ລັດຖະບານ​ຍີ່ປຸ່ນ ມອບ​ອຸປະກອນກິລາຄົນພິການ ພາຍໃຕ້ໂຄງການຊ່ວຍເຫລືອ ວັດທະ ນະທຳ ຂັ້ນຮາກຖານ ຂອງລັດຖະບານ ແລະ ປະຊາຊົນຍີ່ປຸ່ນ ​ເຊິ່ງປະກອບມີ: ຄານຍົກນໍ້າໜັກ ແລະ ຊຸດແຜ່ນນໍ້າໜັກ 2 ຊຸດ ລວມມູນຄ່າ 10.000 ກວ່າໂດລາສະຫະລັດ ແລະ ຕຽງ ສໍາລັບກິລາຍົກນໍ້າໜັກຄົນພິການ 2 ຊຸດ ລວມມູນຄ່າ 4.000 ກວ່າໂດລາສະຫະລັດ ​ເພື່ອໃຫ້ຄະນະກຳມະການ ພາຣາແລມປິກແຫ່ງຊາດລາວ, ຄູຝຶກ ແລະ ນັກກິລາຄົນພິການ ແລະ ຄົນບໍ່ພິການ ໄດ້ໄປນຳໃຊ້ເຂົ້າໃນການ ຝຶກແອບ-ຝຶກຊ້ອມ ຂອງນັກກິລາຄົນພິການ ແລະ ຄົນບໍ່ພິການ ໃຫ້ມີປະສິດທິຜົນ ພ້ອມທັງປົກປັກຮັກສາ ໄວ້ເປັນຢ່າງດີ.

ພິທີມອບ-ຮັບອຸປະກອນ ດັ່ງກ່າວ​ໄດ້​ຈັດ​ຂຶ້ນ ​ໃນວັນທີ 8 ຕຸລາ 2020 ຢູ່ນະຄອນຫລວງວຽງຈັນ ເຊິ່ງຕາງໜ້າ​ລັດຖະບານ​ຍີ່ປຸ່ນ ມອບໂດຍ ທ່ານ ທາເກວາກະ ເຄໂຊ ເອກອັກຄະຣາຊະທູດຍີ່ປຸ່ນ ປະຈຳ ສປປ ລາວ ແລະ ຮັບໂດຍ ທ່ານ ສີທາດ ຈັນທະບູລີ  ຮອງປະທານ ຄະນະກໍາມະການພາຣາແລມປິກແຫ່ງຊາດລາວ, ຫົວໜ້າຄະນະຮັບຜິດຊອບ ໂຄງການສະໜອງອຸປະກອນ ກິລາຄົນພິການ ໂດຍມີ ທ່ານ ນາງ ແສງເດືອນ ຫລ້າຈັນທະບູນ, ລັດຖະມົນຕີ ກະຊວງ ສຶກສາທິການ ແລະ ກິລາ ຮ່ວມເປັນສັກຂີພິຍານ.

ທ່ານ ນາງ ແສງເດືອນ ຫລ້າຈັນທະບູນ ໄດ້ກ່າວວ່າ: ການຊ່ວຍເຫລືອ ອຸປະກອນກິລາຄົນພິການ ພາຍໃຕ້ ໂຄງການຊ່ວຍເຫລືອ ວັດທະນະທໍາ ຂັ້ນຮາກຖານ ຂອງລັດຖະບານ ແລະ ປະຊາຊົນຍີ່ປຸ່ນ ໃນຄັ້ງນີ້ ມີຄວາມໝາຍຄວາມສຳຄັນ ເພາະແມ່ນການຊ່ວຍເຫລືອ ເພື່ອພັດທະນາຄົນພິການ ໃຫ້ມີໂອກາດເຄື່ອນໄຫວທາງດ້ານກິລາ-ກາຍຍະກໍາ ແລະ ສ້າງໄດ້ບັນຍາກາດ ສົດໃສຢູ່ໃນສັງຄົມ, ມີສຸຂະພາບແຂງ ແຮງ ທາງດ້ານຮ່າງກາຍ ແລະ ຈິດໃຈ, ມີນໍ້າໃຈກິລາຢ່າງຟົດຟື້ນ ແລະ ສົ່ງເສີມໃຫ້ຄົນພິການລາວ ທີ່ດ້ອຍໂອກາດ ໄດ້ມີໂອກາດເຂົ້າຮ່ວມ ຂະບວນການຄື່ອນໄຫວກິລາ ນັບມື້ນັບຫລາຍຂຶ້ນເທື່ອລະກ້າວ, ພິ ເສດແມ່ນ ຕໍ່ການພັດທະນາ ກິລາຍົກນໍ້າໜັກຄົນພິການລາວ ໃຫ້ໄດ້ມີອຸປະກອນການ ເຝິກແອບ-ຝຶກຊ້ອມ, ໄດ້ມາດຕະຖານສາກົນ ເພື່ອເຂົ້າຮ່ວມການແຂ່ງຂັນກິລາ ໃນລະດັບສາກົນ ກໍຄືການເຂົ້າຮ່ວມງານແຂ່ງຂັນກິລາພາຣາແລມປິກ ໂຕກຽວ ປີ 2021 ທີ່ຈະມາເຖິງນີ້ ໃຫ້ມີຜົນສຳເລັດ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)