ວັນທີ 12 ພະຈິກນີ້, ກອງປະຊຸມສຸດຍອດ ອາຊຽນ ຄັ້ງທີ 37 ແມ່ນກອງປະຊຸມສຸດທ້າຍຂອງປີ ອາຊຽນ 2020 ໄດ້ໄຂຂຶ້ນຢ່າງເປັນທາງການ ຢູ່ນະຄອນຫຼວງຮ່າໂນ້ຍ ສສ ຫວຽດນາມ. ເຂົ້າຮ່ວມກອງປະຊຸມດັ່ງກ່າວ, ຝ່າຍ ຫວຽດນາມ ມີທ່ານ ຫງວຽນຝູຈ້ອງ ເລຂາທິການໃຫຍ່ ປະທານປະເທດ, ທ່ານ ຫງວຽນຊວັນຟຸກ ນາຍົກລັດຖະມົນຕີ, ທ່ານ ນາງ ຫງວຽນທິກິມເງິນ ປະທານສະພາແຫ່ງຊາດ, ທ່ານ ຟ້າມບິ່ງມິງ ລັດຖະມົນຕີກະຊວງການຕ່າງປະເທດ.

ສໍາລັບສາກົນ ມີການເຂົ້າຮ່ວມຂອງຜູ້ຕາງໜ້າຄະນະທູຕານຸທູດບັນດາປະເທດ, ບັນດາອົງການຈັດຕັ້ງສາກົນປະຈຳຮ່າໂນ້ຍ. ການນຳຂັ້ນສູງ 10 ປະເທດສະມາຊິກ ອາຊຽນ, ເລຂາທິການໃຫຍ່ ອາຊຽນ ເຂົ້າຮ່ວມຜ່ານທາງອອນລາຍ. ສໍາລັບ ສປປ ລາວ ນໍາໂດຍ ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ.

ໃນພິທີເປີດກອງປະຊຸມ, ທ່ານ ຫງວຽນຝູຈ້ອງ ໄດ້ຕີລາຄາສູງບົດບາດນຳໜ້າ, ແກ່ນສານຂອງ ອາຊຽນ ໃນໄລຍະເກີດໂຣກລະບາດໂຄວິດ-19, ພ້ອມທັງຢືນຢັນວ່າ: ອາຊຽນ ໄດ້ປະສົບຜົນສໍາເລັດໃນວຽກງານຮັກສາບັນດາການເຄື່ອນໄຫວ, ຮັກສາບົດບາດ, ທີ່ຕັ້ງຂອງຕົນເປັນປົກກະຕິ. ບັນດາຄູ່ຮ່ວມມືສືບຕໍ່ຖືເປັນສຳຄັນ ແລະ ສະໜັບສະໜູນບົດບາດເປັນໃຈກາງຂອງ ອາຊຽນ. ທ່ານ ຫງວຽນຝູຈ້ອງ ຊີ້ແຈ້ງວ່າ: ກຳນົດທີ່ຕັ້ງເໝາະສົມໃຫ້ ອາຊຽນ ໃນໂລກ ພາຍຫຼັງພະຍາດໂຄວິດ-19 ດ້ວຍຄວາມປາຖະໜາ ແລະ ເຈດຈຳນົງຢ່າງແຮງ ໃນການຮັກສາພາກພື້ນສັນຕິພາບ, ສະຖຽນລະພາບ, ສາມັກຄີ ແລະ ເປັນເອກະພາບ ບົນພື້ນຖານກົດໝາຍສາກົນ, ໄດ້ສືບຕໍ່ກາຍເປັນຄຸນຄ່າຫຼັກແຫຼ່ງຂອງ ອາຊຽນ ແລະ ປະຊາຄົມອາຊຽນ.

ໃນສະພາບການໃໝ່, ບັນດາປະເທດ ອາຊຽນ ຄວນສະແດງໃຫ້ເຫັນຄຸນທາດ, ຕັ້ງໜ້າສົມທົບກັນ ເພື່ອຫັນບັນດາຂໍ້ລິເລີ່ມ ແລະ ແຜນການຟື້ນຟູໃຫ້ປະກົດຜົນເປັນຈິງ. ໃນວາລະດໍາເນີນກອງປະຊຸມ ໄດ້ຢັ້ງຢືນຈິດໃຈສາມັກຄີ ແລະ ຮັບປະກັນ ອາຊຽນ ຜ່ານຜ່າຄວາມຫຍຸ້ງຍາກຂອງຍຸກສະໄໝ ກໍ່ຄືບັນດາຄຳໝັ້ນສັນຍາຢ່າງແຮງ ຂອງບັນດາປະເທດສະມາຊິກທັງໝົດ ໃນການສ້າງປະຊາຄົມໃຫ້ສຳເລັດ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ປະຊາຊົນ)