ນັບ​ແຕ່ເດືອນມັງກອນ ຫາ ​ເດືອ​ນກັນຍາ​ 2020 ນີ້, ​ເມືອງ​ຄຳ​ເກີດ​ ແຂວງ​ບໍລິ​ຄຳ​​ໄຊ ສາມາດ​ປະຕິບັດ​​ ໜ້າ​ທີ່​ສຳ​ຫລວດ, ກວດ​ກູ້, ທຳລາຍ​ລະ​ເບີດ​ບໍ່​ທັນ​ແຕກ ແລະ ລູກປືນໃຫຍ່ ຢູ່ 33 ບ້ານ​, ໄດ້​ເກືອ​ບ 300 ລູກ, ມີ​ເນື້ອ​ທີ່​ທັງ​ໝົດ​ເກືອບ 400 ກວ່າ​ເຮັກຕາ, ເຊິ່ງແມ່ນ​ກອງ​ກວດ​ກູ້ ​ລະ​ເບີດ​ເພື່ອ​ມະນຸດສະທຳ 58 ກອງ​ທັບ​ປະຊາຊົນ​ລາວ ​ເປັນ​ຜູ້​ສຳ​ຫລວດ​-ກວ​ດກູ້, ​ໂດຍ​ການ​ສະໜອງ​ທືນ ຈາກອົງການກອຍກາ ສ.ເກົາຫລີ ​​ຜ່ານອົງການສະຫະປະຊາຊາດ ​ເພື່ອ​ການ​ພັດທະນາ ປະຈຳ​ລາວ ​ແລະ ຫ້ອງການຄະນະ ກຳມະການຄຸ້ມຄອງແຫ່ງຊາດ ເພື່ອແກ້ໄຂລະເບີດ ບໍ່ທັນແຕກທີ່ຕົກຄ້າງ ໃນລາວ.

ໃນ​ລະຫວ່າງ​ວັນ​ທີ 13-14 ຕຸລາ 2020 ນີ້, ຫ້ອງການຄະນະກໍາມະ ການຄຸ້ມຄອງແຫ່ງຊາດ ເພື່ອແກ້ໄຂລະເບີດ ບໍ່ທັນແຕກ ທີ່ຕົກຄ້າງໃນລາວ, ນຳ​ໂດຍ​ ທ່ານ ໂຈມແຍງ ແພງທອງສະຫວັດ ຫົວໜ້າຫ້ອງການຄະນະ ກຳມະການດັ່ງ​ກ່າວ, ພ້ອມດ້ວຍຜູ້ຕາງໜ້າ ​ຈາກອົງການສະຫະ ປະຊາຊາດ​ ເພື່ອ​ການ​ພັດທະນາ ແລະ ອົງການກອຍກາ ພ້ອມ​ຄະນະ ​ໄດ້​ລົງຢ້ຽມຢາມການ ປະຕິບັດໜ້າທີ່ສໍາຫລວດ, ກວດກູ້ ແລະ ທໍາລາຍລະເບີດພາກສະໜາມ ຢູ່ເມືອງຄໍາເກີດ ແຂວງ ບໍລິຄໍາໄຊ ​ເພື່ອລົງເບິ່ງສະພາບ ຕົວຈິງຢູ່ສະໜາມ ວ່າມີຂໍ້ສະດວກ, ຂໍ້ຫຍຸ້ງຍາກ, ສິ່ງທ້າທາຍ ໃນ​ການ​ເກັບ​ກູ້​ລະ​ເບີດ, ລວມ​ເຖິງຄວາມຈຳ​ເປັນ ​ແລະ ຄວາມຕ້ອງ ການ​ດ້ານ​ຕ່າງໆ​ ໃນ​ການ​ປະຕິບັດ​ໜ້າ​ທີ່ ແລ້ວນໍາເອົາບັນຫາ ເຫລົ່ານັ້ນໄປປັບປຸງ ແລະ ຊ່ວຍໃນການລະດົມທືນ ຊ່ວຍເຫລືອໃນຕໍ່ໜ້າ.

​ໂອກາດ​ດັ່ງກ່າວ, ທ່ານ ກິ ສົງລາວາງ ຮອງເລຂາພັກເມືອງຄໍາເກີດ ​ແຂວງ​ບໍລິ​ຄຳ​ໄຊ ​ໄດ້​ລາຍ​ງານ​ໃຫ້​ຮູ້ ກ່ຽວ​ກັບສະພາບການສໍາຫລວດ, ກວດກູ້ ແລະ ທໍາລາຍລະເບີດບໍ່​ທັນ​ແຕກ ຢູ່ເມືອງ ຄໍາ​ເກີດ ​​ວ່າ: ​ເມືອງ​ຄຳ​ເກີດ ​ເປັນ​ເມືອງ​ໜຶ່ງ ທີ່​ໄດ້​ຮັບ​ຜົນ​ກະ​ທົບ​ ​ແລະ ມີ​ລະ​ເບີດ​ທີ່​ບໍ່​ທັນ​ແຕກ ​ຕົກຄ້າງ​ແຕ່​ປາງ​ສົງຄາມ, ​ເຊິ່ງ​ໜ່ວຍ​ງານ​ສຳ​ຫລວດ, ກວດ​​ກູ້​ ​ແລະ ທຳລາຍລະ​ເບີດ ກໍ​ໄດ້​ຈັດ​ຕັ້ງ​ປະຕິບັດທຳ ລາຍ​ລະ​ເບີດ​ທີ່​ບໍ່​ທັນ​ແຕກ​ ໄປ​ຈຳ​ນວນ​ໜຶ່ງ​ແລ້ວ ຈົນ​ມາ​ຮອດປັດຈຸ​ບັນ ​ກອງ​ກວດ​ກູ້​ລະ​ເບີດ​ ເພື່ອ​ມະນຸດ ສະທຳ 58 ກອງ​ທັບ​ປະຊາຊົນ​ລາວ ກໍ​ໄດ້ສືບຕໍ່ສໍາຫລວດ ແລະ ກວດກູ້ລະເບີດຢ່າງຕໍ່ເນື່ອງແຕ່ປີ 2017 ເປັນຕົ້ນມາ, ໂດຍໄດ້ປະຕິບັດຕາມ ມາດຖານການ ສຳຫລວດ, ກວດກູ້ແຫ່ງຊາດ ວາງອອກຢ່າງເຄັ່ງຄັດ ແລະ ຈະສຳຫລວດໃຫ້ໄດ້ 80% ຂຶ້ນໄປໃນຈໍານວນ 62 ບ້ານ ທົ່ວເມືອງຄຳເກີດ. ປັດຈຸບັນ ພວມສືບ​ຕໍ່ສຳ​ຫລວດ ​ແລະ ທຳລາຍ​ລະ​ເບີດ ຢູ່ໃນເຂດເນື້ອທີ່ທໍາການຜະລິດ, ບ່ອນ​ທຳ​ມາ​ຫາ​ກິນ​ຂອງ​ປະຊາຊົນ ຢູ່​ບ້ານ​ທົ່ງ​ວຽງ​ຄຳ ເມືອງ​ຄຳ​ເກີດ ​ແຂວງ​ບໍລິ​ຄຳ​ໄຊ, ​ເຊິ່ງ ທ່ານ ສອນ​ສີ ບຸນ​ລື​ໄຕ ຫົວໜ້າ​ຜູ້​ຊີ້​ນຳພາ​ກສະໜາມ​ ​ໄດ້ລາຍ​ງານ​ໃຫ້​ຮູ້​ວ່າ: ​​ໄດ້​ເລີ່​ມລົງ​ມືເກັບ​ກູ້​ລະ​ເບີດ ໃນ​ຕົ້ນ​​ເດືອ​ນຕຸລາ 2020 ​ເປັນ​ຕົ້ນ​ມາ, ລວມເນື້ອ​ທີ່​ທັງໝົດ 60 ພັນ​ກວ່າ​ຕາ​ແມັດ, ປັດຈຸ​ບັນ ​ສາມາດ​ເກັບ​ກູ້ລະ​ເບີ​ດ​ໄດ້​ແລ້ວ 15 ພັນ ຕາ​ແມັດ, ຍັງ​ຢູ່ 46 ພັນ​ກວ່າ​ຕາ​ແມັດ, ຄາດ​ວ່າ​ຈະ​​ເກັບ​ກູ້ລະ​ເບີດ ໃຫ້​ສຳ​ເລັດ ​ໃນ​ຕົ້ນ​ເດືອນ​ພະຈິກ 2020 ນີ້.

​ໃນ​ການ​ລົງ​ຢ້ຽມ​ຢາມ​​ຄັ້ງ​ນີ້, ຄະນະດັ່ງກ່າວ ໄດ້ເດີນທາງໄປຢ້ຽມຢາມ ​ແລະ ​ເຂົ້າ​ຮ່ວມການກິດຈະກໍາ ຂອງກອງກວດກູ້ລະ​ເບີດ ເພື່ອມະນຸດສະທໍາ 58 ກອງທັບປະຊາຊົນ​ລາວ ຢູ່ໂຮງຮຽນປະຖົມສົມບູນ ບ້ານທົ່ງວຽງຄໍາ ເປັນຕົ້ນ ໂຄສະນາຄວາມອັນຕະລາຍ ຂອງລະເບີດບໍ່ທັນແຕກ ທີ່ຕົກຄ້າງຕາມທີ່ຢູ່ອາໄສ, ໄຮ່ນາ-ຮົ້ວສວນ ໃຫ້ຄູ-ອາຈານ, ນ້ອງນັກຮຽນ ແລະ ປະຊາຊົນ ​ໄດ້​ຮັບ​ຮູ້​ເຂົ້າ​ໃຈ​ຢ່າງ​ທົ່ວ​ເຖິງ, ​ເຊິ່ງຫລາຍທ່ານ ກໍໄດ້ສະແດງຄວາມດີໃຈ ທີ່ທີມງານກວດກູ້ລະເບີດ ໄດ້ມາແນະນໍາໃຫ້ຄວາມຮູ້​ ​ແລະ ວິທີປ້ອງກັນ ລວມ​ເຖິງທີມງານ ທີ່ໄດ້ມາຊ່ວຍກວດກູ້ ລະເບີດ​ໃນ​ຄັ້ງ​ນີ້, ​ເຊິ່ງ​ເປັນ​ການ​ປະກອບສ່ວນ ເຮັດໃຫ້ປະຊາຊົນພາຍ​ໃນ​ບ້ານ ກໍ​ຄື ຊາວ​ເມືອງ​ຄຳ​ເກີດ ​ແຂວງ​ບໍລິ​ຄຳ​​ໄຊ ມີຄວາມປອດໄພຈາກໄພອັນ ຕະລາຍຂອງລະເບີດ ທີ່ບໍ່​ທັນ​ແຕກ. ພ້ອມ​ນັ້ນ, ຄະນະ​ດັ່ງ​ກ່າວ ກໍ​ໄດ້​ເດີນທາງ ໄປ​ຢ້ຽມຢາມ​ ພາກ​ໜາມ​ເກັບ​ກູ້​ລະ​​ເບີດ ຢູ່ ບ້ານຫ້ວຍແກ້ວ 2 ເມືອງຄຳເກີດ ​ແຂວງ​ບໍລິ​ຄຳ​ໄຊ ຕື່ມ​ອີກ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)