ໃນວັນທີ 5 ພະຈິກ 2020, ຄະນະກໍາມະການຄຸ້ມຄອງໄພພິບັດຂັ້ນສູນກາງ ໄດ້ມອບເຄື່ອງອຸປະໂພກ-ບໍລິໂພກ ລວມມູນຄ່າ 207,8 ລ້ານກີບ ແລະ ເງິນສົດ 50 ລ້ານກີບ ໃຫ້ເມືອງຈຳພອນ ແຂວງສະຫວັນນະເຂດ ທີ່ໄດ້ຮັບຜົນກະທົບຈາກໄພພິບັດນ້ຳຖ້ວມ ເພື່ອຊ່ວຍເຫລືອບັນເທົາທຸກແກ້ໄຂເບື້ອງຕົ້ນ ແນໃສ່ເຮັດໃຫ້ການດຳລົງຊີວິດຂອງປະຊາຊົນ ກັບມາເປັນປົກກະຕິໂດຍໄວ.

ໃຫ້ກຽດຕາງໜ້າມອບໂດຍ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ລັດຖະມົນຕີກະຊວງແຜນການ ແລະ ການລົງທຶນ, ປະທານຄະນະກໍາມະການຄຸ້ມຄອງໄພພິບັດຂັ້ນສູນກາງ ແລະ ກ່າວຮັບໂດຍ ທ່ານ ຄຳລຸຍ ຍາດຕິວົງ ເຈົ້າເມືອງຈຳພອນ, ໂດຍມີ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ແລະ ມີພະນັກງານທີ່ກ່ຽວຂ້ອງ ຈາກສູນກາງ ແລະ ທ້ອງຖິ່ນ ເຂົ້າຮ່ວມ. ເຄື່ອງຊ່ວຍເຫລືອດັ່ງກ່າວປະກອບ ມີ: ເຂົ້າ 12 ໂຕນ, ໃນນັ້ນ ໄດ້ຮັບການຊ່ວຍເຫລືອຈາກບໍລິສັດ ປາວິນາ ພັດທະນາກະສິກຳ ຈຳນວນ 2 ໂຕນ, ນ້ຳດື່ມ 250 ແກັດ, ກາຕົ້ມນ້ຳ 210 ໜ່ວຍ, ເຄື່ອງໃຊ້ໃນຄົວເຮືອນ ແລະ ສິ່ງຂອງເຄື່ຶງໃຊ້ທີ່ຈຳເປັນອື່ນໆ ອີກຈຳນວນໜຶ່ງ.

ໂອກາດນີ້, ທ່ານ ສອນໄຊ ສີພັນດອນ ກໍໄດ້ຍ້ອງຍໍຊົມເຊີຍການນຳພັກ-ລັດ ເມືອງຈຳພອນ, ພ້ອມດ້ວຍກຳລັງປະກອບອາວຸດ ແລະ ທຸກພາກສ່ວນທີ່ກ່ຽວຂ້ອງ ທີ່ໄດ້ພ້ອມກັນເອົາໃຈໃສ່ ແລະ ປຸ້ມລຸມກັນໃນແກ້ໄຂ, ຊ່ວຍເຫລືອເຊິ່ງກັນ ແລະ ກັນ ໃນເບື້ອງຕົ້ນ, ເຊິ່ງສະແດງໃຫ້ເຫັນມູນເຊື້ອອັນດີງາມ, ນ້ຳໃຈສາມັກຄີ ແລະ ຄວາມເອື້ອເຟື້ອແຜ່ຂອງປະຊາຊົນລາວເຮົາ ເພື່ອພ້ອມກັນປົກປັັກຮັກສາ ແລະ ສ້າງສາພັດທະນາປະເທດຊາດ ໃຫ້ນັບມື້ນັບຈະເລີນຮຸ່ງເຮືອງ.

ອີງຕາມການລາຍຂອງ ທ່ານເຈົ້າເມືອງຈຳພອນ ໃນບາງຕອນກ່າວວ່າ: ໃນລະຫວ່າງວັນທີ 13-26 ຕຸລາ 2020 ເມືອງຈຳພອນ ໄດ້ປະເຊີນກັບສະພາບພາຍຸຝົນຫລາຍຄັ້ງຕິດຕໍ່ກັນ ເຮັດໃຫ້ລະດັບນ້ຳເຊຈຳພອນ ເພີ່ມຂຶ້ນສູງສຸດ ວັດແທກໄດ້ 10,24 ແມັດ ເຊິ່ງເກີນເຂດອັນຕະລາຍ 2 ແມັດ ເຮັດໃຫ້ນ້ຳຖ້ວມ 18 ບ້ານ, ມີ 2.042 ຄອບຄົວ ແລະ ພົນລະເມືອງ 10.000 ກວ່າຄົນ ໄດ້ຮັບຜົນກະທົບ. ໃນນັ້ນ, ໄດ້ຍົກຍ້າຍປະຊາຊົນໄປຢູ່ຈຸດພັກຊົ່ວຄາວ 1.212 ຄອບຄົວ, ລວມທັງສັດລ້ຽງອື່ນໆນຳ. ເນື້ອທີ່ນາຖືກນ້ຳຖ້ວມ 6.920 ເຮັກຕາ ເທົ່າກັບ 33,3% ຂອງເນື້ອທີ່ນາປັກດຳທັງໝົດໃນເມືອງ, ໃນນັ້ນ ເນື້ອທີ່ເສຍຫາຍມີ 4.694 ເຮັກຕາ, ເນື້ອທີ່ປູກພືດຖືກຖ້ວມ 123 ເຮັກຕາ, ເສຍຫາຍ 13 ເຮັກຕາ, ລະບົບຊົນລະ ປະທານເປ່ເພເສຍຫາຍ 13 ໂຄງການ, ໜອງປາ 18 ໜອງ, ເສັ້ນທາງຖືກນ້ຳຖ້ວມ 10 ເສັ້ນ, ເຮັດໃຫ້ການສັນຈອນຖືກຕັດຂາດ ຈຳນວນ 15 ບ້ານ, ສຸກສາລາຖືກຖ້ວມ 1 ແຫ່ງ, ຈຳນວນໂຮງຮຽນທີ່ປິດການຮຽນຍ້ອນນ້ຳຖ້ວມ ແລະ ເສັ້ນທາງຖືກຕັດຂາດ ຈຳນວນ 16 ແຫ່ງ, ເຊິ່ງມີນັກຮຽນ 2.400 ກວ່າຄົນ ໃນນີ້ ມີໂຮງຮຽນປະຖົມ 10 ແຫ່ງ ແລະ ໂຮງຮຽນມັດທະຍົມ 6 ແຫ່ງ.

ສຳລັບຄວາມຕ້ອງຊ່ວຍເຫລືອຢ່າງເລັ່ງດ່ວນ ປະກອບ ມີ: ເຂົ້າກິນໃນໄລຍະ 5 ເດືອນຕໍ່ໜ້າ, ຢາປົວພະຍາດຄົນ ແລະ ສັດ, ແນວພັນເຂົ້າປູກນາແຊງ, ແນວພັນພືດ, ກະສອບ ເພື່ອນຳໃຊ້ເຂົ້າໃນການສ້ອມແປງເສັ້ນທາງ, ຄູກັນນ້ຳ ແລະ ປ້ານຝາຍກັກເກັບນ້ຳ ເພື່ອນຳໃຊ້ເຂົ້າໃນການຜະລິດລະດູແລ້ງ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)