ໃນກອງປະຊຸມ ສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VIII ພາຍໃຕ້ການເປັນປະທານ ຂອງທ່ານ ນາງ ປານີ ຢາທໍ່ຕູ້ ປະທານສະພາແຫ່ງຊາດ, ໃນຕອນເຊົ້າຂອງ ວັນທີ 28 ຕຸລາ 2020 ບັນດາສະມາຊິກ ສະພາແຫ່ງຊາດ ໄດ້ສືບຕໍ່ປະກອບຄໍາຄິດເຫັນ ຕໍ່ວຽກງານລັດຖະ ບານ ກ່ຽວກັບບົດລາຍງານ ການຈັດຕັ້ງປະຕິບັດ ແຜນພັດທະນາ ເສດຖະກິດ-ສັງຄົມ ແລະ ແຜນເງິນ ຕາ ປະຈຳປີ 2020 ແລະ ທິດທາງແຜນການ ປະຈໍາປີ 2021 ເພື່ອເຮັດໃຫ້ບັນດາເນື້ອໃນ ມີຄວາມຄົບຖ້ວນສົມບູນ, ຊັດເຈນ, ທັນຕາມກຳນົດເວລາ ໃຫ້ບັນລຸຕາມແຜນການທີ່ວາງໄວ້. ໂດຍສະເພາະແມ່ນ ດ້ານການລົງທຶນ, ການຜະລິດເປັນສິນຄ້າ, ການສຶກສາ, ການປັບປຸງ ແລະ ພັດທະນາບຸກຄະລາການ, ເລັ່ງໃສ່ການພັດທະນາ ຊົນນະບົດເຂດຫ່າງໄກສອກຫລີກ.

ໂອກາດດຽວກັນນີ້, ທ່ານ ວິໄລສຸກ ພິມມະສອນ ສະມາຊິກສະພາແຫ່ງຊາດ ເຂດ 9 ແຂວງຊຽງຂວາງ ໄດ້ສະເໜີໃຫ້ລັດຖະບານ ເອົາໃຈໃສ່ປັບປຸງ, ປ່ຽນແປງການຈັດຕັ້ງ, ຂະຫຍາຍການປະຕິບັດຊຸກຍູ້ສົ່ງເສີມ ຂະບວນການປະຕິວັດ ອຸດສາຫະກຳ 4.0 ຢ່າງແຂງແຮງຮອບດ້ານ, ມີຈຸດສຸມ ແລະ ມີຄຸນນະພາບ ຕາມທິດສີຂຽວ ສະອາດ ແລະ ຍືນຍົງ, ສົ່ງເສີມ ແລະ ຊຸກຍູ້ເສດຖະກິດ ຂະໜາດນ້ອຍ ຂະໜາດກາງຢ່າງແຂງແຮງ ຕາມທິດດີຈີຕອນ ຫັນເປັນທັນສະໄໝຮີບດ່ວນ ເພື່ອຄຸ້ມຄອງການຈັດເກັບລາຍຮັບ. ພ້ອມກັນນີ້, ລັດຖະບານເຮົາຕ້ອງ ເອົາໃຈໃສ່ລົງທຶນ ໃນການສ້າງລະບົບຄຸ້ມຄອງດີຈີຕອນ, ຄຸ້ມຄອງເກັບລາຍຮັບ. ຢາກໃຫ້ລັດຖະບານ ເອົາໃຈໃສ່ປັບປຸງ ແລະ ຫັນບັນດາຫົວໜ່ວຍລັດວິສາ ຫະກິດເປັນຮູບການອື່ນ ດ້ວຍການຂາຍຮຸ້ນ ຫລື ການຫັນການລົງທຶນ ໄປສູ່ຍຸກໄອຊີທີ. ນອກຈາກນີ້, ສະ ເໜີໃຫ້ລັດຖະບານປະຕິຮູບ ລະບົບການສຶກສາ ປະຈຸບັນຫັນໄປສູ່ ການສຶກສາແບບດີຈີຕອນ ໃນທຸກຂົງເຂດ ແລະ ທຸກຂະແໜງການ, ເລັ່ງລັດລົງທຶນກໍ່ສ້າງ ຊັບພະຍາກອນມະນຸດ ດີຈີຕອນໃຫ້ໄດ້ທັງປະ ລິມານ ແລະ ຄຸນນະພາບ ເພື່ອຈັດຕັ້ງປະຕິບັດ ຂະບວນປະຕິວັດ ອຸດສາຫະກຳ 4.0 ແລະ ຫັນຄົນລາວເຮົາ ໃຫ້ເປັນຄົນດີຈີຕອນ ໃນອະນາຄົດ.

ທ່ານ ຄຳວອນ ບຸນທະວົງ ສະມາຊິກສະພາແຫ່ງຊາດ ເຂດ 8 ແຂວງຫົວພັນ ໄດ້ສະເໜີໃຫ້ລັດຖະບານ ສົ່ງເສີມການຜະລິດ ຂະໜາດນ້ອຍຂະໜາກາງ ໂດຍສະເພາະທຶນ SME ຜ່ານມາເຫັນວ່າການເຂົ້າເຖິງ ຂອງປະຊົນຍັງບໍ່ທັນ ໄດ້ດີເທົ່າທີ່ຄວນ ເພາະວ່ານະໂຍບາຍທຶນດັ່ງກ່າວດີ ແລະ ສົ່ງ ເສີມການຜະລິດແທ້ໆ, ແຕ່ການຈັດຕັ້ງປະຕິບັດ ຕົວຈິງຂອງປະຊາຊົນ ຢູເຂດຫ່າງໄກສອກຫລີກ ຍັງພົບຄວາມຫຍຸ້ງຍາກຫລາຍ ແລະ ການພັດທະນາສຸມທຶນຮອນ ໃສ່ໂຄງການລົງທຶນ ພັດທະນາຂອງລັດ ຍັງເຫັນວ່າມີໜ້ອຍ ຍົກຕົວຢ່າງ ປີ 2020 ແຂວງຫົວພັນ ໄດ້ຮັບທຶນພັດທະນາ ແກ້ໄຂຄວາມທຸກຍາກມີພຽງ 10 ໂຄງການ ມູນຄ່າ 27,93 ຕື້ກີບ ຫລື ໂຄງການທີ່ສ້າງມາແລ້ວ ມີມູນຄ່າ 23 ຕື້ກວ່າກີບ ໂຄງການສະເໜີໃໝ່ ມີ 5 ໂຄງການ ມູນຄ່າ 4,57 ຕື້ກີບ ແຕ່ກົງກັນຂ້າມ ໃນຂະນະນີ້ ລັດຖະບານອະນຸມັດ ຕົວຈິງໃນປີ 2020  ມີມູນຄ່າພຽງແຕ່ 3,8 ຕື້ກີບ.

ດັ່ງນັ້ນ, ຈຶ່ງຢາກສະເໜີໃຫ້ລັດຖະບານເບິ່ງຄືນ ແລະ ສຸມໃສ່ໃນວຽກງານດັ່ງກ່າວ ໃຫ້ຫລາຍຂຶ້ນ. ດ້ານວຽກງານ ການບໍລິຫານລັດ ຮັບໃຊ້ປະ ຊາຊົນ ກໍເຫັນວ່າຍັງມີ ປະກົດການຫຍໍ້ທໍ້ ແລະ ຄວາມບໍ່ໂປງໃສ່ເກີດຂຶ້ນ, ສະເໜີ ໃຫ້ລັດຖະບານ ເບິ່ງຄືນໃນບັນຫານີ້ຕື່ມ ແລະ ໃຫ້ລັດຖະບານເອົາໃຈໃສ່ ກ່ຽວກັບການພັດທະນາ ພື້ນຖານໂຄງລ່າງ ແລະ ການແກ້ໄຂຊີວິດການເປັນຢູ່ ຂອງພະນັກງານ-ລັັດຖະກອນ ເພາະເຫັນວ່າ ປັດຈຸບັນພະນັກງານ ຢູ່ບາງຂົງເຂດ ຍັງມີຄວາມທຸກຍາກ ໂດຍສະເພາະ ຢູ່ເຂດຊົນນະບົດ ແລະ ອື່ນໆ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)