ຕາມການລາຍງານ ຂອງກະຊວງສາທາລະນະສຸກ ແຈ້ງໃຫ້ຮູ້ວ່າ: ນັບຕັ້ງແຕ່ຕົ້ນເດືອນມັງກອນ ຫາ ວັນທີ 28 ຕຸລາ 2020 ມີຜູ້ຕິດເຊື້ອໄຂ້ຍຸງລາຍ 7.512 ຄົນ ແລະ ເສຍຊີວິດ 12 ຄົນ. ສະເພາະໃນວັນທີ 28 ຕຸລາ 2020 ຢືນຢັນແລ້ວພົບຜູ້ຕິດເຊື້ອ ພະຍາດດັ່ງກ່າວ 8 ກໍລະນີ.

ທ່ານ ນາງ ພອນປະເສີດ ໄຊຍະມຸງຄຸນ ຮອງຫົວໜ້າກົມ ຄວບຄຸມພະຍາດຕິດຕໍ່, ກະຊວງສາທາລະນະສຸກ ໄດ້ລາຍງານໃຫ້ຮູ້ ໃນວັນທີ 29 ຕຸລາ 2020 ນີ້ວ່າ: ການລະບາດ ຂອງພະຍາດ ໄຂ້ຍຸງລາຍ ຍັງສືບຕໍ່ແຜ່ລະບາດ. ໃນນັ້ນ, ນະຄອນຫລວງວຽງຈັນ ພົບຜູ້ຕິດເຊື້ອໄຂ້ຍຸງລາຍສູງອັນດັບໜຶ່ງ ຢືນຢັນຜູ້ຕິດເຊື້ອທັງໝົດ 1.713 ຄົນ, ບໍລິຄຳໄຊ 876 ຄົນ, ບໍ່ແກ້ວ 706 ຄົນ ແລະ ແຂວງວຽງຈັນ 697 ຄົນ.

ພ້ອມດຽວກັນນີ້, ໄດ້ຮຽກຮ້ອງໃຫ້ປະຊາຊົນ ຈົ່ງເປັນເຈົ້າການຮ່ວມກັນປ້ອງກັນ ພະຍາດໄຂ້ຍຸງລາຍ ດ້ວຍການຮັກສາ ອະນາໄມທຳຄວາມສະອາດ, ອະນາໄມສະຖານທີ່ ອ້ອມຮອບບ້ານເຮືອນ, ເຊິ່ງຍຸງລາຍ ມັກຈະເພາະພັນໃນນ້ຳ, ໃນພາຊະນະທີ່ເກັບ ນ້ຳໃຊ້ພາຍໃນເຮືອນ ເຊັ່ນ: ຖັງນ້ຳ, ຈອກ, ໂຖດອກໄມ້, ຕີນຕູ້ ແລະ ພາຊະນະທີ່ຢູ່ນອກເຮືອນ ເຊັ່ນ: ຢາງຕີນລົດ, ກະໂປະ, ກະປ໋ອງ, ຖັງນ້ຳ ການທຳລາຍ ແຫລ່ງເພາະພັນຂອງຍຸງ ຈະສາມາດປ້ອງກັນທ່ານ ແລະ ຄອບຄົວຂອງທ່ານໄດ້.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)