ທ່ານ ຄຳພັນ ເໝືອນສິດທິດາ ປະທານສະມາຄົມ ສິລະປະແຄນລາວ ໄດ້ໃຫ້ສຳພາດ ຕໍ່ສື່ມວນຊົນ ໃນວັນທີ 13 ຕຸລາ 2020 ນີ້ວ່າ: ເພື່ອສ້າງຄວາມຍືນຍົງ ໃນການອະນຸລັກຮັກສາແຄນ, ການເປົ່າແຄນ, ການເຮັດແຄນ, ເຊິ່ງສະມາຄົມສິລະປະແຄນລາວ ໄດ້ເອົາໃຈໃສ່ປັບປຸງແກ້ໄຂ ໂດຍສະເພາະ ແມ່ນການສືບຕໍ່ ການອະນຸລັກຮັກສາ ແລະ ເສີມຂະຫຍາຍມູນເຊື້ອແຄນ ແລະ ສຽງແຄນເຊື້ອຊາດລາວ ໃຫ້ໄດ້ຮັບການພັດທະນາ ແລະ ຍືນຍົງ ຢູ່ຄູ່ກັບປະ ຊາຊົນຄົນລາວ ແລະ ຊາດລາວເຮົາຕະຫລອດໄປ.

ທ່ານ ຄຳພັນ ເໝືອນສິດທິດາ ໃຫ້ຮູ້ຕື່ມວ່າ: ແຄນ ແລະ ສຽງແຄນ ໄດ້ກຳເນີດເກີດຂຶ້ນ ກັບຄົນລາວ ມາຫລາຍກວ່າ 3 ພັນປີ ແລະ ມີຫລາຍກວ່າ 100 ລາຍແຄນ, ໂດຍພູມປັນຍາ ຂອງບັນພະບູລຸດລາວ ເປັນຜູ້ປະດິດຂຶ້ນມາ. ແຄນແມ່ນເຄື່ອງດົນຕີ ອຳມະຕະຂອງຊາດລາວ ຕິດພັນກັບວິຖີຊີວິດ ວັດທະນະທຳ ແລະ ຮີດຄອງປະເພນີ ອັນດີງາມຂອງຄົນລາວ ບັນດາເຜົ່າມາແຕ່ດຶກດຳບັນ, ບໍ່ວ່າຈະຢູ່ໃນໄລຍະຕໍ່ສູ້ກູ້ຊາດ ກໍຄື ໄລຍະປົກປັກຮັກສາ ແລະ ສ້າງສາພັດທະນາ ປະເທດຊາດ. ປັດຈຸບັນ, ພັກ-ລັດ ຍາມໃດກໍໄດ້ໃຫ້ ຄວາມສຳຄັນຕໍ່ແຄນ ແລະ ສຽງແຄນເຊື້ອຊາດລາວ, ຍ້ອນເຫັນຄວາມສຳຄັນວ່າ ແຄນ ແລະ ສຽງແຄນ ມັນຕິດພັນກັບວິຖີຊີວິດ ແລະ ວັດທະນະທຳ ຂອງຄົນລາວ ຊາດລາວ ທີ່ເປັນມໍລະດົກ ສືບທອດກັນແຕ່ໃດໆມາ, ເກີດ, ເຈັບ, ຕາຍ ກໍໃຊ້ແຄນ, ທຳພິທີກຳຕ່າງໆ ທາງຮີດຄອງປະ ເພນີກໍໃຊ້ແຄນ, ສະເຫລີມສະຫລອງຜົນງານ ແລະ ໄຊຊະນະ ກໍໃຊ້ແຄນ. ດັ່ງນັ້ນ, ທາງພວກເຮົາກໍໄດ້ສົມທົບ ກັບພາກສ່ວນທີ່ກ່ຽວຂ້ອງ ສະເໜີ ຕໍ່ອົງການອຸຍເນັສໂກ ເພື່ອຈົດທະບຽນສຽງແຄນເຊື້ອຊາດລາວ ເປັນມໍລະດົກໂລກ ແລະ ໄດ້ຖືກຮັບຮອງເອົາໃນວັນທີ 7 ທັນວາ 2017.

ທັງນີ້, ກໍເພື່ອສົ່ງເສີມ ການອະນຸລັກຮັກສາ ແລະ ເສີມຂະຫຍາຍມູນເຊື້ອ ສຽງແຄນເຊື້ອຊາດລາວ ມໍລະດົກໂລກໃຫ້ສູງຂຶ້ນ ສະມາຄົມໄດ້ຮ່ວມກັບ ພາກສ່ວນຕ່າງໆ ແລະ ຂະແໜງການທີ່ກ່ຽວ ຂ້ອງ ປຸກລະດົມໃຫ້ທົ່ວປວງຊົນລາວ, ລູກຫລານອານະຊົນຄົນຮຸ່ນໃໝ່ ໃຫ້ຮ່ຳຮຽນການເປົ່າແຄນ, ປະ ດິດສ້າງແຄນ, ຝຶກອົບຮົມຮຽນເອົາ ສິລະປະສຽງແຄນລາວ ໃຫ້ຫລາຍຂຶ້ນ, ໃຫ້ມີການພັດທະນາ ແລະ ມີຄວາມຍືນຍົງຄູ່ກັບຄົນລາວ ແລະ ຊາດລາວຕະຫລອດໄປ.

ນອກນີ້, ຍັງໄດ້ສະເໜີ ໃຫ້ມີມາດຕະການ ອອກຄຳແນະນຳ ໃຫ້ວົງດົນຕີໃຫຍ່, ນ້ອຍ ໃຫ້ມີແຄນປະກອບເຂົ້າ ໃນການເສບ ທີ່ເປັນເອກະລັກຂອງຊາດລາວ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)