ວັນທີ 4 ຕຸລາ 2020 ໄດ້ມີພິທີແຫ່ຜ້າກັນຖິ່ນສາມັກຄີປະເພນີ ໂບຣານຫຼວງພະບາງ ຊື່ງໄດ້ຈັດຂຶ້ນທີ່ວັດສີພຸດທະບາດ ໂດຍແມ່ນທ່ານ ນາງ ພາດີ ນໍຣະສິງ ຈາກນະຄອນຫຼວງວຽງຈັນ ເປັນເຈົ້າສັດ ທາເຄົ້າ ພ້ອມດ້ວຍລູກເຕົ້າ ແລະ ຊາວພຸດທະສາສະນິກະຊົນຈາກນະຄອນຫຼວງວຽງຈັນ ແລະ ນະຄອນຫຼວງພະບາງ ເຂົ້າຮ່ວມຢ່າງຫຼວງຫຼາຍ ຂະບວນແຫ່ກັນຖິນສາມັກຄີໃນຄັ້ງນີ້ມີທັງໝົດ 5ຂະບວນຄື: ຂະບວນພະສົງສາມະເນນ, ຂະບວນເຈົ້າສັດທາ ແລະ ຊາຍຖືຄັນຮົ່ມໂບຣານແຫ່ເຈົ້າສັດທາ 17ທ່ານ, ຂະບວນ ຊາຍສີ່ຄົນຫາມຕຽງ ແລະ ຍິງຊຸດລາວຖືເຄື່ອງກອງບຸນ ອັດຖະບໍລິຂານຕ່າງໆ, ຂະບວນອອກຕົນຍາດໂຍມທົ່ວໄປ ແລະ ຂະບວນເສບລະນາດ ຂະບວນຟ້ອນວັດທະນະທຳລາວ.

ໂດຍເລີ່ມແຫ່ຈາກຂ້າງສິມ ວັດສີພຸດທະບາດ ໄປອ້ອມສິມວັດປ່າຝ່າງ 3 ຮອບ, ຫຼັງຈາກນັ້ນກໍ່ເຊີນເຈົ້າສັດທາເຂົ້າໃນສິມ ສູ່ພິທີຖວາຍຜ້າກັນຖິ່ນ, ຈາກນັ້ນກໍເຂົ້າຮັບສິນຮັບພອນຖວາຍກອງບຸນອັດຖະ ເປັນອັນວ່າຈົບພິທີ ສັດທາທີ່ໄດ້ຮັບຈາກການຖອດກັນຖິນສາມັກຄີປະເພນີໂບຣານຫຼວງພະບາງໃນຄັ້ງນີ້ ແມ່ນມີຍອດໂມທະນາທັງໝົດ 64 ລ້ານກວ່າກີບ ທັງໝົດນີ້ແມ່ນຈະໄດ້ນຳໃຊ້ເຂົ້າໃນການບູລະນະວັດສີພຸດທະບາດ ແລະ ເສຍຄ່ານໍ້າຄ່າໄຟພາຍໃນວັດໃຫ້ເກີດຄວາມເຫຼື້ອມໃສ ຂອງເຈົ້າມູນລະສັດທາທັງຫຼາຍທັງປວງ ທີ່ໄດ້ຮ່ວມໂມທະນາບຸນໃນຄັ້ງນີ້.

ພາບ-ຂ່າວໂດຍ: ດາວອນ ມະນີວັນ