ວັນທີ 20 ຕຸລາ 2020 ຢູ່ທະນາຄານຮ່ວມທຸລະກິດລາວ-ຫວຽດ (ທລວ) ໄດ້ມີພິທີລົງນາມການສະໜອງທຶນ ກ່ຽວກັບສະໜັບສະໜູນສິນເຊື່ອໃຫ້ບໍລິສັດໂອເຊຍໂນຈຳກັດ ເພື່ອປະກອບສ່ວນພັດທະນາໂຄງການສວນວັດທະນະທຳລ້ານຊ້າງ (ຫຼັກ 16) ໂດຍມີທ່ານ ຫງວຽນ ດຶກ ວູ້ ຮອງຜູ້ອຳນວຍການໃຫຍ່ ທລວ ແລະ ທ່ານ ຄອນຄຳ ອິນທະວົງ ປະທານບໍລິສັດໂອເຊຍໂນຈຳກັດ ທ່ານ ຫງວຽນ ວັນ ບິງ ຜູ້ອຳນວຍການໃຫຍ່ ທລວ ພ້ອມດ້ວຍຄະນະບໍລິຫານ ແລະ ພະນັກງານກ່ຽວຂ້ອງທັງສອງຝ່າຍເຂົ້າຮ່ວມ.

    ທ່ານ ຄອນຄຳ ອິນທະວົງ ກ່າວວ່າ: ບໍລິສັດ ໂອເຊຍໂນຈໍາກັດ ສ້າງຕັ້ງ ແລະ ດໍາເນີນທຸລະກິດແຕ່ປີ 2012 ເປັນຕົ້ນມາ ໂດຍເບື້ອງຕົ້ນໄດ້ດຳເນີນທຸລະກິດຂົງເຂດກໍ່ສ້າງຜ່ານການເຕີບໃຫຍ່ຂະຫຍາຍຕົວ ແລະ ອີງໃສ່ຄວາມຕ້ອງການຂອງສັງຄົມ ກໍ່ຄືການປະກອບສ່ວນສ້າງສາພັດທະນາປະເທດຊາດ ປັດຈຸບັນໄດ້ລົງທຶນຫຼາຍຂົງເຂດທຸລະກິດ ເປັນຕົ້ນທຸລະກິດປະກັນໄພ ທຸລະກິດອະສັງຫາ ທຸລະກິດຮັກສາຄວາມປອດໄພ ສະຖາບັນການເງິນຈຸລະພາກທີ່ບໍ່ຮັບເງິນຝາກ ໂຄງການກະສິກຳລ້ຽງສັດ ພັດທະນາບັນດາໂຄງການຍຸດທະສາດຂອງລັດຖະບານ ເຊັ່ນ: ໂຄງການໂຮງໝໍ 300 ຕຽງ ໂຄງການພັດທະນາສວນວັດທະນະທຳລ້ານຊ້າງ (ຫຼັກ 16) ເຊິ່ງເປັນໂຄງບຸລິມະສິດທີ່ລັດຖະບານໃຫ້ຄວາມສໍາຄັນ ຄາດວ່າມູນຄ່າການລົງທຶນ 80 ລ້ານໂດລາສະຫະລັດ ມາຮອດວັນທີ 9 ຕຸລາ 2020 ທລວ ໄດ້ເຊັນໜັງສືສະໜັບສະ ໜູນສິນເຊື່ອໃນວົງເງິນ 30 ລ້ານໂດລາສະຫະລັດ ໃຫ້ບໍລິສັດໂອເຊຍໂນຈຳກັດ ໃນການປະກອບທຶນເພື່ອພັດທະນາໂຄງການສວນວັດທະນະທຳລ້ານຊ້າງ (ຫຼັກ 16) ເຊິ່ງເປັນນິມິດໝາຍທີ່ດີໃນການຮ່ວມມື ຂອງສອງຫົວໜ່ວຍທຸລະກິດໃນການຮ່ວມມືພັດທະນາໂຄງການ ກໍ່ຄືການຮ່ວມມືພັດທະນາປະເທດລາວ ຕາມແນວທາງ ແລະ ແຜນພັດທະນາເສດຖະກິດຂອງລັດຖະບານ.

    ການສະໜອງຜະລິດຕະພັນຂອງ ທລວ ຢ່າງຮອບດ້ານໃຫ້ບໍລິສັດໂອເຊຍໂນຈຳກັດ ຄັ້ງນີ້ມີຄວາມໝາຍສໍາຄັນ ເຮັດໃຫ້ສາຍພົວພັນຂອງສອງຫົວໜ່ວຍທຸລະກິດນັບມື້ໄດ້ຮັບການພັດທະນາຮ່ວມມືບົນພື້ນຖານຕ່າງຝ່າຍຕ່າງໄດ້ຮັບຜົນປະໂຫຍດ ແລະ ເປັນຄູ່ຮ່ວມມືດ້ານທຸລະກິດຍຸດທະສາດທີ່ພັກ ແລະ ລັດຖະບານໄວ້ວາງໃຈໃນການພັດທະນາໂຄງການບຸລິມະສິດໃນອະນາຄົດ.

#ພາບ-ຂ່າວ: ສະບາໄພ