ໃນວັນທີ 8 ຕຸລາ 2020 ນີ້, ທ່ານ ນາງ ເປຍ ເລແບວໂລ້ ບຣິດໂຕ້ ຜູ້ຕາງໜ້າຈາກອົງ ການອຸຍນີເຊບ ປະຈຳລາວ ແລະ ທ່ານ ນາງ ຄຳສະຫວັນ ລາຊະຂັນຕີ ຮອງຫົວໜ້າພະແນນສຶກສາ ແລະ ກິລາ ນະຄອນຫລວງວຽງຈັນ ພ້ອມຄະນະ ລົງຢ້ຽມຢາມໂຮງຮຽນປະຖົມທົ່ງກາງ ເມືອງສີສັດຕະນາກ ນະຄອນຫລວງວຽງຈັນ ເພື່ອສ້າງວິດີໂອສັ້ນ ເພື່ອເຜີຍແຜ່ລົງສື່ສັງຄົມອອນລາຍ ເຊິ່ງເປັນສ່ວນໜຶ່ງຂອງຊຸດສື່ສັງຄົມອອນລາຍ ຕໍ່ກັບບົດລາຍງານຂອງອົງການອຸຍນີເຊບ ວ່າດ້ວຍການຟື້ນຟູ, ການຕອບໂຕ້ ແລະ ການສ້າງຈິນຕະນາການໃໝ່ ໃນຍຸກລະບາດຂອງ ພະຍາດໂຄວິດ-19 ແລະ ສໍາລັບວັນລ້າງມືສາກົນ(GHD) ວັນທີ 15 ຕຸລາ.

ທ່ານ ນາງ ເປຍ ເລແບວໂລ້ ບຣິດໂຕ້ ໄດ້ກ່າວວ່າ: ວີດີໂອສັ້ນນີ້, ເປັນວີດີໂອກ່ຽວກັບການສ້າງຈິນຕະນາການໃໝ່ ສໍາລັບຄົນລາວຍຸກໃໝ່ໃນປີ 2030 ໂດຍເນັ້ນໃສ່ວຽກງານການສຶກສາ ແລະ ການລົງມາຢ້ຽມໃນຄັ້ງນີ້, ຍັງເປັນໂຄສະນາມາດຕະການການປ້ອງກັນເພີ່ມເຕີມ ເພື່ອຮັບປະກັນວ່ານັກຮຽນສາມາດສືບຕໍ່ຮໍ່າຮຽນ ເຖິງຈະມີການລະບາດຂອງພະຍາດ, ທັງເປັນການແລກປ່ຽນຂໍ້ມູນຂ່າວສານ ກ່ຽວກັບການວາງມາດຕະການຕອບໂຕ້ພະຍາດໂຄວິດ-19 ຂອງກະຊວງສຶກສາທິການ ແລະ ກິລາ ໂດຍໄດ້ຮັບການສະໜັບສະໜູນຈາກ ອົງການອຸຍນີເຊບ ເພື່ອຮັບປະກັນການຮຽນທີ່ຕໍ່ເນື່ອງ ແລະ ນໍາໃຊ້ການ-ຮຽນຮູບແບບດີຈິຕອນ ໃນຍຸກທີ່ມີການລະບາດຂອງພະຍາດໂຄວິດ-19.

ໂອກາດນີ້, ອາຈານ ຄູນວິໄລ ເຄນກິຕິສັກ ຜູ້ອຳນວຍການໂຮງຮຽນປະຖົມທົ່ງກາງ ໄດ້ໃຫ້ຮູ້ວ່າ: ໂຮງຮຽນປະຖົມທົ່ງກາງ ສ້າງຕັ້ງຂຶ້ນໃນປີ 1990 ໂດຍທຶນສົມທົບລະຫວ່າງຊຸມຊົນ ແລະ ລັດຖະບານ, ປັດຈຸບັນ ມີ 6 ຫ້ອງຮຽນ ເລີ່ມແຕ່ຫ້ອງກຽມປະຖົມ ຮອດ ປ5, ມີນັກຮຽນທັງໝົດ 302 ຄົນ, ຍິງ 162 ຄົນ, ຄູທັງໝົດ 7 ຄົນ, ຍິງ 7 ຄົນ; ໂຮງຮຽນດັ່ງກ່າວ ເປັນໂຮງຮຽນຕົວແບບດ້ານສົ່ງເສີມສຸຂະພາບ, ເປັນໂຮງຮຽນທີ່ໄດ້ຮັບລາງວັນນິເວດສີຂຽວລະດັບອາຊຽນ, ໂຮງຮຽນຂຽວສະອາດຄຸນນະພາບດີຂອງນະ ຄອນຫລວງວຽງຈັນ, ເປັນໂຮງຮຽນຕົວແບບນະຄອນຫລວງວຽງຈັນ ແລະ ຍັງເປັນທົດລອງປັບປຸງຫລັກ ສູດໃໝ່ໃຫ້ກະຊວງສຶກສາທິການ ແລະ ກິລາ.