ທ່ານຮອງນາຍົກ ເຄື່ອນໄຫວຊຸກຍູ້ວຽກກະກຽມກອງປະຊຸມ 3 ຂັ້ນ ພ້ອມຕິດຕາມສະພາບ ນໍ້າຖ້ວມຢູ່ແຂວງຄຳມ່ວນ

0
124

ທ່ານ ປອ ບຸນທອງ ຈິດມະນີ ຮອງນາຍົກລັດຖະມົນຕີ ປະທານຄະນະກວດກາສູນກາງພັກ ພ້ອມຄະນະໄດ້ເດີນທາງຢ້ຽມຢາມ ແລະ ຊຸກຍູ້ວຽກງານຢູ່ແຂວງຄຳມ່ວນ ໃນວັນທີ 6 ກັນຍາ 2019 ໂດຍມີທ່ານ ໂອໄດ ສຸດາພອນ ເຈົ້າແຂວງໆຄຳມ່ວນ ພ້ອມການນຳຂອງແຂວງໃຫ້ການຕ້ອນຮັບຢ່າງອົບອຸ່ນ. ພ້ອມຈັດພິທີເພື່ອຮັບຟັງການໂອ້ລົມຂອງທ່ານຮອງນາຍົກລັດຖະມົນຕີ ທີ່ເຮືອນຮັບແຂກ ເບີ 1 ໂດຍມີການນຳຂັ້ນແຂວງ, ບັນດາພະແນກການອ້ອມຂ້າງ ແລະ ຄະນະນຳຂັ້ນເມືອງໃນ 10 ຕົວເມືອງເຂົ້າຮ່ວມ.

ທ່ານ ໂອໄດ ສຸດາພອນ ໄດ້ລາຍງານສະພາບຈຸດພິເສດ, ແຜນພັດທະນາເສດຖະກິດ-ສັງຄົມ, ການຫ້າງຫາກະກຽມເພື່ອດຳເນີນກອງປະຊຸມໃຫຍ່ຂອງແຂວງ ແລະ ສະພາບການເກີດໄພພິບັດນໍ້າຖ້ວມໃນປະຈຸບັນໃຫ້ແກ່ຄະນະທ່ານຮອງນາຍົກໄດ້ຮັບຊາບ. ຈາກນັ້ນທ່ານຮອງນາຍົກກໍ່ໄດ້ເນັ້ນໃຫ້ການນຳຂອງແຂວງ, ຂອງເມືອງຈົ່ງສືບຕໍ່ຢ່າງແຂງແຮງກວ່າເກົ່າຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ, ປັບປຸງທາງດ້ານກຳລັງໃຫ້ມີຄວາມເຂັ້ມແຂງຮອບດ້ານ, ສືບຕໍ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳປີ 2019 ຍູ້ແຮງທຸກຂົງເຂດວຽກງານທີ່ຈຳເປັນ ທາງດ້ານກະສິກຳ, ອຸດສາຫະກຳ-ການຄ້າ, ການລົງທຶນ, ການພັດທະນາກໍ່ສ້າງພື້ນຖານໂຄງລ່າງ, ຖະໜົນຫົນທາງ, ຊົນລະປະທານ ແລະ ອື່ນໆ ແນ່ໃສ່ເຮັດໃຫ້ການເກັບລາຍຮັບເຂົ້າງົບປະມານໄດ້ບັນລຸຕາມແຜນທີ່ວາງໄວ້, ພ້ອມກັນຈັດຕັ້ງປະຕິບັດຂໍ້ແຂ່ງຂັນຮັກຊາດ ແລະ ພັດທະນາ ຕິດພັນກັບການລຶບລ້າງຄວາມທຸກຍາກຂອງປະຊາຊົນ, ສືບຕໍ່ການກະກຽມດຳເນີນກອງປະຊຸມໃຫຍ່ 3 ຂັ້ນຂອງແຂວງໂດຍເລັ່ງໃສ່ 3 ວຽກງານໃຫຍ່ຄື: ວຽກງານສ້າງຂະບວນການ ເພີ່ມທະວີຍູ້ແຮງຂະບວນການທີ່ປິ່ນອ້ອມຢ່າງເລິກເຊິ່ງ ແລະ ມີຈຸດສຸມ, ສູ້ຊົນປະຕິບັດບັນດາຄາດໝາຍທີ່ກອງປະຊຸມຄັ້ງກ່ອນໄດ້ວາງອອກ,

ວຽກງານກະກຽມດ້ານເນື້ອໃນ ຕີລາຄາການຈັດຕັ້ງປະຕິບັດບັນດາຄາດໝາຍໃນໄລຍະຜ່ານມາ ພ້ອມທັງກຳນົດທິດທາງໃນຕໍ່ໜ້າ ໂດຍອີງໃສ່ສະພາບຕົວຈິງໃນແຕ່ລະຂົງເຂດ ແລະ ກອບຄວາມສາມາດໃນແຕ່ລະທ້ອງຖິ່ນ, ວຽກງານການກະກຽມບຸກຄະລາກອນໂຄງປະກອບ ການເລືອກເຟັ້ນພະນັກງານແມ່ນມີທັງວົງແຄບ ແລະ ວົງກວ້າງ ໂດຍອີງໃສ່ມາດຖານເງື່ອນທີ່ໄດ້ກຳນົດໄວ້ ບົນຈິດໃຈຫັນເປັນໜຸ່ມ ແລະ ຮັກສາໄດ້ 3 ຮຸ່ນຄື: ອາວຸໂສ, ກາງ ແລະ ໜຸ່ມ ໂດຍແມ່ນຄວາມຮັບຜິດຊອບຂອງຄະນະປະຈຳ ແລະ ອະນຸກຳມະການບຸກຄະລາກອນ, ພ້ອມກັນສືບຕໍ່ຊ່ວຍເຫຼືອ ແລະ ແກ້ໄຂປະຊາຊົນທີ່ໄດ້ຮັບຜົນກະທົບຈາກໄພທຳມະຊາດນໍ້າຖ້ວມ ລວມເຖິງການຟື້ນຟູພາຍຫຼັງທີ່ນໍ້າບົກແຫ້ງໂອກາດນີ້ທ່ານຮອງນາຍົກຍັງໄດ້ມອບເງິນເພື່ອຊ່ວຍເຫຼືອໄພພິບັດນໍ້າຖ້ວມຈຳນວນ 50 ລ້ານກີບ ພ້ອມທັງລົງຕິດຕາມສະພາບນໍ້າຢູ່ໃນບາງຈຸດຂອງ ເມືອງໜອງບົກຕື່ມອີກ.