ເພື່ອ​ເປັນ​ການ​ຮັດ​ແໜ້ນ​ມິດ​ຕະ​ພາບ ແລ​ະ ການ​ຮ່ວມ​ມື​ທີ່​ດີ ກໍ່​ຄື​ເປັນ​ການ​ສ້າງ​ຂະ​ບວນ​ການ​ຂ່ຳ​ນັບ​ຮັບ​ຕ້ອນກອງ​ປະ​ຊຸມ​ໃຫ​ຍ່ຜູ້​ແທນ​ອົງ​ຄະ​ນະ​ພັກ​ກະ​ຊວງ​ຖະ​ແຫຼງ​ຂ່າວ ວັດ​ທະ​ນະ​ທຳ ແລະ ທ່ອງ​ທ່ຽວ ແລະ ສ້າງ​ຂະ​ບວນ​ການ​ຂ່ຳ​ນັບ​ຮັບ​ຕ້ອນ​ວັນ​ຊາດ ທີ 2 ທັນ​ວາ ຄົບ​ຮອບ 45 ປີ; ສະ​ມາ​ຄົມ​ນັກ​ຂ່າວແຫ່ງ ສ​ປ​ປ ລາວ ແລະ ບໍ​ລິ​ສັດ ປິໂຕຣລ້ຽມແຫ່ງປະເທດໄທ (ປ​ຕ​ທ ຈຳກັດ ມະຫາຊົນ) ໄດ້ຈັດ​​ການ​ແຂ່​ງ​ຂັນ​ກິ​ລາ​​ບາ​ນເຕະ​ມິ​ດ​ຕະ​ພາບ ທີ່​ເດີ່ນ​ກິ​ລາ​ຟຸດ​ຊໍ ຟີຣາຣີ ໃນ​ວັນ​ທີ 16 ຕຸ​ລາ 2020 ໂດຍ​ການ​ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສະ​ຫວັນ​ຄອນ ຣາ​ຊະ​ມົນ​ຕີ ຮອງ​ລັດ​ຖະ​ມົນ​ຕີ​ກະ​ຊວງ​ຖະ​ແຫຼງ​ຂ່າວ ວັດ​ທະ​ນະ​ທຳ ແລະ ທ່ອງ​ທ່ຽວ, ປະ​ທານ​ສະ​ມາ​ຄົມນັກ​ຂ່າວແຫ່ງ ສ​ປ​ປ ລາວ ພ້ອມ​ທັງ​ການ​ນຳ​ກະ​ຊວງ​-ຄະ​ນະ​ບໍ​ລິ​ຫານ​ງານສະມາຄົມ ດັ່ງ​ກ່າວ ແລະ​ ຝ່າຍ ປ​ຕ​ທ ນຳ​ໂດຍທ່ານ ວັນ​ສະ​ຫວ່າງ ສ່ອງ​ແສງ ຮອງ​ອຳ​ນວຍ​ການ ນອນ​ອອຍ ບໍ​ລິ​ສັດ ປ​ຕ​ທ (ລາວ) ຈຳ​ກັດ ພ້​ອມ​ດ້ວ​ຍ​ນັກ​ກິ​ລາ ແລະ ກອງ​ຊົມ-ກອງ​ເຊຍ​ຂອງ​ທັງ 2 ຝ່າຍ.

ການແຂ່ງຂັນກິລາຄັ້ງນີ້ ໄດ້ເລີ່ມຂຶ້ນກ່ອນຕາເວັນຈະສິ້ນແສງ ຊຶ່ງທັບນັກກິລາຈາກ ປຕທ ທີ່ເປັນຄົນໜຸ່ມແໜ້ນຈຳນວນຫຼາຍ ກໍ່ໄດ້ນຳໜ່ວຍບານຂຶ້ນປະຊິດໜ້າປະຕູຂອງສະມາຄົມນັກຂ່າວຢ່າງລຽນຕິດ ແຕ່ກໍ່ຖືກແຮງຕ້ານຈາກກອງຫຼັງຂອງສະມາຄົມນັກຂ່າວເຊັ່ນກັນ ແລະ ຍ້ອນພາລະກຳລັງຂອງນັກກິລາ ປຕທ ເໜືອກ່ວາ ຈຶ່ງສົ່ງຜົນໃຫ້ມີການຖະຫຼົ່ມປະຕູຂອງສະມາຄົມນັກຂ່າວລຽນຕິດ ແລະ ນຳໄປກ່ອນ 3-4 ປະຕູ; ໃນເວລາຕໍ່ມາດ້ວຍຄວາມມີມານະບວກກັບປະສົບການມານານປີຂອງທິມນັກຂ່າວ ຈຶ່ງສາມາດໂຕ້ກັບຄືນໄດ້ເຊັ່ນດຽວກັນ ໂດຍແມ່ນການຍິງລູກທຳອິດຂອງທ່ານ ຈັກກີ ນັກຍິງຈາກໂທລະພາບແຫ່ງຊາດລາວ, ຕາມມາດ້ວຍການຍິງປະຕູຂອງທ່ານ ວັນສີ ຮອງ ລມຕ ໜຸ່ມ, ທ່ານ ກອງຄຳ ຫົວໜ້າຂ່າວໂທລະພາບ…. ແລະລູກທີ 5 ແມ່ນການປິດສາກຂອງທ່ານ ວັນໄຊ ຫົວໜ້າ ບກ ປະຊາຊົນ ແລະ ເປັນອັນວ່າ: ຄະນະກິລາບານເຕະຈາກ ປຕທ ສາມາດເອົາຊະນະ ຄະນະກິລາຈາກສະມາຄົມນັກຂ່າວຢ່າງວຸດວິດ 6 ຕໍ່ 5.

ໃນໂອກາດນີ້, ທ່ານ ສະຫວັນຄອນ ຣາຊະມົນຕີ ປະທານສະຄົມນັກຂ່າວແຫ່ງ ສປປ ລາວ ໄດ້ກ່າວສະແດງຄວາມຊົມເຊີຍຕໍ່ການຮ່ວມມືຈັດກິດຈະກຳກິລາ ເພື່ອຮັກສາສຸຂະພາບ, ເພີ່ມຄວາມຮັກແພງເຊິ່ງກັນ ແລະ ກັນ, ທັງເປັນນິມິດໝາຍທີ່ດີໃນລັກສະນະສ້າງສັນ, ຂໍໃຫ້ສືບຕໍ່ມີການພົວພັນ ແລະ ຮ່ວມມືກັນໃຫ້ດີຂຶ້ນກ່ວາເກົ່າ ເພື່ອປະກອບສ່ວນເຂົ້າໃນການພັດທະນາວຽກງານສື່ມວນຊົນ; ທາງດ້ານທ່ານຮອງອຳນວຍການ ວັນສະຫວ່າງ ສ່ອງແສງ ກໍ່ໄດ້ສະແດງຄວາມເພິ່ງພໍໃຈຕໍ່ການພົບປະ, ແຂ່ງຂັນກິລາມິດຕະພາບໃນຄັ້ງນີ້ ແລະ ທັງນຳສະເໜີຄວາມເປັນມາ ແລະ ຜະລິດຕະພັນຄຸນນະພາບນ້ຳມັນຂອງ ປຕທ, ການບໍລິການດ້ານຕ່າໆທີ່ປິ່ນອ້ອມ ເປັນຕົ້ນກາເຟ ອາເມຊອນ… ຂອງບໍລິສັດ ປິໂຕຣລຽມແຫ່ງປະເທດໄທ ໂດຍສະເພາະ ບໍລິສັດ ປຕທ (ລາວ) ຈຳກັດ ແລະ ບໍລິສັດດັ່ງກ່າວຍັງມອບເຄື່ອງນຸ່ງກິລາໃຫ້ສະມາຄົມນັກຂ່າວອີກ 25 ຊຸດ.

 ຂ່າວ-ພາບ: ຣັດສະໝີ ດວງສັດຈະ