ໃນວັນທີ 26 -30 ຕຸລາ 2020 ກົມສື່ມວນຊົນ ກະຊວງ ຖວທ ແລະ ອົງການຢູນີເຊັບ ຮ່ວມຈັດຊຸດອົບຮົມພາຍໃຕ້ຫົວຂໍ້ການປ້ອງກັນພະຍາດໂຄວິດ-19 ແລະ ການກັບສູ່ໂຮງຮຽນຢ່າງປອດໄພ ຊື່ງມີພະນັກງານຂ່າວສານພະແນກ ຖວທ ແຂວງ, ຫ້ອງການ ຖວທ 5 ເມືອງ ແລະ ພະແນກການພາຍໃນແຂວງໄຊສົມບູນ ໄດ້ຮັບການຍົກລະດັບການຂຽນຂ່າວທາງວິທະຍຸ,​ ໂທລະໂຄ່ງ ແລະ ໜັງສືພິມໃນຄັ້ງນີ້.

ທ່ານ ສະຫວັນຄອນ ຣາຊມຸນຕີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ກ່າວວ່າ: ເຖິງວ່າຄະນະສະເພາະກິດກໍ່ຄືລັດຖະບານລາວ ໄດ້ຫຼຸດຜ່ອນມາດຕະການຕ່າງໆ ລົງໂດຍສະເພາະການອະນຸຍາດເປີດໂຮງຮຽນຄືນທຸກຊັ້ນຮຽນທັງສາມັນ ແລະ ສະຖາບັນການສຶກສາລະດັບອື່ນໆ, ແຕ່ຕ້ອງໄດ້ສືບຕໍ່ປະຕິບັດບັນດາມາດຕະການປ້ອງກັນການຕິດເຊື້ອຢ່າງເຂັ້ມງວດໂດຍສື່ມວນຊົນເຮົາທັງສູນກາງ ແລະ ທ້ອງຖິ່ນ ຕ້້ອງໄດ້ເຮັດໜ້າທີ່ໂຄສະນາຕິດຕາມສະພາບ ການລະບາດພະຍາດໂຄວິດ-19 ທັງພາຍໃນ ແລະ ຕ່າງປະເທດ ທັງເຄື່ອນໄຫວເກັບກຳຂ່າວທຸກເຫດການ, ກິດຈະກຳຕ່າງໆ ຂອງຄະນະສະເພາະກິດ ແລະ ໂຄສະນາແນະນຳວິທີປ້ອງກັນພະຍາດທຸກຊ່ອງທາງເປັນຕົ້ນສື່ໂທລະພາບ, ວິທະຍຸ, ໜັງສືພິມ, ສື່ອອນລາຍ ແລະ ໂທລະໂຄ່ງປະຈຳບ້ານເພື່່ອສະກັດກັ້ນບໍ່ໃຫ້ເກີດການແພ່ລະບາດຂອງພະຍາດດັ່ງກ່າວນີ້.

ການອົບຮົມສຳມະນາກອນ ຈະໄດ້ຮຽນຮູ້ຄວາມຮູ້ພື້ນຖານການຜະລິດຂ່າວ, ການຂຽນລາຍການ, ພາສາຂ່າວ, ການສຳພາດ, ການກຽມໄປເອົາຂ່າວທັງວິທະຍຸ, ໂທລະໂຄ່ງ, ໜັງສືພິມ ແລະ ສື່ອອນລາຍ ພ້ອມທັງຮຽນຮູ້ການລາຍງານຂໍ້ມູນມີເດຍລາວ, ໂຄງຮ່າງ-ວິທີເຮັດວຽກຂອງທີມງາມເພຈມີເດຍລາວ, ການຄຸ້ມຄອງສື່ອອນລາຍ, ການສ້າງເພຈຂ່າວແຂວງໄຊສົມບູນ ແລະ 5 ເມືອງ ຊຸດຝຶກອົບຮົມຄັ້ງນີ້ໄດ້ຮັບການສະໜັບສະໜູນຈາກອົງການຢູເອັສເອດ (USAID) ໂດຍຜ່ານອົງການຢູນີເຊັບ.

#ພາບ-ຂ່າວ: ມີເດຍລາວ