ກອງປະຊຸມໃຫຍ່ ຜູ້ແທນອົງຄະນະພັກ ນະຄອນຫລວງວຽງຈັນ ຄັ້ງທີ VII ໄຂຂຶ້ນຢ່າງເປັນທາງການ ໃນວັນທີ 28 ຕຸລາ 2020 ໃຫ້ກຽດເຂົ້າຮ່ວມ ມີສະຫາຍ ບຸນຍັງ ວໍລະຈິດ ປະທານປະ ເທດ, ບັນດາອາດີດການນຳພັກ, ລັດ ຂອງນະຄອນຫລວງ, ພະນັກງານປະຕິວັດອາວຸໂສ, ພ້ອມແຂກຖືກເຊີນ ແລະ ບັນດາຜູ້ແທນສົມບູນ ຈຳນວນ 357 ສະຫາຍ, ຍິງ 53 ສະຫາຍ, ເຊິ່ງເປັນຕົວແທນໃຫ້ສະມາຊິກພັັກ ທົ່ວນະຄອນຫລວງວຽງຈັນ ຈຳນວນ 21.800 ກວ່າສະຫາຍ ເຂົ້າຮ່ວມ.

ກອງປະຊຸມໃນຄັ້ງນີ້, ດຳເນີນໄປເປັນເວລາ 2 ວັນ, ໂດຍພາຍໃຕ້ຄຳຂວັນ ທີ່ວ່າ: “ຍົກສູງຄວາມຮັບຜິດຊອບ ແລະ ຄວາມສາມາດນຳພາ ຂອງອົງ ຄະນະພັກ; ເພີ່ມທະວີຄວາມສັກສິດ ແລະ ປະສິດທິພາບຂອງ ການຄຸ້ມຄອງລັດ-ຄຸ້ມຄອງສັງຄົມ ດ້ວຍກົດໝາຍ; ຮັບປະກັນສະຖຽນລະພາບທາງດ້ານ ການເມືອງ ຢ່າງໜັກແໜ້ນ; ເຕົ້າໂຮມທຸກກຳລັງແຮງ ຂອງສັງຄົມ ເຂົ້າໃນການພັດທະນາ ເສດຖະກິດ, ຫລຸດພົ້ນອອກຈາກ ຄວາມດ້ອຍພັດທະນາ ແລະ ຍົກລະດັບຄຸນນະພາບ ຊີວິດການເປັນຢູ່ ຂອງປະຊາຊົນໃຫ້ສູງຂຶ້ນ; ສ້າງການຫັນປ່ຽນຢ່າງແຂງແຮງ ໃນການພັດທະນາ ນະຄອນຫລວງວຽງຈັນ ໃຫ້ສົມເປັນເມືອງ ຫລວງຂອງປະເທດ​”, ເຊິ່ງຈະໄດ້ສຸມໃສ່ຕີລາຄາ ຜົນການນໍາພາ ຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກ ແລະ ແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ VIII ຂອງນະ ຄອນຫລວງວຽງຈັນ, ພ້ອມທັງຄົ້ນຄວ້າກໍານົດທິດທາງ, ໜ້າທີ່ ແລະ ຄາດໝາຍໃຫຍ່ ໃນການພັດທະ ນານະຄອນຫລວງວຽງຈັນ ກໍຄື ແຜນພັດທະນາ ເສດຖະກິດ-ສັງຄົມ 5 ປີ ຄັ້ງທີ IX (2021-2025). ພ້ອມດຽວກັນນັ້ນ, ບັນດາຜູ້ແທນສົມບູນ ຈະໄດ້ໃຊ້ສິດ ປະຊາທິປະໄຕ ຂອງຕົນປ່ອນບັດ ເລືອກຕັ້ງເອົາຄະ ນະບໍລິຫານງານພັກ ນະຄອນຫລວງວຽງຈັນ ສະໄໝທີ VII ແລະ ປ່ອນບັດເອົາຜູ້ແທນ ໄປຮ່ວມກອງປະຊຸມໃຫຍ່ ຄັ້ງທີ XI ຂອງພັກ.

ໂອກາດດັ່ງກ່າວ, ສະຫາຍ ສິນລະວົງ ຄຸດໄພທູນ ກໍາມະການກົມການ ເມືອງສູນກາງພັກ, ເລຂາຄະນະພັກ, ເຈົ້າຄອງນະຄອນຫລວງວຽງຈັນ ໄດ້ຂຶ້ນຜ່ານບົດ ລາຍງານການເມືອງ ໂດຍທ່ານ ໄດ້ຍົກໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະ ຜົນງານ ທີ່ນະຄອນຫລວງວຽງຈັນ (ນວ) ຍາດມາໄດ້ ໃນໄລຍະຜ່ານມາ ເຊິ່ງມີຫລາຍວຽກງານ ໃນຫລາຍຂະແໜງການ ໄດ້ຮັບການພັດທະນາ ແລະ ປະສົບຜົນສຳເລັດ ເປັນກ້າວໆມາ, ອັນໄດ້ເຮັດໃຫ້ ນະຄອນ ຫລວງວຽງຈັນ ມີສະຖຽນລະພາບທາງດ້ານ ການເມືອງຢ່າງໜັກແໜ້ນ, ສັງຄົມມີຄວາມເປັນ ລະບຽບຮຽບຮ້ອຍ ໂດຍພື້ນຖານ, ເສດຖະກິດສືບຕໍ່ ຂະຫຍາຍໃນທ່ວງທ່າດີ ແລະ ຖືກທິດ; ຖານະເສດຖະກິດຂອງ ນວ ຢືນຢູ່ແຖວໜ້າຂອງ ບັນດາທ້ອງຖິ່ນທົ່ວປະເທດ, GDP ກວມເອົາ 30% ແລະ ການຈັດເກັບລາຍຮັບ ທີ່ເກີດຂຶ້ນຢູ່ ນວ ກວມເອົາຫລາຍກ່ວາ 40% ຂອງທົ່ວປະເທດ. ລະດັບຊີວິດການເປັນຢູ່ ທາງດ້ານວັດຖຸ ແລະ ຈິດໃຈຂອງປະຊາຊົນ ໄດ້ຮັບການຍົກ ລະດັບນັບມື້ດີຂຶ້ນ, ປະຊາກອນມີລາຍໄດ້ ສະເລ່ຍຫລາຍກວ່າ 2 ເທົ່າ ຂອງລາຍໄດ້ສະເລ່ຍ ທົ່ວປະເທດ, ຄອບຄົວທຸກຍາກ ຢູ່ ນວ ຖືກແກ້ໄຂ ໂດຍພື້ນຖານ, ຕົວເມືອງ ແລະ ຊານເມືອງ ໄດ້ຮັບການພັດທະນາ ແລະ ມີໂສມໜ້າໃໝ່, ເຊິ່ງຜົນສໍາເລັດ ທັງໝົດນັ້ນ, ເປັນປັດໄຈພື້ນຖານຍູ້ດັນ ໃຫ້ການຫັນປ່ຽນຢ່າງແຂງແຮງ ເພື່ອກ້າວຂຶ້ນໃນຊຸມປີ ຕໍ່ໜ້າຢ່າງຈະແຈ້ງ, ຈະນໍາພາ ນວ ກ້າວເດີນຕາມເສັ້ນທາງ ແລະ ກ້າວສູ່ຈຸດໝາຍສັງຄົມນິຍົມ.

ຄຽງຄູ່ກັນນັ້ນ, ເສດຖະກິດຂອງ ນະຄອນຫລວງວຽງຈັນ ເຖິງວ່າເຕີບໂຕ ໃນລະດັບສູງ, ແຕ່ການຈັດຕັ້ງປະຕິບັດ ບາງໂຄງການ, ເປັນຕົ້ນ ໂຄງການບຸກທະລຸ ສ້າງຖານະການເງິນ ຍັງເຮັດໄດ້ໜ້ອຍ, ໜີ້ສິນສາທາລະນະ ຍັງຫລາຍສົມຄວນ, ຂັ້ນເມືອງ ແລະ ບ້ານ ບໍ່ທັນສາ ມາດ ສ້າງລາຍຮັບພູດທ້ອງຖີ່ນ ເພື່ອດູນລາຍຈ່າຍ ຂອງຕົນເອງໄດ້, ການຈັດຫາງົບປະມານ ເພື່ອບູລະນະສ້ອມແປງ-ກໍ່ສ້າງເສັ້ນທາງໃນຕົວເມືອງ ແລະ ຊານເມືອງ ບໍ່ໄດ້ຕາມຄວາມຮຽກຮ້ອງ ຕ້ອງການຕົວຈິງ, ຕົວເມືອງ ເຖິງວ່າມີການພັດທະນາ ແຕ່ພື້ນຖານໂຄງລ່າງເສັ້ນ ທາງ, ສາທາລະນຸປະໂຫຍດ ແລະ ການບໍລິການຮັບໃຊ້ປະຊາຊົນ ຍັງພົບຄວາມ ຫຍຸ້ງຍາກຫລາຍອັນ; ສາລະບານງົບປະມານ ຮັບໃຊ້ການບໍລິການຕົວເມືອງ ບໍ່ທັນມີ, ການຄຸ້ມຄອງ ແລະ ບໍລິຫານຈັດການຕົວເມືອງ ປະສິດທິພາບບໍ່ທັນສູງ, ການສ້າງເມືອງສີຂຽວ ບໍ່ທັນເຮັດໄດ້ດີ; ການຂຸດຄົ້ນຊັບ ພະຍາກອນທຳມະຊາດ, ພັດທະນາທີ່ດິນ ບໍ່ທັນມີມາດຕະການ ກວດກາແກ້ໄຂ ທີ່ເຂັ້ມງວດ ແລະ ອື່ນໆ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)