ວັນທີ 9 ຕຸລາ 2020 ນີ້ ຫ້ອງການສາທາລະນະສຸກ ເມືອງສາລະວັນ ນໍາໂດຍທ່ານ ດຣ ແສງເດືອນ ເມືອງຈັນ ຫົວໜ້າຫ້ອງການສາທາລະນະສຸກເມືອງສາລະວັນ ໃຫ້ກຽດເຂົ້າຮ່ວມໃນຄັ້ງນີ້ມີທ່ານ ໜູຄໍາ ສີສະຫວັດ ຮອງເຈົ້າເມືອງສາລະວັນ ຜູ້ຊີ້ນໍາວຽກງານວັດທະນະທໍາ-ສັງຄົມ, ທ່ານ ນາງ ດຣ ບຸນໂຮມ ໂງ່ນກະເສີມສຸກ ຮອງຫົວໜ້າພະແນກສາທາລະນະສຸກແຂວງສາລະວັນ, ມີຮອງຫ້ອງ ການສາທາເມືອງ, ພະນັກງານວິຊາການ, ສະມາຊິກຊາວໜຸ່ມຈາກພະແນກສາທາລະນະສຸກແຂວງ, ເລຂາພັກ-ນາຍບ້ານ 2 ບ້ານ, ສະມາຊິກພາຍໃນບ້ານໂພນແກ້ວ ແລະ ບ້ານວັດກາງ ເຂົ້າ ຮ່ວມ. ທ່ານ ໝໍ ພວງມາລາ ຈໍາປາຄໍາ ຮອງຫົວໜ້າຫ້ອງການສາທາລະນະສຸກເມືອງ ກໍ່ໄດ້ໃຫ້ສໍາພາດກັບນັກຂ່າວ ກ່ຽວກັບຈຸດປະສົງຂອງການລົງສ້າງຂະບວນການຢູ່ໃນ 2 ບ້ານຄື: ບ້ານວັດກາງ ແລະ ບ້ານໂພນແກ້ວ ນີ້ກໍ່ເພື່ອເປັນການທໍາລາຍແຫຼ່ງເພາະພັນໜອນນໍ້າຍຸງລາຍ ທີ່ມີການແຜ່ເຊື້ອຢູ່ໃນຂອບເຂດໂດຍສະເພາະແມ່ນຈຸດທີ່ມີຄວາມແອອັດ, ຮົກເຮື້ອ, ນໍ້າຂັງ; ໃນໄລຍະຜ່ານມາທາງໜ່ວຍງານຕ່າງໆ ທີ່ກ່ຽວຂ້ອງ ກໍ່ໄດ້ເອົາໃຈໃສ່ໃນການລົງຕິດຕາມ ເຊິ່ງ 9 ເດືອນຜ່ານມາທົ່ວເມືອງສາລະວັນ ມີຄົນຕິດເຊື້ອເພີ່ມຂຶ້ນ 210ຄົນ, ໃນ 36 ບ້ານ.

ໃນໄລຍະທີ່ເຊື້ອພະຍາດໄຂ້ຍຸງລາຍ ພວມແຜ່ລະບາດຢູ່ໃນຫຼາຍທ້ອງຖິ່ນ ແລະ ກໍລະນີຕິດເຊື້ອກໍເພີ່ມຂຶ້ນ ເຊິ່ງໃນນັ້ນເມືອງ ແລະ ແຂວງສາລະວັນ ກໍ່ເປັນເມືອງໜຶ່ງທີ່ມີຈໍານວນກໍລະນີຕິດເຊື້ອຫຼາຍກວ່າ 200 ກວ່າຄົນ ທັງນີ້ເພື່ອສະກັດກັ້ນ ແລະ ປ້ອງກັນການແຜ່ລະບາດພະຍາດໄຂ້ຍຸງລາຍ ຫ້ອງການສາທາລະນະສຸກເມືອງສາລະວັນ ກໍ່ໄດ້ເອົາໃຈໃສ່ປຸກລະດົມປະຊາຊົນເປັນເຈົ້າການໃນການອະນາໄມຂອບເຂດເຮືອນຂອງຕົນ ເພື່ອທໍາລາຍແຫຼ່ງເພາະພັນ ແລະ ປະຈຸບັນໄດ້ມີການສ້າງຂະບວນການໂດຍສົມທົບກັບອໍານາດການປົກຄອງ 2 ບ້ານ ນອກນັ້ນຍັງມີຊາວໜຸ່ມ 4 ບຸກ ໄດ້ເຂົ້າມາຊ່ວຍຢ່າງເປັນຂະບວນພົດພື້ນ ເຊິ່ງມີສ່ວນຮ່ວມຈາກຊຸມຊົນຫຼາຍທີ່ສຸດກິດຈະກໍາໃນການລົງຄັ້ງນີ້ແມ່ນໄດ້ມີການຂ້ວມກະໂປະ, ກະປ໋ອງ, ແຈກຢາຍຊາຍອາເບດໃສ່ນໍ້າເພື່ອບໍ່ໃຫ້ມີໜອນນໍ້າໄດ້ແຜ່ກະຈາຍ, ເພາະວ່າໂຕໜອນນໍ້າຈະເປັນຕົວນໍາເຊື້ອ ເຮັດໃຫ້ຄົນເຮົາເປັນໄຂ້ເລືອດອອກໃນໄລຍະຜ່ານມາ, ຈາກນັ້ນທ່ານກໍ່ຍັງໄດ້ຮຽກຮ້ອງໃຫ້ພໍ່ແມ່ປະຊາຊົນຈົ່ງເອົາໃຈໃສ່ໃນການປ້ອງກັນພະຍາດໄຂ້ຍູງ ໃຫ້ປະຕິບັດຕາມ 5 ປໍຄື: ປໍທີໜຶ່ງແມ່ນປໍປິດພາຊະນະນໍ້າທີ່ມີ, ປໍທີສອງແມ່ນໝັ່ນປ່ຽນນໍ້າຢູ່ໃນອຸໃນແອ່ງ, ປໍທີສາມແມ່ນປໍປ່ອຍໆປາຫາງນົກຍູງ, ປໍທີສີ່ແມ່ນປໍປັບປຸງເຮັດອະນາໄມ 3 ສະອາດ ແລະ ປໍທີຫ້າ ແມ່ນປໍປະຕິບັດທຸກຄົນແມ່ນເປັນເຈົ້າການເອົາໃຈໃສ່ປະຕິບັດ ໂດຍສະເພາະປະຊາ ຊົນທຸກຄອບຄົວຕ້ອງໄດ້ມີສ່ວນຮ່ວມໃນການປະຕິບັດ 5ປໍ ຈຶ່ງຈະບໍ່ເປັນພະຍາດໄຂ້ຍູງລາຍ ແລະ ໄຂ້ເລືອດອອກ.

ພາບ-ຂ່າວ: ມີເດຍລາວ ແຂວງສາລະວັນ