ປະເພນີແຫ່ຜາສາດເຜິ້ງ ເປັນພິທີກໍາທາງສາສະໜາ ແມ່ນວັດທະນະທໍາອັນດີງາມ ທີ່ສະແດງເຖິງຄວາມພາກພຽນ ການປະດິດຄິດສ້າງ ແລະ ການເຕົ້າໂຮມຄວາມສາມັກຄີຂອງປະຊາຊົນລາວບັນດາເຜົ່າໂດຍສະເພາະແມ່ນ ປະຊາຊົນຊາວນະຄອນຫຼວງວຽງຈັນ ທີ່ສືບທອດກັນມາແຕ່ບູຮານນະການ ໂດຍແຕ່ລະປີໄດ້ມີການຈັດຂຶ້ນ ໃນມື້ຂຶ້ນ 14 ຄ່ຳເດືອນ12 ຂອງງານສະເຫຼີມສະຫຼອງບຸນ ນະມັດສະການພະທາດຫຼວງ ເພື່ອເປັນການສືບສານວັດທະນະທໍາອັນດີງາມໃຫ້ຄົງຢູ່ຄູ່ກັບປະຊາຊົນລາວຕະຫຼອດໄປ.

ໃນວັນທີ 30 ຕຸລານີ້ ໄດ້ຈັດຂະບວນແຫ່ຜາສາດເຜິ້ງໃນບຸນນະມັດສະການພະທາດຫຼວງ ປະຈໍາ ປີ ພສ 2563 ທີ່ພະທາດຫຼວງ ໂດຍມີພະສົງ, ສາມະເນນ, ການນໍາພັກ-ລັດ ແລະ ມວນຊົນຊາວ ນະ ຄອນຫຼວງເຂົ້າຮ່ວມຢ່າງເປັນຂະບວນຄຶກຄື້ນມ່ວນຊື່ນ.

ການແຫ່ຜາສາດເຜິ້ງໃນປີນີ້ ໄດ້ເຄື່ອນຍ້າຍຂະບວນແຫ່ຢູ່ເດີ່ນສະໜາມ ແລ້ວເຂົ້າສູ່ກົມມະລຽນພະທາດຫຼວງ ເບື້ອງທິດຕາເວັນອອກ ໃນນັ້ນນໍາໜ້າດ້ວຍຂະບວນແຫຂອງພະສົງ, ສາມະເນນ, ການນໍາພັກ-ລັດ ຊຶ່ງນໍາໂດຍ ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ ພ້ອມດ້ວຍການນໍານະຄອນຫຼວງ, ອົງການຈັດຕັ້ງມະຫາຊົນ, ເຖົ້າແກ່ແນວໂຮມ ຕາມດ້ວຍຂະບວນດົນຕີພື້ນເມືອງ, ຂະບວນຂອງບັນດາເມືອງຕ່າງໆ, ສໍານັກງານ-ອົງການ ແລະ ປະຊາຊົນລາວບັນດາເຜົ່າ ໂດຍຂະບວນການແຫ່ຜາສາດເຜິ້ງໄດ້ເຄື່ອນຜ່ານປະຕູໂຂງດ້ານສະຫນາມຫຼວງ ແລ້ວແຫ່ອ້ອມພະທາດ 3 ຮອບ ຈາກນັ້ນກໍໄດ້ຖວາຍຜາສາດເຜິ້ງ ຟັງທໍາມະເທດສະໜາ 1 ກັນ ແລະ ກາບໄຫວ້ຊັກກາລະບູຊາພະທາດຫຼວງແລ້ວຖືເປັນການສິ້ນສຸດພິທີ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)