ວັນທີ 9 ຕຸລາ 2020 ທີ່ຫ້ອງວ່າການແຂວງຈຳປາສັກ ທ່ານ ວິໄລວົງ ບຸດດາຄຳ ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ ພ້ອມຄະນະໄດ້ຕ້ອນຮັບ ທ່ານ ຊອນ-ເບີນາດ ຄາຣາດສໂກ (Jean-Bernard CARRASCO) ເອກອັກຄະລັດຖະທູດ ອົດສະຕຣາລີ ປະຈຳລາວ ເພື່ອຢ້ຽມຢາມ ແລະ ກ່າວລາໜ້າທີ່ຢ່າງເປັນທາງການ ໃນການພົບປະ ທ່ານ ຊອນ-ເບີນາດ ຄາຣາດສໂກ ເອກອັກຄະລັດຖະທູດ ອົດສະຕຣາລີ ປະຈຳລາວ ໄດ້ກ່າວຮູ້ສຶກເປັນກຽດຢ່າງສູງ ທີ່ ທ່ານເຈົ້າແຂວງຈຳປາສັກ ໄດ້ໃຫ້ການຕ້ອນຮັບໃນການຢ້ຽມຢາມ ແລະ ພົບປະ ເພື່ອກ່າວລາໜ້າທີ່ໃນເທື່ອນີ້.

ເຊິ່ງຕະຫຼອດໄລະຍະ 3 ປີ ທີ່ມາດຳລົງຕຳແໜ່ງເປັນເອກອັກຄະລັດຖະທູດ ປະຈຳລາວ ແຂວງຈຳປາສັກ ແມ່ນເປັນແຂວງທຳອິດທີ່ໄດ້ມາຢ້ຽມຢາມ ເຊິ່ງມັນສະແດງໃຫ້ເຫັນຄວາມສຳຄັນ ໂດຍສະເພາະແມ່ນສາຍພົວພັນຮ່ວມມື ໃນການຊຸກຍູ້ ພັດທະນາແຂວງຈຳປາສັກ ຮ່ວມກັນ ແລະ ທ່ານໄດ້ຍົກໃຫ້ເຫັນເຖິງ 68 ປີ ແຫ່ງສາຍພົວພັນການທູດລະຫວ່າງ ສປປລາວ ແລະ ອົດສະຕຣາລີ ທ່ານ ວິໄລວົງ ບຸດດາຄຳ ເຈົ້າແຂວງຈຳປາສັກ ໄດ້ກ່າວຕ້ອນຮັບ ແລະ ຕີລາຄາສູງ ຕໍ່ການມາຢ້ຽມຢາມ ຂອງທ່ານເອກອັກຄະລັດຖະທູດ ອົດສະຕຣາລີ ປະຈຳລາວ ໃນເທື່ອນີ້ ແລະ ທ່ານໄດ້ລາຍງານໃຫ້ຮູ້ຄືນເຖິງການຈັດຕັ້ງປະຕິບັດວຽກງານ, ສາຍພົວພັນການຮ່ວມມື ລະຫວ່າງອົດສະຕຣາລີ ແລະ ແຂວງຈຳປາສັກ ເຊິ່ງຜ່ານມາການລົງທຶນ, ການຮ່ວມມື ແລະ ການຊ່ວຍເຫຼືອ ຂອງພາກລັດ ແລະ ເອກະຊົນຂອງປະເທດອົດສະຕຣາລີ ມີຈຳນວນ ທັງໝົດ 17 ໂຄງການ ໃນນັ້ນໂຄງການລົງທຶນ ມີ1 ໂຄງການມູນຄ່າ 385,411 ໂດລາສະຫະລັດ ແລະ ໂຄງການຊ່ວຍເຫຼືອເພື່ອການພັດທະນາມີ 16 ໂຄງການ, ມູນຄ່າ 4,89 ລ້ານ ໂດລາສະຫະລັດ ກວມເອົາ 4 ຂະແໜງການຂອງແຂວງຄື: ຂະແໜງແຮງງານ ແລະສະຫວັດດີການ-ສັງຄົມ, ຂະແໜງສາທາລະນະສຸກ, ຂະແໜງພະລັງງານ ແລະບໍ່ແຮ່ ແລະ ຂະແໜງພັດທະນາຊົນນະບົດ ແລະ ລຶບລ້າງຄວາມທຸກຍາກ.

ໂອກາດດັ່ງກ່າວ ທ່ານເຈົ້າແຂວງຈຳປາສັກ ໄດ້ສະແດງຄວາມຂອບໃຈ ມາຍັງທ່ານ ເອກອັກຄະລັດຖະທູດ ປະຈຳ ສປປ ລາວ ຜ່ານໄປຍັງລັດຖະບານ ປະເທດອົດສະຕຣາລີ ທີ່ຍາມໃດກໍ່ໄດ້ໃຫ້ຄວາມເອົາໃຈໃສ່ ຊ່ວຍເຫຼືອລັດຖະບານລາວ ໂດຍສະເພາະໃຫ້ການຮ່ວມມືໃນການພັດທະນາ ແຂວງຈຳປາສັກ ແລະ ຂໍໃຫ້ການຮ່ວມມື ລະຫວ່າງ ສປປ ລາວ ແລະ ປະເທດ ອົດສະຕຣາລີ ໄດ້ເຕີບໃຫຍ່ຂະຫຍາຍຕົວຂື້ນຢ່າງບໍ່ຢຸດຢັ້ງ ແລະ ອວຍພອນແດ່ທ່ານ ຊອນ-ເບີນາດ ຄາຣາດສໂກ ເອກອັກຄະລັດຖະທູດ ແລະ ຄອບຄົວ ຈົ່ງມີສຸຂະພາບເຂັ້ມແຂງ ປະສົບຜົນສຳເລັດໃນພາລະກິດທີ່ມີກຽດສະຫງ່າ.

ພາບ-ຂ່າວ: ມີເດຍລາວ ແຂວງຈຳປາສັກ