ໃນວັນທີ 29 ຕຸລາ 2020 ທີ່ ກະຊວງການຕ່ງປະເທດ, ໄດ້ມີກອງ​ປະຊຸມ​ປຶກສາ​ຫາລື​ ດ້ານ​ການ​ເມືອງ ແບບທາງໄກ ຂັ້ນຮອງລັດຖະມົນຕີ ຄັ້ງທີ V ລະຫວ່າງ ​ກະຊວງ​ການຕ່າງປະ​ເທດ ລາວ ແລະ ຫວຽດນາມ, ໂດຍພາຍໃຕ້ ການເປັນປະທານຮ່ວມ ຂອງ ທ່ານ ທອງສະຫວັນ ພົມວິຫານ, ຮອງລັດ​ຖະ​ມົນ​ຕີ​​ກະ​ຊວງ​ ການ​ຕ່າງ​ປະ​ເທດ ແລະ ທ່ານ ຫງວຽນ ກວັກ ຢຸງ, ຮອງລັດ​ຖະ​ມົນ​ຕີ​​ ກະ​ຊວງ​ການ​ຕ່າງ​ປະ​ເທດ ແຫ່ງ ສສ ຫວຽດນາມ ພ້ອມດ້ວຍບັນດາພະນັກງານ ຈາກກົມກອງທີ່ກ່ຽວຂ້ອງ ຂອງທັງສອງຝ່າຍເຂົ້າຮ່ວມ.

ກອງປະຊຸມຄັ້ງນີ້, ຖືວ່າເປັນກອງປະຊຸມປະຈໍາປີ ລະຫວ່າງ ສອງກະຊວງການ ຕ່າງປະເທດ ລາວ-ຫວຽດນາມ ທີ່ໄດ້ຜັດປ່ຽນກັນຈັດມາແຕ່ປີ 2014 ແລະ ໃນປີນີ້ ແມ່ນຜຽນ ຂອງ ສສ ຫວຽດນາມ ເປັນເຈົ້າພາບ, ແຕ່ເນື່ອງຈາກສະພາບ ການແຜ່ລະບາດຂອງ ພະຍາດໂຄວິດ-19 ເຮັດໃຫ້ສອງປະເທດ ຕ້ອງ ໄດ້ຈັດກອງປະຊຸມ ຜ່ານລະບົບທາງໄກ ເປັນຄັ້ງທຳອິດ.

ສອງຝ່າຍ​ໄດ້​ແລກ​ປ່ຽນ​ຄຳ​ເຫັນ ຖອດ​ຖອນ​ບົດ​ຮຽນຮ່ວມ ກັນ​ຢ່າງກົງ​ໄປ​ກົງ​ມາ ໃນຫລາຍ​ບັນ​ຫາໃນຂອບການຮ່ວມມືສອງຝ່າຍ ແລະ ຫລາຍຝ່າຍ ໂດຍສະເພາະ ໄດ້ທົບທວນຄືນ ການຈັດຕັ້ງຜັນຂະຫຍາຍ ເນື້ອໃນຈິດໃຈຜົນ ການຢ້ຽມຢາມຂອງການນໍາຂັ້ນສູງ, ຖະແຫລງການຮ່ວມ ແລະ ຂໍ້ຕົກລົງຂັ້ນສູງຕ່າງໆ ລະຫວ່າງສອງປະເທດ ກໍຄື ການຈັດຕັ້ງປະຕິບັດ ແຜນການຮ່ວມມື ລະຫວ່າງ ສອງກະຊວງການຕ່າງ ປະເທດ ​ແນ​ໃສ່​ຍົກ​ສູງ​ກົນ​ໄກ​ການ​ຮ່ວມ​ມື ລະ​ຫວ່າງ​ສອງ​ກະ​ຊວງ​ ກາ​ນ​ຕ່າງ​ປະ​ເທດ ​ໃຫ້​ນັບ​ມື້​ນັບ​ມີ​ປະ​ສິດ​ທິພາບສູງຂຶ້ນ. ນອກນີ້, ຍັງໄດ້ປຶກສາຫາລືກ່ຽວກັບ ການກະກຽມໃຫ້ແກ່ ກອງປະຊຸມປຶກສາຫາລື ດ້ານການ ເມືອງຂັ້ນລັດຖະມົນຕີ ກະຊວງການຕ່າງປະເທດ ຄັ້ງທີ VII ທີ່ຈະມີຂຶ້ນ ໃນເດືອນພະຈິກ 2020 ນີ້ ຢູ່ ສປປ ລາວ ແລະ ຮ່ວມກັນປັບປຸງ ຂໍ້ຕົກລົງວ່າດ້ວຍການຮ່ວມມື ລະຫວ່າງ ສອງກະຊວງໃນໄລຍະ 2021-2025 ເພື່ອໃຫ້ສາມາດລົງນາມ ໃນກອງປະຊຸມດັ່ງກ່າວ.

ໃນກອງປະຊຸມຄັ້ງນີ້, ສອງຝ່າຍ ຍັງໄດ້​ຮ່ວມ​ກັນແລກ​ປ່ຽນ ​ຄຳ​ຄິດ​ຄຳ​ເຫັນ ຕໍ່ບັນຫາພາກພື້ນ ແລະ ສາກົນ ທີ່ທັງສອງຝ່າຍມີຄວາມສົນໃຈ ໂດຍສະເພາະ ຜົນກະທົບຂອງພະຍາດ ໂຄວິດ-19 ກໍຄື ການຮ່ວມມືໃນ ຂອບອາຊຽນອະນຸພາກພື້ນ ແລະ ສະຫະປະຊາຊາດ.

ໃນໂອກາດນີ້, ຝ່າຍລາວໄດ້ສະແດງຄວາມຊົມເຊີຍ ບົດບາດການເປັນ ປະທານອາຊຽນ ຂອງ ສສ ຫວຽດນາມ ການເປັນສະມາຊິກບໍ່ຖາວອນ ຂອງສະພາຄວາມໝັ້ນຄົງ ສະຫະປະຊາຊາດ ໄລຍະ 2020-2021, ກໍຄື ຜົນສໍາເລັດ ໃນການຮັບມືກັບພະຍາດ ໂຄວິດ-19 ໃນປັດຈຸບັນ. ພ້ອມທັງສະແດງຄວາມເຊື່ອໝັ້ນວ່າ ການເປັນເຈົ້າພາບ ຈັດກອງປະຊຸມສຸດຍອດ ອາຊຽນ ຄັ້ງທີ 37 ໃນກາງເດືອນພະຈິກ ທີ່ຈະມາເຖິງນີ້ ຫວຽດນາມ ກໍຈະເຮັດໄດ້ສໍາເລັດຜົນຢ່າງຈົບງາມ. ພ້ອມນີ້, ຝ່າຍລາວຍັງໄດ້ສະແດງ ຄວາມເຫັນໃຈ ຕໍ່ສະພາບການໄພພິບັດ ທີ່ຫວຽດນາມ ກຳລັງປະເຊີນຢູ່ ຈາກການຮັບມືກັບພະຍຸຫລາຍລູກ ທີ່ພັດເຂົ້າພາກກາງຂອງຫວຽດນາມ ໃນເດືອນຕຸລານີ້. ພ້ອມທັງໄດ້ສະແດງຄວາມຂອບໃຈ ສະຫາຍ ຫວຽດນາມ ທີ່ໄດ້ໃຫ້ການຊ່ວຍເຫລືອ ອັນລໍ້າຄ່າແກ່ ສປປ ລາວ ຕະຫລອດມາ ໂດຍສະເພາະແມ່ນ ໃນການຕ້ານການ ແຜ່ລະບາດໂຄວິດ-19 ນີ້ ກໍຄືໃນເວລາ ສປປ ລາວ ພົບໄພພິບັດທໍາມະຊາດຕ່າງໆ.

ກອງປະຊຸມຄັ້ງນີ້, ໄດ້ດຳເນີນໄປດ້ວຍບັນຍາກາດ ອັນສະໜິດສະໜົມ ຈິງໃຈ ແລະ ກົງໄປກົງມາ, ຊຶ່ງເປັນການສ່ອງແສງໃຫ້ເຫັນ ສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ລາວ ແລະ ຫວຽດນາມ ທີ່ນັບມື້ນັບໄດ້ຮັບການ ເສີມຂະຫຍາຍຢ່າງບໍ່ຢຸດຢັ້ງ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)