ໃນ​ລະຫວ່າງ​ວັນ​ທີ 20-22 ຕຸ​ລາ 2020 ທ່ານ ທັນ​ສະ​ໄໝ ກົມ​ມະ​ສິດ ລັດຖະມົນຕີກະຊວງ​ໄປສະນີ, ໂທລະ​ຄົມມະນາຄົມ ​ແລະ ການ​ສື່ສານ (ປທສ) ພ້ອມ​ດ້ວຍ​ຄະນະ ໄດ້​ເຂົ້າ​ຮ່ວມກອງ​ປະຊຸມ​ໂຕະ​ມົນລ​ະ​ດັບ​ລັດ​ຖະ​ມົນ​ຕີ ຂອງອົງ​ການ​ສະ​ຫະ​ພາບ​ໂທ​ລະ​ຄົມ​ມະ​ນາ​ຄົມ​ສາ​ກົນ (ITU) ໃນ​ງານໄອ​ທີ​ຢູດິ​ຈິ​ຕອນໂລກ 2020 (ITU Virtual Digital World 2020) ຜ່ານລະ​ບົບກອງປະຊຸມທາງໄກ ຊຶ່ງ​ງານ​ດັ່ງ​ກ່າວ​ແມ່ນ​ຈັດ​ຂຶ້ນ​ໂດຍ ອົງ​ການ ITU ຮ່ວມ​ກັບກະ​ຊວງຖະ​ແຫຼງ​ຂ່າວ ແລະ ການ​ສື່​ສານ ສ.​ສ ຫວຽດ​ນາມ.

ງານ ITU Virtual Digital World ​ຈັດ​ຂຶ້ນພາຍ​ໃຕ້​ຫົວ​ຂໍ້ “ການ​ສ້າງ​ໂລກ​ດິ​ຈິ​ຕອນດ້ວຍ​ກັນ” ເພື່ອ​ສຳຫຼວດການຫັນເປັນດິຈິຕອນໃນພາກພື້ນ ແລະ ທົ່ວໂລກ. ໂດຍເປັນ​ເວທີ​​​ສຳ​ລັບພາກ​ລັດ​​, ຜູ້​ວາງ​ນະ​ໂຍບາຍໄອ​ຊີ​ທີ, ຜູ້​ປະກອບ​ການ​​ ແລະ ສະຕາດອັບຕ່າງໆ ໄດ້​ມາ​ພົບ​ປະ, ສົນ​ທະ​ນາ​ກັນ, ແລ​ກ​ປ່ຽນຄວາມຄິດເຫັນໂດຍສຸມໃສ່ບັນຫາສຳຄັນທີ່ກ່ຽວຂ້ອງກັບການພັດທະນາເສດຖະກິດດິຈິຕອນໃນປະ​ຈຸ​ບັນ ແລະ ອະ​ນາ​ຄົດ. ຄຽງ​ຄູ່​ກັນ​ນັ້ນ, ຍັງມີ​ງານ​ວາງ​ສະ​ແດງ ITU Virtual Exhibition ທີ່​ເຊີນ​ເອົາ​ບັນ​ດາພາກ​ລັດ, ພາກ​ເອ​ກະ​ຊົນ ແລະ ​ຜູ້​ປະ​ກອບ​ການ​ທາງ​ດ້ານ​ໄອ​ຊີ​ທີລະ​ດັບ​ສາ​ກົນ ເຂົ້າ​ຮ່ວມ​ເປີດ​ບູດ​ໃນ​ງານວາງ​ສະ​ແດງບັນ​ດາຜະ​ລິດ​ຕະ​ພັນ​ຂອງ​ຕົນ ​ຜ່ານ​ລະ​ບົບ​ອອນ​ໄລ ​ເພື່ອ​ເປີດ​ໂອ​ກາດ​ສ້າງ​ຄູ່​ຮ່ວມ​ມື, ​ລົງທຶນ​, ​ແລກປ່ຽນ​ບົດຮຽນລະຫວ່າງ​ພາກ​ພຶ້ນ ​ແລະ ສາກົນ ໃນ​ສະ​ພາບປົກ​ກະ​ຕິ​ໃໝ່ (new normal).

ໃນ​​ໂອກ​າດດັ່ງກ່າວນີ້ ທ່ານ​ລັດຖະມົນຕີ ກະຊວງ ປທສ ​ໄດ້​ປະ​ກອບ​ຄຳ​ເຫັນ​ໃນ​ບາງຫົວ​ຂໍ້ເຊັ່ນ: “ບົດບາດຂອງ​ເຕັກ​ໂນໂລ​ຊີ ດິ​ຈີ​ຕອ​ນ ໃນ​ລະ​ຫວ່າງ ແລະ ຫຼັງ​ການ​ແຜ່​ລະ​ບາດ​ໂຄວິດ-19”  ຂອງ ສ​ປ​ປ ລາວ ພ້ອມ​ທັງ​​ສົ​ນ​ທະ​ນາ​ແລກ​ປ່ຽນ​ຄຳ​ຄິດ​ເຫັນຕໍ່​ກັບ​ຜົນ​ກະ​ທົບ​​​ການ​ແຜ່​ລະ​ບາດໂຄວິດ-19, ການຖອດຖອນບົດ​ຮຽນຈາກຂໍ້ລິເລີ່ມຜ່ານມາກັບ​ບັນ​ດາ​ປະ​ເທດ​ສະ​ມາ​ຊິກ ແລະ ໄອ​ທີ​ຢູ ກ່ຽວກັບຄວາມສຳຄັນຂອງການເຊື່ອມຕໍ່ ແລະ ເຕັກໂນໂລຊີດິຈີຕອນໃນຍຸດທະສາດແຫ່ງຊາດ ຂອງການຟື້ນຟູເສດຖະກິດ.

ການເຂົ້າຮ່ວມກອງປະຊຸມຄັ້ງນີ້ ແມ່ນເປັນໂອກາດອັນດີ ຂອງ ສປປ ລາວ ກໍ່ຄື ກະຊວງ ປທສ ​ໃນ​ການຮັບ​ຮູ້​ ບັນດາ​ທິດ​ທາງ, ນະ​ໂຍ​ບາຍ​ ຂອງ​ບັນ​ດາ​ປະ​ເທດ​ທີ່​ມີ​ການ​ພັດ​ທະ​ນາ​ທາງ​ດ້ານເຕັກໂນໂລຊີ​ດິ​ຈີ​ຕອນ ຕໍ່​ກັບ​ການ​ຮັບ​ມືໃນ​ ​ໄລ​ຍະ​ການ​ແຜ່​ລະ​ບາດ​ຂອງ​ເຊື້ອ​ພະ​ຍາດ ໂຄວິດ-19, ອີກທັງເປັນກາລະໂອກາດທີ່ດີໃນການປືກສາຫາລືການຮ່ວມມື ໃນການພັດທະນາດ້ານ ​ໄອ​ຊີ​ທີ ຂອງ ສ​ປ​ປ ລາວ ໃນ​ຍຸກເຕັກ​ໂນ​ໂລ​ຊີດິ​ຈີ​ຕອນ​.

ຂ່າວ​ໂດຍ: ກົມ​ແຜນ​ການ ແລະ ການ​ຮ່ວມ​ມື.

ພາບ: ຫ້ອງການກະຊວງ.