ວັນທີ 8 ຕຸລາ 2020 ແຂວງຄຳມ່ວນ ໄດ້ຈັດກອງປະຊຸມຄົບຄະນະບໍລິຫານງານພັກແຂວງຄຳມ່ວນ ຄັ້ງທີ 17 ສະໄໝທີ IX ແລະ ໄດ້ສຳເລັດລົງພາຍຫຼັງທີ່ໄດ້ດຳເນີນມາເປັນເວລາ 2 ວັນທີ່ເຮືອນຮັບແຂກເລກ 1 ຂອງແຂວງຄໍາມ່ວນ ໂດຍພາຍໃຕ້ການເປັນປະທານຂອງ ສະຫາຍ ໂອໄດ ສຸດາພອນ ກຳມະການສູນກາງພັກ, ເລຂາພັກແຂວງຄຳມ່ວນ, ມີບັນດາສະຫາຍໃນຄະນະປະຈຳ, ຄະນະບໍລິຫານງານພັກແຂວງ, ເລຂາພັກເມືອງ, ເລຂາຄະນະພັກຮາກຖານ, ຫົວໜ້າພະແນກການ ແລະ ບັນດາອົງການຈັດຕັ້ງຕ່າງໆ ອ້ອມຂ້າງແຂວງເຂົ້າຮ່ວມ. ຕະຫລອດໄລຍະຂອງການດຳເນີນກອງປະຊຸມຄັ້ງທີ 17 ທ້າຍສະໄໝນີ້ ແມ່ນໄດ້ຕີລາຄາເປັນເອກະພາບຫລາຍບັນຫາ, ການລາຍງານ, ການປະກອບຄຳເຫັນຂອງບັນດາຈາກຫລາຍພາກສ່ວນສາມາດຢັ້ງຢືນໄດ້ເຖິງຜົນສຳເລັດໃນຫລາຍດ້ານ ໂດຍສະເພາະການຈັດຕັ້ງປະຕິບັດມະຕິກອງປະຊຸມຄົບຄະນະບໍລິຫານງານພັກແຂວງຄັ້ງທີ 16 ສະໄໝທີ IX, ການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມຂອງແຂວງ ແລະ ການຈັດຕັ້ງປະຕິບັດແຜນງົບປະມານຂອງແຂວງ ( ລາຍຮັບ – ລາຍຈ່າຍ ) ປະຈຳ 9 ເດືອນ 2020.

ການລາຍງານໃນການກະກຽມຄວາມພ້ອມດ້ານຕ່າງໆ ເພື່ອດຳເນີນກອງປະຊຸມໃຫຍ່ຄັ້ງທີ່ X ຂອງອົງຄະນະພັກແຂວງທີ່ຈະໄດ້ໄຂຂຶ້ນໃນໝໍ່ໆ ນີ້. ໃນໂອກາດນີ້ເພື່ອເປັນທິດໃນການສືບຕໍ່ວຽກງານໃນຕໍ່ໜ້າ ສະຫາຍ ໂອໄດ ສຸດາພອນ ຍັງໄດ້ກ່າວມີຄຳເຫັນຄືດັ່ງນີ້ : ສືບຕໍ່ເສີມຂະຫຍາຍໄຊຊະນະ, ຜົນສຳເລັດອັນໃຫຍ່ຫລວງ ແລະ ມີຄວາມໝາຍປະຫວັດສາດ. ທຸກພາກສ່ວນເອົາໃຈໃສ່ເພີ່ມທະວີການນຳພາວຽກງານປ້ອງກັນຊາດ – ປ້ອງກັນຄວາມສະຫງົບ, ຄຸ້ມຄອງການເຄື່ອນໄຫວອົງການຈັດຕັ້ງຕ່າງໆ ໃຫ້ຮັດກຸມ, ແທດເຖິງຕົວຈິງ, ສຸມໃສ່ການແກ້ໄຂປະກົດການຫຍໍ້ທໍ້ຂອງສັງຄົມ, ສຸມໃສ່ນຳພາໃນການຈັດຕັ້ງປະຕິບັດບັນດາໜ້າວຽກທີ່ໄດ້ກຳນົດໄວ້ໃນມະຕິກອງປະຊຸມຄົບຄະນະພັກແຂວງ ຄັ້ງທີ 16 ທີ່ເຫັນວ່າຍັງບໍ່ທັນໄດ້ຈັດຕັ້ງປະຕິບັດສຳເລັດ ຂົງເຂດເສດຖະກິດເອົາໃຈໃສ່ດຶງດູດການລົງທຶນ ແລະ ແກ້ໄຂໜີ້ສິນ, ຊຸກຍູ້ການປະຕິບັດໂຄງການລົງທຶນ, ການກໍ່ສ້າງສ້ອມແປງຂົວທາງໂດຍສະເພາະທຶນທີ່ໄດ້ຮັບການອະນຸມັດຊ່ວຍເຫຼືອຈາກຕ່າງປະເທດ, ໂຄງການແກ້ໄຂໄພພິບັດທີ່ສະພາປະຊາຊົນຮັບຮອງ, ຂົງເຂັດວັດທະນະທຳ – ສັງຄົມສືບຕໍ່ຊຸກຍູ້ໃສ່ປະຕິບັດເປົ້າໝາຍການພັດທະນາທີຍືນຍົງຂອງຂະແໜງການສຶກສາ ແລະ ຂະແໜງສາທາລະນະສຸກແຂວງໃຫ້ບັນລຸເພື່ມຂຶ້ນພ້ອມນັ້ນກໍ່ສຸມໃສ່ຕິດຕາມຮັບມືແກ້ໄຂບັນຫາການລະບາດຂອງພະຍາດຕາມລະດູການ ແລະ ເອົາໃຈໃສ່ໃນການປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນພະຍາດໂຄວິດ 19 ທີ່ລັດຖະບານວາງອອກຢ່າງເຂັ້ມງວດ.

ຄຽງຄູ່ກັບການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມນັ້ນຕ້ອງໄດ້ສືບຕໍ່ຊີ້ນຳຊຸກຍູ້ການດຳເນີນກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງ ທີ່ຈະເປີດຂຶ້ນໃນຕົ້ນເດືອນພະຈິກ 2020 ນີ້ ເພື່ອຮັບປະກັນໃນການກຽມຄວາມພ້ອມທຸກດ້ານເປັນຕົ້ນແມ່ນການສືບຕໍ່ຍູ້ແຮງວຽກງານສ້າງຂະບວນການຕ່າງໆ ຢ່າງເປັນຂະບວນຟົດຟື້ນ, ສຸມໃສ່ກວດກາຄືນດ້ານກະກຽມດ້ານເນື້ອໃນໃຫ້ສຳເລັດ, ກະກຽມດ້ານໂຄງປະກອບບຸກຄະລາກອນຕາມຄຳແນະນຳຂອງຂັ້ນເທິງ, ການທາບທາມບຸກຄະລາກອນຮອບ 3 ແລະ ການກະກຽມຜູ້ແທນສົມບູນໃຫ້ກວດກາແນະນຳຕື່ມ ຕະຫຼອດຮອດວຽກງານການບໍລິຫານຮັບໃຊ້ ແລະ ວຽກງານປ້ອງກັນດ້ານຕ່າງໆ ໃຫ້ມີຄວາມຖືກຕ້ອງສອດຄ່ອງກັບສະພາບຕົວຈິງ, ສອດຄ່ອງຕາມຄຳສັ່ງ – ຄໍາແນະນຳຂອງຂັ້ນເທິງ ແລະ ໄດ້ຮັບຜົນສຳເລັດຕາມຄາດໝາຍ.

ພາບ-ຂ່າວ: ມີເດຍລາວ ແຂວງຄຳມ່ວນ