະກາດ ສະຖາປະນາ ສາທາລະນະລັດ ປະຊາທິປະໄຕ ປະຊາຊົນລາວ, ຣັດເຊຍ ໄດ້ໃຫ້ການຊ່ວຍເຫລືອ ສະໜັບສະໜູນຢ່າງເປີດກວ້າງ ໃຫ້ ແກ່ ປະເທດລາວ ໂດຍສະເພາະທຶນການສຶກສາ, ກະສິກຳ, ວຽກງານປ່າໄມ້, ການແພດ, ການທະຫານ (ປ້ອງກັນຊາດ), ຄຽງຄູ່ໄປກັບການຟື້ນຟູ ໂຄງລ່າງພື້ນຖານຕ່າງໆ ທີ່ຖືກທຳລາຍໃນສະໄໝສົງຄາມ ເຊັ່ນ: ສ້ອມແປງເສັ້ນທາງ, ສ້າງຂົວແຫ່ງຕ່າງໆ ແລະ ດຳເນີນວຽກງານສຳຫລວດ ດ້ານທໍລະນີສາດ. ການຮ່ວມມືທາງ ດ້ານການທະຫານ ແລະ ດ້ານເຕັກນິກການທະຫານ ກັບປະເທດລາວ ເປັນວຽກງານທີ່ມີຄວາມໝາຍສຳຄັນ ສຳລັບປະເທດຂອງພວກຂ້າພະເຈົ້າ, ໄລຍະຫລາຍປີຜ່ານມາ ພວກເຮົາສາມາດສັງເກດເຫັນໄດ້ວ່າ: ການພົວພັນປະສານງານ ໃນຂົງເຂດປ້ອງກັນຊາດ ແລະ ຄວາມໝັ້ນຄົງ ລະຫວ່າງສອງຊາດ ກຳລັງສືບຕໍ່ຂະຫຍາຍຕົວຢ່າງຕໍ່ເນື່ອງ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)