ກະຊວງ ປທສ ຕ້ອນຮັບ ທູດ ສ. ເກົາຫຼີ ເຂົ້າຢ້ຽມຂໍ່ານັບອໍາລາໜ້າທີ່…

0
78

ໃນວັນທີ 12 ພະຈິກ 2020 ນີ້ ທ່ານ ທັນສະໄໝ ກົມມະສິດ ລັດຖະມົນຕີກະຊວງ ໄປສະນີ, ໂທລະຄົມມນາຄົມ ແລະ ການສື່ສານ (ປທສ) ຕ້ອນຮັບການເຂົ້າຢ້ຽມຂໍ່າຂອງ ທ່ານ ຊິນ ຊອງຊຸນ (Shin Sung Soon) ເອກອັກຄະລັດຖະທູດແຫ່ງ ສ. ເກົາຫຼີ ປະຈໍາ ສປປ ລາວ ເນື່ອງໃນໂອກາດສໍາເລັດໜ້າທີ່ການທູດຢູ່ ສປປ ລາວ.

ໃນໂອກາດນີ້, ທ່ານ ທັນສະໄໝ ກົມມະສິດ ໄດ້ສະແດງຄວາມຕ້ອນຮັບ, ຊົມເຊີຍ ຕໍ່ການເຂົ້າຢ້ຽມຂໍ່ານັບຂອງ ທ່ານ ຊິນ ຊອງຊຸນ. ພ້ອມທັງຕີລາຄາສູງ ຕໍ່ການພົວພັນການຮ່ວມມືໃນໄລຍະຜ່ານມາ ແລະ ແລກປ່ຽນຄໍາຄິດຄໍາເຫັນ ກ່ຽວກັບທິດທາງໃນຕໍ່ໜ້າ ໃນການເພີ່ມທະວີການຮ່ວມມືທາງດ້ານໄອຊີທີ ກໍ່ຄືຂະແໜງການ ປທສ ເພື່ອປະກອບ ສ່ວນເຂົ້າການພັດທະນາເສດຖະກິດ-ສັງຄົມຂອງສອງຊາດ. ສອງຝ່າຍ ລາວ – ເກົາຫຼີ ມີສາຍພົວພັນການຮ່ວມມືກັນມາຍາວນານ ແລະ ໄດ້ມີການຊ່ວຍເຫລືອເຊື່ງກັນຕະຫລອດມາ ບໍ່ວ່າຈະເປັນ ຂອບ​ຮ່ວມ​ມືຂອງ​ອົງ​ການ ໂທ​ລະ​ຄົມ​ມະ​ນາ​ຄົມ ອາ​ຊີ-ປາ​ຊີ​ຟິກ (APT), ສະ​ຖາ​ບັນ​ພັດ​ທະ​ນາ​ສັງ​ຄົມ ຂໍ້​ມູນ​ຂ່າວ​ສານ​ເກົາ​ຫລີ (KISDI) ແລະ ອົງ​ການ​ສັງ​ຄົມ​ ຂໍ້​ມູນ​ຂ່າວ​ສານ​ແຫ່ງ​ຊາດ (NIA) ເກົາ​ຫລີ ແລະ ເມື່ອບໍ່ດົນມານີ້ ກະຊວງ ວິທະຍາສາດ ແລະ ເຕັກໂນໂລຊີສື່ສານຂໍ້ມູນຂ່າວສານ ແລະ ອົງການຂໍ້ມູນຂ່າວສານສັງຄົມແຫ່ງຊາດ, ສ. ເກົາຫຼີ ຮ່ວມກັບ ທ່ານ ທູດ ກໍ່ໄດ້ມອບເຄື່ອງອຸປະກອນຄອມພິວເຕີ ຈໍານວນ 200 ເຄື່ອງ ໃຫ້ກັບກະຊວງ ປທສ ເພື່ອຍົກລະດັບການຄຸ້ມຄອງບໍລິຫານ ໃຫ້ທັນສະໄໝຂຶ້ນ ແລະ ຍັງເປັນການກໍ່ສ້າງຍົກລະດັບການນໍາໃຊ້ເຕັກໂນໂລຊີສື່ສານ ຂໍ້ມູນຂ່າວສານ ຂອງພະນັກງານອ້ອມຂ້າງກະຊວງ. ພ້ອມນີ້, ທັງສອງຝ່າຍ ຍັງໄດ້ມີການປຶກສາຫາລື ກ່ຽວກັບການຮ່ວມມືກັນທາງດ້ານຂະແໜງການ ໄອຊີທີ ກໍ່ຄື ການເສີມຂະຫຍາຍສາຍພົວພັນ ຮ່ວມມືອັນດີງາມລະຫວ່າງ 2 ລັດຖະບານ ແລະ ປະຊາຊົນ 2 ຊາດລາວ – ເກົາຫຼີ ໃຫ້ມີການຂະຫຍາຍຕົວເພີ່ມຂຶ້ນເລື້ອຍໆ.

ໃນຕ້ອນທ້າຍ ທ່ານ ຊິນ ຊອງຊຸນ ໄດ້ສະແດງຄວາມຂອບໃຈ ຕໍ່ທ່ານລັດຖະມົນຕີ ທີ່ໄດ້ສະຫຼະເວລາ ອັນມີຄ່າ ຕ້ອນຮັບການເຂົ້າຢ້ຽມຂໍ່ານັບໃນຄັ້ງນີ້ ຢ່າງອົບອຸ່ນ, ເປັນກັນເອງ ແລະ ໄດ້ມີການແລກປ່ຽນຄຳຄິດຄຳເຫັນ ຢ່າງກົງໄປກົງມາ. ພ້ອມທັງສະແດງຄວາມຂອບໃຈຕໍ່ພັກ-ລັດຖະບານລາວ ທີ່ອຳນວຍຄວາມສະດວກ ແລະ ໃຫ້ການສະໜັບສະໜູນຕໍ່ການປະຕິບັດໜ້າທີ່ການທູດຢູ່ ສປປ ລາວ ຈົນສຳເລັດຢ່າງຈົບງາມ.

#ຂ່າວ: ຫ້ອງການກະຊວງ