ໃນ​ໄລ​ຍະ​ກອງ​ປະ​ຊຸມ ​ສະ​ມັດ​ຊາ​ໃຫຍ່​ອົງ​ການ ​ສະ​ຫະ​ປະ​ຊາ​ຊາດ ຄັ້ງ​ທີ 75, ທ່ານສະ​ເຫລີມ​ໄຊກົມ​ມະ​ສິດ ລັດ​ຖະ​ມົນ​ຕີ​ ກະ​ຊວງ​ການ​ຕ່າງ​ປະ​ເທດ, ໄດ້ເຂົ້າ​ຮ່ວມ ແລະ ກ່າວ​ບົດ​ປາ​ໄສ​ຕໍ່​ກອງ​ປະ​ຊຸມທາງ​ໄກປະ​ຈຳ​ປີ ​ລະ​ດັບ​ລັດ​ຖະ​ມົນ​ຕີ ຂອງ​ຂະ​ບວນ​ການ​ບໍ່​ຮ່ວມ​ກຸ່ມ (The Online Ministerial Meeting of the Non-Aligned Movement on the margins of the High-level General Debate of the 75th Session of the United Nations General Assembly) ພາຍ​ໃຕ້​ຫົວ​ຂໍ້ “ບັນ​ດຸງ+65 ຂະ​ບວນ​ການ​ ບໍ່​ຮ່ວມ​ກຸ່ມ​ທີ່​ມີ​ຄຸນ​ຄ່າ, ມີ​ຄວາມ​ເປັນ​ເອ​ກະ​ພາບ ແລະ ມີ​ປະ​ສິດ​ທິ​ຜົນ​ຫລາຍ​ຍິ່ງ​ຂຶ້ນໃນ​ການ​ຮັບ​ມື​ກັບ ​ສິ່ງ​ທ້າ​ທາຍ​ສາ​ກົນ​ ທີ່​ເກີດ​ຂຶ້ນ​ລວມ​ທັງ​ພະ​ຍາດ COVID-19 (Bandung+65: More relevant, United and Effective NAM against Emerging Global Challenges, including COVID-19”​​ ເຊິ່ງຈັດ​ຂຶ້ນ​ໃນວັນທີ 09 ຕຸລາ 2020, ພາຍໃຕ້​ການ​ເປັນ​ປະ​ທານ ​ຂອງ​ປະ​ເທດ​ອາ​ແຊັກ​ໄບ​ຊານ.

ກອງ​ປະ​ຊຸມ​ໄດ້​ຈັດ​ຂຶ້ນ ເພື່ອ​ປຶກ​ສາ​ຫາ​ລື ແລະ ແລກ​ປ່ຽນ​ຄວາມ​ຄິດ​ເຫັນ​ ກ່ຽວ​ກັບ​ສິ່ງ​ທ້າ​ທາຍ​ຕ່າງໆ​ ທີ່​ເກີດ​ຂຶ້ນ​ໃນ​ພາກ​ພື້ນ ແລະ ສາ​ກົນ. ​ໃນ​ການ​ປະ​ກອບ​ຄຳ​ເຫັນ​ ຂອງ​ຄະ​ນະ​ຜູ້​ແທນ​ ແມ່ນ​ໄດ້​ຢ້ຳ​ຄືນ​ບັນ​ດາ​ຄວາ​ມໝາຍ​ໝັ້ນ ແລະ ຫລັກ​ການ​ຂອງ​ຂະ​ບວນ​ການ​ບໍ່​ຮ່ວມ​ກຸ່ມ ແລະ ສົ່ງ​ເສີມ​ການ​ຮັດ​ແໜ້ນ​ການ​ຮ່ວມ​ມື​ ຂອງ​ບັນ​ດາ​ປະ​ເທດ​ສະ​ມາ​ຊິກ ເພື່ອ​ຮ່ວມ​ມື​ກັນ ​ແກ້​ໄຂ​ບັນ​ຫາ ແລະ ສິ່ງ​ທ້າ​ທາຍ​ຕ່າງໆ. ກອງ​ປະ​ຊຸມ​ໄດ້​ຮັບ​ຮອງ​ ເອົາ​ຖະ​ແຫລງ​ການ​ ທາງ​ດ້ານ​ການ​ເມືອງ​ ລະ​ດັບ​ລັດ​ຖະ​ມົນ​ຕີ ​ວ່າ​ດ້ວຍ​ຫລັກ​ການ ​ບັນ​ດຸງ​ຄົບ​ຮອບ 65 ປີ ຂະ​ບວນ​ການ​ບໍ່​ຮ່ວມ ​ກຸ່ມ​ທີ່​ມີ​ຄຸນ​ຄ່າ, ມີ​ຄວາມ​ເປັນ​ເອ​ກະ​ພາບ ແລະ ມີ​ປະ​ສິດ​ທິ​ຜົນ​ຫລາຍ​ຍິ່ງ​ຂຶ້ນ ໃນ​ການ​ຮັບ​ມື​ກັບ ​ສິ່ງ​ທ້າ​ທາຍ​ສາ​ກົນ​ ທີ່​ເກີດ​ຂຶ້ນ​ລວມ​ທັງການ ​ແຜ່​ລະ​ບາດ​ພະ​ຍາດ COVID-19.

ທ່ານ ສະ​ເຫລີມ​ໄຊ ກົມ​ມະ​ສິດ ​ໄດ້​ກ່າວ​ບົດ​ປາ​ໄສ​ໃນ​ກອງ​ປະ​ຊຸມ ​ໂດຍ​ເນັ້ນ​ເຖິງ​ຄວາມ​ສຳ​ຄັນ​ ຂອງ​ການ​ຍຶດ​ຖື​ ຫລັກ​ການ​ບັນ​ດຸງ ​ທີ່​ເປັນ​ຫລັກ​ການ​ຕົ້​ນ​ກຳ​ເນີດ​ ຂອງ​ຂະ​ບວນ​ການ​ບໍ່​ຮ່ວມ​ກຸ່ມ ຄື:​ ເພື່ອສັນ​ຕິ​ພາບ, ເອ​ກະ​ລາດ, ອະ​ທິ​ປະ​ໄຕ, ຄວາມ​ສະ​ເໜີ​ພາບ ແລະ ການ​ບໍ່​ແຊກ​ແຊງ​ເຂົ້າ​ ກິດ​ຈະ​ການ​ພາຍ​ໃນ​ຂອງ​ກັນ ແລະ ກັນ ພ້ອມ​ທັງຊົມ​ເຊີຍ ​65 ​ປີ​ ຂອງ​ຫລັກ​ການ​ດັ່ງ​ກ່າວ. ພ້ອມ​ດຽວ​ກັນ​ນັ້​ນ, ໄດ້​ກ່າວ​ເຖິງ​ຄວາມ​ສຳ​ຄັນ ​ໃນ​ການ​ປັບ​ປຸງ​ອົງ​ການ ​ສະ​ຫະ​ປະ​ຊາ​ຊາດ ​ເພື່ອ​ໃຫ້​ສາ​ມາດ​ຮັບ​ມື​ກັບ ​ສິ່ງ​ທ້າ​ທາຍ​ທີ່​ເກີດ​ຂຶ້ນ​ ໃນ​ຍຸກ​ປັດ​ຈຸ​ບັນ ​ທາມ​ກາງ​ການ​ ສະ​ເຫລີມ​ສະ​ຫລອງ​ ການ​ສ້າງ​ຕັ້ງ​ອົງ​ການ ​ສະ​ຫະ​ປະ​ຊາ​ຊາດ​ ຄົບ​ຮອບ 75 ປີ. ນອກ​ນັ້ນ, ໄດ້​ຕີ​​ລາ​ຄາຜົນ​ກະ​ທົບ​ ຂອງ​ພະ​ຍາດ​ລະ​ບາດ COVID-19 ແລະ ເນັ້ນ​ໜັກ​​ໃສ່​ການ​ຮັດ​ແໜ້ນ​ ຄວາມ​ສາ​ມັກ​ຄີ​ຂອງ​ສາ​ກົນ​ ໃນ​ການ​ຮ່ວມ​ມື​ຕໍ່​ສູ້​ ກັບ​ພະ​ຍາດດັ່ງ​ກ່າ​ວ​ ຢ່າງ​ມີ​ປະ​ສິດ​ທິ​ຜົນ.

ຂະ​ບວນ​ການ​ບໍ່​ຮ່ວມ​ກຸ່ມ (Non-Aligned Movement-NAM) ໄດ້​ຮັບ​ການ​ສ້າງ​ຕັ້ງ​ຂື້ນ ໃນ​ປີ 1961 ​ໂດຍ​ບັນ​ດາ​ປະ​ເທດ​ກຳ​ລັງ​ພັດ​ທະ​ນາ ​ທີ່​ບໍ່​ຕ້ອງ​ການ​ຮ່ວມ​ກຸ່ມ ຫລື ເປັນ​ປໍ​ລະ​ປັກ​ກັບ​ຝ່າຍ​ໃດ​ໃນ​ໄລ​ຍະ​ສົງ​ຄາມ​ເຢັນ, ຈຸດ​ປະ​ສົງ​ຫລັກ​ຂອງ NAM ແມ່ນ​ເພື່ອ​ຮັກ​ສາ​ ຄວາມ​ເປັນ​ເອ​ກະ​ລາດ, ສະ​ຖ​ຽນ​ລະ​ພາບ, ອະ​ທິ​ປະ​ໄຕ ແລະ ຄວາມ​ໝັ້ນ​ຄົງ​ ຂອງ​ປະ​ເທດ​ສະ​ມາ​ຊິກ ໂດຍ​ການ​ຮ່ວມ​ມື​ປະ​ຕິ​ບັດ ​ຕາມ​ຫລັກ​ການ​ບັນ​ດຸງ (Bandung Principle) ທີ່​ສົ່ງ​ເສີມ​ການ​ຮ່ວມ​ມື ແລະ ສັນ​ຕິ​ພາບ​ຂອງ​ໂລກ ເຊິ່ງ​ປັດ​ຈຸ​ບັນ​ ມີ​ປະ​ເທດ​ສະ​ມາ​ຊິກ​ທັງ​ໝົດ 125 ປະ​ເທດ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)