ສະມາຄົມສິລະປະແຄນລາວ ໄດ້ຈັດກອງປະຊຸມໃຫຍ່ ຄັ້ງທີ III ພາຍໃຕ້ການເປັນປະທານຂອງທ່ານ ຈະເລີນ ເຍຍປາວເຮີ ປະທານຄະນະຂົນຂວາຍ ສ້າງຕັ້ງສະມາຄົມ ສິລະປະແຄນລາວ, ທັງເປັນຫົວໜ້າຄະນະຮັບຜິດຊອບ ກະກຽມກອງປະຊຸມໃຫຍ່ ຄັ້ງທີ III ຂອງສະມາຄົມ ສິລະປະແຄນລາວ, ມີທ່ານ ກິແກ້ວ ໄຂຄຳພິທູນ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ ພ້ອມດ້ວຍບັນດານັກສິລະປິນໝໍແຄນ, ໝໍຂັບໝໍລຳ, ຜູ້ປະກອບການ ທັງພາກລັດ ແລະ ເອກະຊົນເຂົ້າຮ່ວມ, ​ເຊິ່ງກອງຊຸມ ໄດ້ຄັດ​ເລືອກ​ເອົາ​ປະທານ, ຮອງ​ປະທານ ​ແລະ ກຳມະການ​ຂອງ​ສະມາຄົມ ​ໂດຍຕົກລົງເອກະພາບກັນເລືອກເອົາທ່ານ ຄຳພັນ ເໝືອນສິດທິດາ ເປັນປະທານສະມາຄົມ ສິລະປະແຄນລາວ ​ໂດຍ​ແມ່ນ ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນ ແລະ ທ່ານ ຈະເລີນ ເຍຍປາວເຮີ ລັດຖະມົນຕີປະຈຳສຳນັກງານ ນາຍົກລັດຖະມົນຕີ ເປັນປະທານກິດຕິມະສັກ.

ໂອກາດນີ້, ທ່ານ ກິແກ້ວ ໄຂຄຳພິທູນ ​ໄດ້ໂອ້ລົມຕໍ່ກອງຊຸມ ​ໂດຍທ່ານໄດ້ເນັ້ນໃຫ້ສະມາຄົມ ສິລະປະແຄນລາວ ເອົາໃຈໃສ່ປັບປຸງແກ້ໄຂ ໂດຍສະເພາະແມ່ນ ການສືບຕໍ່ການ ອະນຸລັກຮັກສາ ແລະ ເສີມຂະ ຫຍາຍມູນເຊື້ອແຄນ ແລະ ສຽງແຄນເຊື້ອຊາດລາວ ໃຫ້ໄດ້ຮັບການພັດທະນາ ແລະ ຍືນຍົງຢູ່ຄູ່ກັບຄົນລາວ ແລະ ຊາດລາວເຮົາຕະຫລອດໄປ, ເນັ້ນໃຫ້ຄະນະ ບໍລິຫານງານສະມາຄົມ ສິລະປະແຄນລາວຊຸດໃໝ່ ໃຫ້ເອົາໃຈໃສ່ຍົກສູງບົດບາດ ການນຳພາ-ຊີ້ນຳຮອບດ້ານ ໃນທຸກຂົງເຂດວຽກງານ ຂອງສະມາຄົມ, ພ້ອມກັນສືບຕໍ່ສຶກສາອົບຮົມ ການເມືອງ ແນວຄິດ ຕໍ່ສະມາຊິກສະມາຄົມ ໃຫ້ມີຄຸນທາດການ ເມືອງໜັກແໜ້ນ, ມີທັດສະ ນະຫລັກໜັ້ນຈະແຈ້ງ, ມີຄຸນສົມບັດສິນທຳປະຕິວັດ; ປັບປຸງກົງຈັກການຈັດຕັ້ງຂອງສະມາຄົມ ພ້ອມທັງຄົ້ນຄວ້າ ບັນຈຸສັບຊ້ອນສະມາຊິກ ໃຫ້ແທດເໝາະກັບໜ້າທີ່ ການເມືອງຂອງຕົນໃນໄລຍະໃໝ່.

ນອກຈາກນີ້, ໃຫ້ເອົາໃຈໃສ່ສືບຕໍ່ຕັ້ງໜ້າ ປະກອບສ່ວນອະນຸລັກຮັກສາ ແລະ ພັດທະນາສິລະປະແຄນລາວ ຕາມລາຍແຄນດັ້ງເດີມ, ການຂັບລຳທ້ອງຖິ່ນ ຕິດພັນກັບຊ່າງເຮັດ ແຄນທີ່ມີສີມືດີ, ສ້າງຮຸ່ນສືບທອດ, ຊຸກຍູ້ໃຫ້ສ້າງເປັນຫລັກສູດ ການຮຽນ-ການສອນ ໃນໂຮງຮຽນປະຖົມ, ມັດທະຍົມສຶກສາ ແລະ ມະຫາວິທະຍາໄລ; ຕັ້ງໜ້າປົກປັກຮັກສາ ແຫລ່ງວັດຖຸ ເຮັດແຄນ ແລະ ມູນເຊື້ອແຄນ ໃຫ້ຍືນຍົງຢູ່ຄູ່ຄົນລາວ ແລະ ຊາດລາວຕະຫລອດໄປ, ທັງນີ້ ກໍເພື່ອສົ່ງເສີມກາ ນອະນຸລັກຮັກສາ ແລະ ເສີມຂະຫຍາຍມູນເຊື້ອ ສຽງແຄນເຊື້ອຊາດລາວ ມໍລະດົກໂລກໃຫ້ສູງຂຶ້ນ ​ແລະ ກົມກ່ຽວຂ້ອງ ຄວນມີມາດຕະການ ອອກຄຳແນະ ນຳໃຫ້ວົງດົນຕີລະດັບໃຫຍ່, ນ້ອຍຕ່າງໆໃຫ້ມີແຄນ ປະກອບເຂົ້າໃນການເສບ ທີ່ເປັນເອກະລັກ ຂອງຊາດລາວ.

ພ້ອມດຽວກັນນີ້, ສະຖານີວິທະຍຸກະຈາຍສຽງ, ໂທລະພາບ ແລະ ສື່ຕ່າງໆແຕ່ສູນກາງ ລົງຮອດທ້ອງຖິ່ນ ໃຫ້ນຳໃຊ້ແຄນ ແລະ ສຽງຂັບລຳທ້ອງຖິ່ນໃຫ້ຫລາຍຂຶ້ນ ສົມທົບກັບສຽງແຄນລາວ ເຊິ່ງແມ່ນມໍລະດົກ ວັດທະນະທຳນາມ ມະທຳຂອງຄົນເຊື້ອຊາດລາວ ແລະ ເປັນມໍລະດົກວັດທະນະທຳ ນາມມະທຳຂອງມວນມະນຸດໂລກຢ່າງແທ້ຈິງ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)