ປະທານສະພາ ເຂົ້າຮ່ວມກອງປະຊຸມດຳເນີນຊີວິດການເມືອງ ທ້າຍສະໄໝ ທີ VIII ທີ່ແຂວງຊຽງຂວາງ

0
38

ກອງປະຊຸມດໍາເນີນຊີວິດ ການເມືອງທ້າຍສະໄໝທີ VIII ຄະນະບໍລິຫານງານພັກ ແຂວງຊຽງຂວາງ ໄດ້ຈັດ​ຂຶ້ນ​ໃນ​ວັນ​ທີ 8-10 ຕຸລາ 2020 ​ໂດຍ​ມີ ສະຫາຍ ນາງ ປານີ ຢາທໍ່ຕູ້ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ, ສະຫາຍ ບຸນຕົ້ນ ຈັນທະພອນ ເລຂາຄະນະບໍລິຫານງານພັກແຂວງ, ເຈົ້າແຂວງຊຽງຂວາງ; ມີບັນດາສະຫາຍ ຮອງເລຂາພັກແຂວງ, ຮອງປະທານກວດກາສູນກາງພັກ, ຄະນະປະຈໍາພັກແຂວງ, ກໍາມະການພັກແຂວງ  ​ແລະ ພາກສ່ວນທີ່ກ່ຽວຂ້ອງ ​ເຂົ້າ​ຮ່ວມ.

ກອງປະຊຸມຄັ້ງນີ້, ຜູ້ແທນກອງປະຊຸມໄດ້ພ້ອມກັນ ພິຈາລະນາຮັບຮອງ ແລະ ປະກອບຄຳຄິດຄຳເຫັນໃສ່ບັນຫາສຳຄັນຄື: ຮ່າງບົດສໍາຫລວດການນໍາພາລວມ ຂອງຄະນະພັກແຂວງ, ດຳເນີນການສຳຫລວດກວດກາ ຕໍ່ການຊີ້ນໍາ-ນໍາພາລວມ ຂອງຄະນະພັກ ແລະ ບຸກຄົນ, ພິຈາລະນາຮັບຮອງເອົາ ບຸກຄະລາກອນທີ່ ຈະສະໝັກຮັບເລືອກຕັ້ງ ເຂົ້າໃນຄະນະບໍລິຫານງານພັກ ແຂວງຊຽງຂວາງ ສະໄໝທີ VIII ແລະ ຄົ້ນຄວ້າຕົກລົງບັນຫາສໍາຄັນອື່ນໆ ເພື່ອກະກຽມຄວາມພ້ອມດ້ານຕ່າງໆ ໃຫ້ແກ່ການດຳເນີນກອງປະຊຸມໃຫຍ່ ອົງຄະນະພັກແຂວງຊຽງຂວາງ ຄັ້ງທີ VIII ໃຫ້ໄດ້ຮັບການຈັດຕັ້ງ ປະຕິບັດຕາມກໍານົດ ແລະ ມີຜົນສໍາເລັດຕາມຄາດໝາຍ, ນອກນີ້, ກອງປະຊຸມຍັງຈະໄດ້ຮັບຟັງການໂອ້ລົມ ແລະ ໃຫ້ທິດຊີ້ນໍາຈາກສະຫາຍ ນາງ ປານີ ຢາທໍ່ຕູ້ ຕື່ມ​ອີກ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)