ໃນວັນທີ 10 ພະຈິກ 2020, ທ່ານ ດຣ. ນາງພອນປະເສີດ ໄຊຍະມຸງຄຸນ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ໄດ້ລາຍງານໃຫ້ຮູ້ວ່າ: ໃນວັນທີ 09 ພະຈິກ 2020, ໄດ້ເກັບຕົວຢ່າງມາກວດວິເຄາະທັງໝົດ 769 ຄົນ, ໃນນັ້ນ ຈາກບຸກຄົນທົ່ວໄປບໍ່ມີອາການ 167 ຕົວຢ່າງ; ແຮງງານລາວມາແຕ່ໄທ 236 ຕົວຢ່າງ; ແຮງງານຈີນ 256 ຕົວຢ່າງ; ແຮງງານຫວຽດນາມ 108 ຕົວຢ່າງ ແລະ ແຮງງານໄທ 02 ຕົວຢ່າງ ຜົນກວດວິເຄາະທັງໝົດແມ່ນ ບໍ່ພົບເຊື້ອ.

ປັດຈຸບັນ ທົ່ວປະເທດມີສູນຈໍາກັດບໍລິເວນ ທັງໝົດ 33 ສູນ, ມີຜູ້ຖືກຈຳກັດ ບໍລິເວນຢູ່ສູນ 2.773 ຄົນ, ໄດ້ເກັບຕົວຢ່າງມາກວດວິເຄາະ ທັງໝົດບໍ່ພົບຜູ້ຕິດເຊື້ອ. ສັງລວມການກວດວິເຄາະແຕ່ເດືອນມັງກອນ ຮອດ ວັນທີ 09 ພະຈິກ 2020 ໄດ້ເກັບຕົວຢ່າງມາກວດທັງໝົດ 70.252 ຕົວຢ່າງ, ກວດພົບເຊື້ອສະສົມ 24 ຄົນ ແລະ ກໍລະນີທີ 24 ຍັງຄົງສືບຕໍ່ປິ່ນປົ່ວຢູ່ໂຮງໝໍມິດຕະພາບ,

ທ່ານ ດຣ. ນາງພອນປະເສີດ ໄຊຍະມຸງຄຸນ ໄດ້ກ່າວອີກວ່າ: ສະພາບການລະບາດຂອງພະຍາດ COVID-19 ໃນທົ່ວໂລກ ຍັງສືບຕໍ່ເພີ່ມຂຶ້ນຢ່າງຕໍ່ເນື່ອງ ເຮັດໃຫ້ມີລາຍງານຜູ້ຕິດເຊື້ອ ແລະ ຜູ້ເສຍຊີວິດເປັນຈຳນວນຫລວງຫລາຍ; ອີງໃສ່ສະພາບດັ່ງກ່າວ ຈຶ່ງຂໍຮຽກຮ້ອງມາຍັງທຸກພາກສ່ວນໃນສັງຄົມເອົາໃຈໃສ່ປະຕິບັດຕາມແຈ້ງການຂອງຫ້ອງວ່າການ ສຳນັກງານນາຍົກລັດຖະມົນຕີ ຢ່າງຖືກຕ້ອງ ແລະ ເຄັ່ງຄັດ, ສືບຕໍ່ປະຕິບັດການດຳລົງຊີວິດປົກກະຕິແບບໃໝ່ໃຫ້ກາຍເປັນຄວາມຊິນເຄີຍ, ປະຕິບັດມາດຕະການປ້ອງກັນການຕິດເຊື້ອ ຢ່າງເຂັ້ມງວດ ເພື່ອສະກັດກັ້ນ ແລະ ຫລຸດຜ່ອນການລະບາດ ຂອງພະຍາດ COVID-19 ໃນປະເທດຂອງພວກເຮົາ ບໍ່ໃຫ້ຂະຫຍາຍເປັນວົງກວ້າງ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)