ພ້ອມໃຈກັນປົກປັກຮັກສາຮູບປັ້ນຫຼໍໍ່ເຄິ່ງຄີງ ທ່ານ ໂຮ່ເຊ ມາກຕີ ວິລະຊົນແຫ່ງຊາດກູບາໄວ້ເປັນມູນເຊື້ອໃຫ້ລູກຫຼານນັກຮຽນໄດ້ສຶກສາຄົ້ນຄວ້າເອົາເປັນແບບຢ່າງ ເຊິ່ງການປະດິດສະຖານຮູບຫຼໍ່ເຄິ່ງຄີງຂອງວິລະຊົນກູບາຕັ້ງຢູ່ໂຮງຮຽນ ມສ ມິດຕະພາບລາວ-ກູບາເປັນແຫ່ງທຳອິດໃນ ສປປລາວ.

ພາຍຫຼັງທີ່ໄດ້ມີການມອບຮັບເພື່ອປະດິດສະຖານຮູບຫຼໍ່ເຄິ່ງຄີງຂອງວິລະຊົນກູບາ ແລະ ເປີດປ້າຍໂຮງຮຽນ ມສ ດົງບັງມິດຕະພາບ ລາວ-ກູບາໃນຕອນເຊົ້າວັນທີ20ຕຸລາ2020ນີ້ ທາງອຳນາດການປົກຄອງບ້ານນາສາລາ ແລະ ບ້ານດົງບັງໄດ້ພ້ອມໃຈກັນປົກປັກຮັກສາຮູບປັ້ນຫຼໍເຄິ່ງຄີງຂອງ ທ່ານ ໂຮ່ເຊ ມາກຕີ ວິລະຊົນແຫ່ງຊາດກູບາໄວ້ເພື່ອເປັນມູນເຊື້ອໃຫ້ລູກຫລານນັກຮຽນໄດ້ສຶກສາຄົ້ນຄວ້າເພື່ອເອົາເປັນແບບຢ່າງ. ທ່ານ ສິງທອງ ອິນທະວົງ ນາຍບ້ານດົງບັງ ເມືອງໄຊທານີ ນວໄດ້ບອກກັບນັກຂ່າວມີເດຍລາວວ່າ: “ພວກເຮົາຈະໄດ້ພ້ອມກັນປົກປັກຮັກສາຮູບປັ້ນນີ້ໄວ້ ແລະ ເຜີຍແຜ່ປະຫວັດຂອງທ່ານ ໂຮ່ເຊ ມາກຕີໃຫ້ກັບລູກຫຼານນັກຮຽນພ້ອມກັນຮຽນຮູ້ເພື່ອນຳມາປັບເຂົ້າໃນການດຳລົງຊີວິດຂອງຕົນເອງ”.

ພ້ອມນັ້ນ ທ້າວ ຈູຈີ ຈະສົ໋ວເກົ້່າ ນັກຮຽນ ມສ ມິດຕະພາບ ລາວ-ກູບາ ແລະ ນາງ ແພວາ ແກ້ວມີໄຊ ນັກຮຽນ ມສ ມິດຕະພາບ ລາວ-ກູບາ ໄດ້ບອກວ່າ: “ຕາງໜ້າຊາວໜຸ່ມເຍົາວະຊົນພາຍໃນໂຮງຮຽນ ມສ ມິດຕະພາບ ລາວ-ກູບາໄດ້ບອກເປັນຈິດໜຶ່ງໃຈດຽວກັນ ຈະພ້ອມໃຈກັນປົກປັກຮັກສາຮູບປັ້ນຫຼໍໍ່ເຄິ່ງຄີງຂອງ ທ່ານ ໂຮ່ເຊ ມາກຕີ ວິລະຊົນແຫ່ງຊາດກູບາໄວ້ເພື່ອສຶກສາຮໍ່າຮຽນ ແລະ ຄົ້ນຄວ້ານໍ້າໃຈຮັກເຊື້ອແພງຊາດເໝືອນດັ່ງທ່ານ ໂຮ່ເຊ ມາກຕີ”.

ເພື່ອເປັນການຢໍ້າໃຫ້ເຫັນຄວາມສຳຄັນໃນການປະດິດສະຖານຮູບຫຼໍ່ເຄິ່ງຄີງຂອງ ທ່ານ ໂຮ່ເຊ ມາກຕີ ວິລະຊົນແຫ່ງຊາດກູບາໃນຄັ້ງນີ້ ທ່ານ ສຈ ປອ ຈະເລີນ ເຍຍປາວເຮີ ປະທານສະມາຄົມມິດຕະພາບ ລາວ-ກູບາໄດ້ຍົກໃຫ້ເຫັນວ່າ: “ການປະດິດສະຖານຮູບຫຼໍ່ເຄິ່ງຄີງຂອງວິລະຊົນກູບາຢູ່ ໂຮງຮຽນ ມສ ມິດຈະພາບລາວ-ກູບາເປັນແຫ່ງທຳອິດຢູ່ໃນ ສປປລາວ ເຊິ່ງສະແດງໃຫ້ເຫັນເຖິງຄວາມຫັດແໜ້ນສາຍພົວພັນມິດຕະພາບຖານອ້າຍນ້ອງທີ່ມີມູນເຊື້ອລະຫວ່າງປະຊາຊົນສອງຊາດລາວ ແລະ ກູບາ ໄປສູ່ບາດກ້າວໃຫມ່” .

ການກຳນົດເອົາໂຮງຮຽນ ມສ. ດົງບັງ ເປັນໂຮງຮຽນມິດຕະພາບ ລາວ-ກູບາ ນີ້ເພື່ອເປັນສັນຍາລັກແຫ່ງການພົວພັນມິດຕະພາບ ແລະ ການຮ່ວມມື ທີ່ມີມູນເຊື້ອອັນດີງາມ ລະຫວ່າງ ສອງພັກ, ສອງລັດ ກໍຄືປະຊາຊົນສອງຊາດ, ທັງເປັນສະຖານທີ່ໃນການສຶກສາອົບຮົມ ແລະ ເຜີຍແຜ່ກ່ຽວກັບປະຫວັດສາດແຫ່ງການຕໍ່ສູ້ປະຕິວັດຂອງປະຊາຊົນກູບາ, ເຜີຍແຜ່ກ່ຽວກັບຮີດຄອງປະເພນີ ແລະ ວັດທະນະທຳ ຂອງ ກູບາ ຢູ່ລາວເປັນໂອກາດທີ່ດີໃຫ້ໄວໜຸ່ມລາວໄດ້ຮຽນຮູ້ກ່ຽວກັບຊີວິດ, ແນວຄິດ ແລະ ການເຄື່ອນໄຫວປະຕິວັດເພື່ອເອກະລາດແຫ່ງຊາດ ຂອງ ທ່ານ ໂຮ່ເຊ ມາກຕີ ວິລະຊົນແຫ່ງຊາດກູບາ ຕື່ມອີກ.

ຮູບປັ້ນຫຼໍໍ່ເຄິ່ງຄີງ ທ່ານ ໂຮ່ເຊ ມາກຕີ ວິລະຊົນແຫ່ງຊາດກູບາໄດ້ປະດິດສະຖານທີ່ໂຮງຮຽນມິດຕະພາບ ລາວ-ກູບາ ຫຼື ໂຮງຮຽນ ມສ ດົງບັງ ເມືອງໄຊທານີ ນະຄອນຫຼວງວຽງຈັນ.

ໂດຍ ຈັນສະໝອນ ວົງສົດ