ຈາກເຫດການພະຍຸໂນອຶນພັດຜ່ານເຂົ້າມາພາກໃຕ້ຂອງ ສປປລາວ ເວົ້າລວມກໍ່ຄືເມືອງກະລຶມ ແຂວງເຊກອງ ໃນລະຫວ່າງວັນທີ 18 – 20 ກັນຍາ ຜ່ານມານີ້ ໄດ້ສ້າງຄວາມເສຍຫາຍໃຫ້ແກ່ສັບສິນ, ຊີວິດ, ທີ່ຢູ່ອາໃສຂອງປະຊາຊົນ ແລະ ພື້ນຖານໂຄງລ່າງຫຼາຍສົມຄວນ ສະນັ້ນໃນຕອນແລງວັນທີ 8 ຕຸລາ 2020 ຄະນະກຳມະການປ້ອງກັນ ແລະ ຄວບຄຸມໄພພິບັດເມືອງກະລຶມ ໄດ້ຈັດກອງປະຊຸມສະຫຼຸບລາຍງານຄືນຜົນເສຍຫາຍຈາກພະຍຸໂນອຶນ ພາຍຫຼັງສຳເລັດການເກັບກຳຂໍ້ມູນໄລຍະທີ ll ຢູ່ທີ່ຫ້ອງປະຊຸມຊັ້ນສອງຫ້ອງວ່າການເມືອງດັ່ງກ່າວ ໂດຍໃຫ້ກຽດເຂົ້າຮ່ວມຂອງ ທ່ານ ສີເວີນ ສິງຫາລາດ ຮອງເຈົ້າເມືອງກະລຶມ ປະທານຄະນະກຳມະການປອງກັນ ແລະ ຄວບຄຸມໄພພິບັດຂັ້ນເມືອງ ພ້ອມດ້ວຍ ຄປພບ ຂັ້ນເມືອງ ແລະ ຂະແໜງການກ່ຽວຂ້ອງເຂົ້າຮ່ວມ. ທ່ານ ວັນໄຊ ຈັນທະຍັບ ຮອງປະທານຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນເມືອງ ລາຍງານໃຫ້ຮູ້ວ່າ: ຜ່ານການລົງເກັບກຳຂໍ້ມູນຜົນເສຍຫາຍຈາກພະຍຸໂນອຶນໄລຍະທີ 2 ຂອງຄະນະກຳມະການປ້ອງກັນ ແລະ ຄວບຄຸມໄພພິບັດເມືອງກະລຶມ ເຫັນວ່າມີບ້ານທີ່ຖືກກະທົບທັງໝົດ 15 ບ້ານ, ກະທົບຕໍ່ຄອບຄົວມີ 563 ຄອບຄົວ, ມີປະຊາຊົນເດືອດຮ້ອນທັງໝົດ 2,495 ຄົນ, ຍິງ 1,246 ຄົນ ແລະ ມູນຄ່າຜົນເສຍຫາຍເພີ່ມຂຶ້ນຈາກຂໍ້ມູນເບື້ອງຕົ້ນເກືອບ 2 ຕື້ ກີບ ເປັນ 3,424,776,000 ກີບ ໃນນັ້ນຂະແໜງກະສິກຳເສຍຫາຍ 1,974,400,000 ກີບ, ຂະແໜງສາທາລະນະສຸກ ເສຍຫາຍ 1,442,376,000 ກີບ, ຂະແໜງແຮງງານ ແລະ ສະຫວັດດີການສັງຄົມ ເສຍຫາຍ 8,000,000 ກີບ ແລະ ຂະແໜງ ຍທຂ ກະທົບຕໍ່ພື້ນຖານໂຄງລ່າງເສຍຫາຍຫຼາຍສົມຄວນ ແຕ່ຍັງບໍ່ສາມາດຄິດໄລ່ມູນຄ່າເສຍຫາຍໄດ້ ແລະ ຍັງມີຂໍ້ມູນປະຊາຊົນສູນຫາຍໃນວັນທີ 18 ກັນຍາ ຜ່ານມານີ້ ເພີ່ມຂຶ້ນອີກ 3 ຄົນ ລວມ ເປັນ 4 ຄົນ ຕາມການໃຫ້ຂໍ້ ມູນຂອງເຈົ້າໜ້າທີ່ໃນເບື້ອງຕົ້ນແມ່ນ ທ ອຶກ ອາຍຸ 45 ປີ ອາຊີບປະຊາຊົນຢູ່ບ້ານໂກລ ຖືກນ້ຳຫ້ວຍອາຣາງ ຊັດໄຫລ ຫາຍສາບສູນ ແລະ ຂໍ້ມູນໃໝ່ມີ ທ ອົວ ອາຍຸ 31 ປີ, ທ ໂນດ ອາຍຸ 24 ປີ, ທ ໂຍມ ອາຍຸ 50 ປີ ທັງ 3 ຄົນແມ່ນເປັນປະຊາຊົນ ບ້ານຕະລຸຍ ຖືກນ້ຳເຊກອງ ຊັດໄຫຼໄປພ້ອມ ກັນໃນຂະນະຂີ່ເຮືອກັບມາແຕ່ໄຮ່ ໃນນັ້ນ 4 ຄົນ ແຕ່ສາມາດລອດຊີວິດໄດ້ 1 ຄົນ ຄື ທ ຕຶບ ອາຍຸ 12 ປີ ສຳລັບ 3 ຄົນແມ່ນຖືກນ້ຳເຊກອງຊຸໄຫຼຫາຍສາບສູນ . ແນວໃດກໍ່ຕາມຈາກເຫດການດັ່ງກ່າວທີ່ເກີດຂຶ້ນຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນເມືອງ ໄດ້ແຕ່ງຕັ້ງພະນັກ ງານທີ່ກ່ຽວຂ້ອງ ຮ່ວມກັບເຈົ້າໜ້າທີ່ ປກສ ແລະ ປກຊ ເຂົ້າໄປຊ່ວຍເຫຼືອປະຊາຊົນທີ່ຖືກກະທົບຢ່າງຕໍ່ເນື່ອງ ພ້ອມທັງສຶບຕໍ່ເຝົ້າລະວັງສະພາບພະຍຸຝົນຕົກເຫດການທາງໄພພິບັດທີ່ອາດເກີດຂຶ້ນ ແລະ ວາງແຜນຟຶ້ນຟູຄວາມເສຍຫາຍຕໍ່ໜ້າຢ່າງລະອຽດ ທັງນີ້ກໍ່ເພື່ອຊ່ວຍເຫຼືອຢຽວຢາສະພາບຈິດໃຈຂອງປະຊາຊົນທີ່ຖືກກະທົບ ແລະ ປົວແປງຜົນເສຍຫາຍຄັ້ງນີ້ ໃຫ້ກັບຄືນສູ່ສະພາບປົກກະຕິໂດຍໄວ.

ພາບ-ຂ່າວ: #Medialaos ເມືອງກະລຶມ ແຂວງເຊກອງ