ບໍລິສັດ ເບຍລາວ ໄດ້ເຕີບໃຫຍ່ຂະຫຍາຍຕົວຢ່າງເຂັ້ມແຂງ ຄຽງຄູ່ກັບກັນພັດທະນາ ແລະ ປົກປັກຮັກສາປະເທດຊາດ, ບໍລິສັດເບຍລາວ ເປັນບໍລິສັດໜຶ່ງທີ່ສ້າງລາຍຮັບໃຫ້ແກ່ງົບປະມານແຫ່ງຊາດເປັນອັນດັບໜຶ່ງ, ປີໜຶ່ງລັດມີລາຍຮັບໂດຍກົງຈາກບໍລິສັດເຖິງ 2.000 ຕື້ກວ່າກີບ, ໄດ້ຈາກທາງອ້ອມໂດຍ ການມອບເປັນພັນທະຈາກຕົວແທນຈໍາໜ່າຍຮ້ານຄ້າ, ຮ້ານບໍລິການ ໃນທົ່ວປະເທດ ເປັນຫລາຍຮ້ອຍຕື້ກີບ ແລະ ເປັນບໍລິສັດນໍາໜ້າໃນການນໍາໃຊ້ເທັກໂນໂລຊີທີ່ທັນຍຸກທັນສະໄໝມາຕະຫລອດ, ເປັນແບບຢ່າງໃນການຜັນຂະຫຍາຍແນວທາງນະໂຍບາຍການປ່ຽນແປງໃໝ່ທາງດ້ານເສດຖະກິດຂອງພັກ ແລະ ລັດຖະບານ, ມີການຮ່ວມມືກັບ ບໍລິສັດຊັ້ນນໍາຂອງໂລກ ຄື ບໍລິສັດຄາສເບີກ ຈາກປະເທດເດັນມາກ, (ຢູໂຣບ) ທີ່ມີປະສົບການມາ 170 ກວ່າປີ, ເຊິ່ງເຂົາເຈົ້າມີການຮ່ວມມື ແລະ ລົງທຶນຢູ່ຫລາຍກວ່າ 150 ປະເທດໃນທົ່ວໂລກ.

ເນື່ອງໃນໂອກາດ ກຽມສະເຫລີມສະຫລອງ ວັນຊາດ ທີ 2 ທັນວາ ຄົບຮອບ 45 ປີ ທ່ານ ສູນທອນ ພົມມະຈັກ ປະທານບໍລິສັດເບຍລາວ ຈຳກັດ ໄດ້ໃຫ້ສຳພາດຕໍ່ສື່ມວນ ໃນວັນທີ 12 ພະຈິກ 2020, ທີ່ນະຄອນຫລວງວຽງຈັນ ນີ້ວ່າ: ບໍລິສັດ ເບຍລາວ ຈໍາກັດ ສ້າງຂຶ້ນເມື່ອປີ 1973 ເພື່ອຜະລິດ ແລະ ຈໍາໜ່າຍເບຍ, ນ້ຳກ້ອນ, ນ້ຳອັດລົມ, ມີກໍາລັງການຜະລິດທັງໝົດພຽງ 3 ລ້ານລິດຕໍ່ປີ ແລະ ປີ 1974 ສາມາດຜະລິດ ແລະ ຈໍາໜ່າຍໄດ້ພຽງແຕ່ 1,6 ລ້ານລິດເທົ່ານັ້ນ, ມາຮອດປັດຈຸບັນ ໃນປີ 2020 ບໍລິສັດ ເບຍລາວ ໄດ້ກາຍເປັນບໍລິສັດໃຫຍ່ລະດັບຊາດ, ມີໂຮງງານຢູ່ 3 ແຫ່ງ ຄືຢູ່ ນະຄອນຫລວງວຽງຈັນ 2 ແຫ່ງ, ແຂວງ ຈໍາປາສັກ 1 ແຫ່ງ ແລະ ກໍາລັງມີແຜນຂະຫຍາຍອີກ 1 ແຫ່ງ ຢູ່ ແຂວງຫລວງພະບາງ. ປັດຈຸບັນ ມີກໍາລັງການຜະລິດລວມ ເຖິງ 950 ລ້ານລິດຕໍ່ປີ ລື່ນປີ 1973 ເຖິງ 300 ກວ່າເທົ່າ. ໃນນັ້ນ, ລວມມີ 3 ຜະລິດຕະພັນຫລັກ ຄື ເບຍ, ນ້ຳອັດລົມ ໃນເຄືອແປັບຊີ ແລະ ນ້ຳດື່ມຫົວເສືອ.

ເບຍລາວ ໄດ້ກວມສ່ວນແບ່ງຕະຫລາດພາຍໃນປະເທດຫລາຍກວ່າ 95% ມາຫລາຍປີ, ນ້ຳອັດລົມໃນເຄືອແປັບຊີ ກວມຕະຫລາດ 80%, ນ້ຳດື່ມຫົວເສືອ ກວມຕະຫລາດ 70%. ເບຍລາວ ໄດ້ກາຍເປັນຍີ່ຫໍ້ຜະລິດຕະພັນຂອງລາວທີ່ໂດດເດັ່ນ ແລະ ເອກອ້າງຂອງຊາດ, ເປັນທີ່ນິຍົມທັງພາຍໃນ ແລະ ຕ່າງປະເທດ, ມີການສົ່ງອອກເຖິງ 20 ກວ່າປະເທດ, ໃນນັ້ນລວມມີ ສະຫະລັດອາເມລິກາ, ຍີ່ປຸ່ນ, ຢູໂຣບ, ຈີນ, ໄທ, ຫວຽດນາມ ແລະ ອື່ນໆ ເປັນຜະລິດຕະພັນຂອງລາວໜຶ່ງດຽວທີ່ສາມາດແຂ່ງຂັນກັບ ຜະລິດຕະພັນຂອງຕ່າງປະເທດ ສາມາດທົດແທນການນໍາເຂົ້າໄດ້ເກືອບ 100% ໄດ້ຮັບຫລຽນຄໍາ ໃນການປະກວດເຄື່ອງດື່ມນາໆຊາດ ຈາກຫລາຍສະຖາບັນຂອງໂລກ, ເຊິ່ງໄດ້ກາຍເປັນໃບໜ້າໃບຕາ ແລະ ສ້າງຄວາມພູມໃຈໃຫ້ແກ່ຄົນລາວເຮົາທຸກໆຄົນ, ເປັນຜະລິດຕະພັນຮັບໃຊ້ໃຫ້ແກ່ການທ່ອງທ່ຽວຕ້ອນຮັບແຂກບ້ານແຂກເມືອງໄດ້ເປັນຢ່າງດີ.

ຄຽງຄູ່ກັນນີ້, ບໍລິສັດ ເບຍລາວ ໄດ້ສ້າງວຽກເຮັດງານທໍາໂດຍກົງ ໃຫ້ແກ່ແຮງງານເກືອບ 3.000 ຄົນ ແລະ ແຮງງານປິ່ນອ້ອມ ຈາກການປູກເຂົ້າ, ການບໍລິການ ແລະ ອື່ນໆ ຫລາຍໝື່ນແຮງງານ. ບໍລິສັດ ໄດ້ມີແຜນນະໂຍບາຍໃນການດໍາເນີນທຸລະກິດທັງໃນໄລຍະສັ້ນ, ກາງ ແລະ ໄລຍະຍາວ, ໂດຍໃຫ້ສອດຄ່ອງກັບ ແຜນພັດທະນາ ເສດຖະກິດຂອງລັດ ໃນແຕ່ລະໄລຍະ, ສ້າງໃຫ້ເປັນບໍລິສັດ ທີ່ເຕີບໃຫຍ່ໜັ້ນຄົງ ຢູ່ຄຽງຄູ່ກັບສັງຄົມລາວ ໄປຕະຫລອດການ, ເຊິ່ງມັນສະແດງອອກໃນການປະຕິບັດລະບຽບກົດໝາຍຢ່າງເຂັ້ມງວດ, ປະຕິບັດການມອບພັນທະໂດຍກົງຢ່າງເຄັ່ງຄັດທັນເວລາມີຄວາມໂປ່ງໃສໃນການບໍລິຫານໃນທຸກດ້ານ, ຕິດພັນກັບການນໍາໃຊ້ເທັກໂນໂລຊີ ແລະ ນະວັດຕະກໍາໃໝ່ຂອງໂລກຢ່າງທັນການ, ມີຄວາມຮັບຜິດຊອບສູງຕໍ່ສັງຄົມ ດ້ວຍການໂຄສະນາໃຫ້ມີຄວາມປອດໄພໃນການຂັບຂີ່, ດື່ມແລ້ວບໍ່ຂັບ, ມີງົບປະມານລາຍຈ່າຍຫລາຍຕື້ກີບໃນແຕ່ລະປີ ເພື່ອອຸປະຖໍາສົ່ງເສີມໃນການຮັກສາຮີດຄອງປະເພນີອັນດີງາມຂອງຊາດ, ຊຸກຍູ້ອຸປະຖໍາໃນການຮັກສາສະພາບແວດລ້ອມ, ການຮັກສາສຸຂະພາບຂອງປະຊາຊົນ, ວຽກງານກິລາ, ສາທາລະນະສຸກ ສົ່ງເສີມວຽກງານການສຶກສາໃຫ້ຄວາມສໍາຄັນ ແລະ ສົ່ງເສີມໃຫ້ຄົນລາວເປັນຄົນທີ່ມີຄວາມຮູ້, ຄວາມສາມາດ, ມີທຶນໃຫ້ນັກສຶກສາ ທີ່ຮຽນດີມີຄຸນສົມບັດ ແຕ່ດ້ອຍໂອກາດ ຢູ່ບັນດາມະຫາວິທະຍາໄລຕ່າງໆ, ເປັນບໍລິສັດທີ່ມີສ່ວນຮ່ວມ ແລະ ໃຫ້ການອຸປະຖໍາໃນການສ້າງສິ່ງສາທາລະນະປະໂຫຍດຕ່າງໆຂອງສັງຄົມ, ຊ່ວຍປະຊາຊົນບັນດາເຜົ່າໃນຍາມມີໄພພິບັດຕ່າງໆ.

ທ່ານ ສູນທອນ ພົມມະຈັກ ໄດ້ໃຫ້ຮູ້ຕື່ມວ່າ: ບໍລິສັດ ເບຍລາວ ໄດ້ດໍາເນີນທຸລະກິດ ທີ່ສອດຄ່ອງກັບແນວທາງນະໂຍບາຍຂອງພັກ, ລະບຽບກົດໝາຍ ແລະ ກົນໄກການປັບປຸງປ່ຽນແປງຂອງ ພັກ-ລັດ ເຮົາໃນແຕ່ລະໄລຍະ ຈຶ່ງເຮັດໃຫ້ບໍລິສັດມີການເຕີບໃຫຍ່ຂະຫຍາຍຕົວຄືແນວນັ້ນ, ບໍລິສັດໄດ້ເອົາໃຈໃສ່ຕໍ່ບຸກຄະລາກອນຂອງບໍລິສັດເປັນຢ່າງດີມີການກໍ່ສ້າງຍົກສູງຄວາມຮູ້ຄວາມສາມາດໃຫ້ພະນັກງານຢ່າງບໍ່ຢຸດຢັ້ງ, ການປະຕິບັດນະໂຍບາຍສະຫວັດດີການ, ມີການປະສານສົມທົບ 3 ຜົນປະໂຫຍດຢ່າງລົງໂຕ ແລະ ມີພະນັກງານສືບທອດໃນແຕ່ລະລຸ້ນ, ເອົາໃຈໃສ່ສູງສຸດຕໍ່ບັນຫາສຸຂະພາບ ແລະ ຄວາມປອດໄພຂອງພະນັກງານ, ກໍາມະກອນ, ທັງເຮັດໃຫ້ເຂົາເຈົ້າກໍາ ໄດ້ແນວທາງນະໂຍບາຍ ແຕ່ລະໄລຍະຂອງພັກ-ລັດ, ບໍລິສັດ ໄດ້ມີການນໍາພາຂອງພັກ, ຂອງອົງການຈັດຕັ້ງມະຫາຊົນຢ່າງເຂັ້ມແຂງຈາກສະມາຊິກພັກ, ເມື່ອກ່ອນມີພຽງ 3 ສະຫາຍ ປັດຈຸບັນມີ 103 ສະຫາຍ, ເປັນຄະນະພັກຮາກຖານ ທີ່ມີ 5 ໜ່ວຍພັກ ແລະ ຂຶ້ນກັບການຊີ້ນໍາຂອງອົງຄະນະພັກກະຊວງອຸດສະຫະກໍາ ແລະ ການຄ້າ, ມີມູນເຊື້ອເປັນໜ່ວຍພັກແຂງຮູ້ນໍາພາຮອບດ້ານໃນເມື່ອກ່ອນ ແລະ ເປັນໜ່ວຍພັກປອດໃສ, ເຂັ້ມແຂງ.

Medialaos MMD (ແຫຼ່ງຂໍ້ມູນຈາກ: ສຳນັກຂ່າວສານປະເທດລາວ)