ວັນທີ 11 ພະຈິກ 2020 ຜ່ານມານີ້ ແຂວງອັດຕະປື ໄດ້ຈັດພິທີມອບ-ຮັບເຮືອນພັກຖາວອນໃຫ້ປະຊາຊົນທີ່ປະສົບໄພພິບັດ ຢູ່ເມືອງສະໜາມໄຊ ແຂວງອັດຕະປື ພາຍຫຼັງທີ່ສໍາເລັດການກໍ່ສ້າງໃນເບື້ອງຕົ້ນຈໍານວນ 66 ຫຼັງທີ່ສູນພັກຊົ່ວຄາວບ້ານດົງບາກໃໝ່ຫີນຄໍາ ແລະ ສູນພັກຊົ່ວຄາວດອນບົກ.

ພິທີໄດ້ຈັດຂຶ້ນຢ່າງເປັນທາງການທີ່ສູນພັກຊົ່ວຄາວບ້ານດົງບາກໃໝ່ຫີນຄໍາ, ໃຫ້ກຽດເຂົ້າຮ່ວມຂອງທ່ານນາງ ມີນາພອນ ໄຊສົມພູ ຮອງເລຂາພັກ ຫົວໜ້າຄະນະຈັດຕັ້ງ ແຂວງອັດຕະປື, ມີການນໍາຂອງແຂວງ, ເມືອງ ພ້ອມດ້ວຍອໍານາດການປົກຄອງບ້ານ ແລະ ປະຊາຊົນ ເຂົ້າຮ່ວມ.

ສໍາລັບໂຄງການກໍ່ສ້າງເຮືອນພັກຖາວອນຂອງປະຊາຊົນທີ່ຖືກຜົນກະທົບນ້ຳຖ້ວມຈາກສັນເຂື່ອນໄຟຟ້າເຊປຽນ-ເຊນໍ້ານ້ອຍແຕກໃນທ້າຍປີ 2018 ຜ່ານມາ, ທີ່ສໍາເລັດການກໍ່ສ້າງໃນເບື້ອງຕົ້ນຈຳນວນ 66 ຫຼັງ ຄັ້ງນີ້ມີຢູ່ເຂດດົງບາກຈໍານວນ 46 ຫຼັງ ແລະ ເຂດດອນບົກມີຈໍານວນ 20 ຫຼັງມີມູນຄ່າທັງໝົດ 9,​4​ ຕື້ກີບ​ ໂດຍແມ່ນທຶນ ຊ່ວຍເຫຼືອລ້າຂອງລັດຖະບານ ແລະ ປະຊາຊົນປະເທດຍີ່ປຸ່ນ. ເຮືອນພັກຖາວອນທັງ 66 ຫລັງດັ່ງກ່າວ ໂຄງສ້າງເຮັດດ້ວຍເບຕົງເສີມເຫຼັກ,ຝາເຮືອນກໍ່-ໂບກ ແລະ ມຸງດ້ວຍກະເບື້ອງ .

ໃນພິທີດັ່ງກ່າວ ທ່ານ ທາເກະ ວາກະເຄໂຊ ເອກອັກຄະລະສະທູດຍີ່ປຸ່ນປະຈຳລາວ ໄດ້ກ່າວມອບເຮືອນຈໍານວນ 66 ຫຼັງດັ່ງກ່າວ ໃຫ້ອຳນາດການປົກຄອງບ້ານ ກໍ່ຄືປະຊາຊົນ ເພື່ອນໍາໃຊ້ໃນຂັ້ນຕໍ່ໄປ ແລະ ໃນໂອກາດດັ່ງກ່າວ ທ່ານນາງ ມີນາພອນ ໄຊສົມພູ ຮອງເລຂາພັກ ແຂວງອັດຕະປື ໄດ້ຕາງໜ້າອໍານາດການປົກຄອງແຂວງ ກ່າວສະແດງຄວາມຂອບໃຈມາຍັງລັດຖະບານຍີ່ປຸ່ນ ແລະ ປະຊາຊົນປະເທດຍີ່ປຸ່ນ ລວມທັງໂຄງການຍູເອັນ ຮາບີຕັດ ປະຈໍາລາວ ທີ່ໄດ້ໃຫ້ການສະໜັບສະໜູນຊ່ວຍເຫຼືອທາງດ້ານທືນຮອນສ້າງເຮືອນຢູ່ອາໄສໃຫ້ປະຊາຊົນ ທີ່ປະສົກໄພພິບັດ ຢູ່ເມືອງສະໜາມໄຊ ຈົນສຳເລັດ. ພ້ອມທັງຕາງໜ້າໃຫ້ປະຊາຊົນ ສັນຍາວ່າຈະສືບຕໍ່ປົກປັກຮັກສາ ແລະ ນໍາໃຊ້ເຮືອນທີ່ປຸກສ້າງສໍາເລັດໃນຄັ້ງນີ້ໃຫ້ເກີດປະໂຫຍດສູງສຸດ.

Medialaos MMD (ແຫຼ່ງຂໍ້ມູນຈາກ: ໜັງສືພິມ ເສດຖະກິດ-ການຄ້າ)