ໃນຕອນເຊົ້າຂອງວັນທີ 18 ພະຈິກ 2020 ທີ່ ກະຊວງແຜນການ ແລະ ການລົງທຶນ, ທ່ານ ປອ ສອນໄຊ ສີພັນດອນ, ຮອງນາຍົກລັດຖະມົນຕີ ແຫ່ງ ສປປ ລາວ, ລັດຖະມົນຕີ ກະຊວງແຜນການ ແລະ ການລົງທຶນ ໄດ້ຕ້ອນຮັບການຢ້ຽມຂໍ່ານັບ ທ່ານ ນາງປີອາ ບະຣິດໂຕ (Pia Britto) ຜູ້ຕາງໜ້າຂອງອົງການ UNICEF ຄົນໃໝ່ ປະຈຳ ສປປ ລາວ.

ໃນໂອກາດນີ້, ທ່ານ ປອ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບອັນອົບອຸ່ນມາຍັງທ່ານ ທ່ານ ນາງປີອາ ບະຣິດໂຕ, ຜູ້ຕາງໜ້າຂອງອົງການ UNICEF ຄົນໃໝ່ ປະຈຳ ສປປ ລາວ, ພ້ອມທັງສະແດງຄວາມຂອບໃຈຕໍ່ການຮ່ວມມື ແລະ ການຊ່ວຍເຫຼືອຂອງອົງການ UNICEF ຕໍ່ ສປປ ລາວ ໃນໄລຍະຜ່ານມາ ໂດຍສະເພາະແມ່ນການຈັດຕັ້ງປະຕິບັດບັນດາໂຄງການ ແລະ ກິດຈະກຳຕ່າງໆ ພາຍໃຕ້ແຜນງານຂອງອົງການ UNICEF ທີ່ສອດຄ່ອງກັບແນວທາງນະໂຍບາຍຂອງພັກ ແລະ ລັດຖະບານ ເປັນຕົ້ນແມ່ນບັນດາໜ້າວຽກບູລິມະສິດ ຕິດພັນກັບການສົ່ງເສີມ ແລະ ປົກປ້ອງເດັກນ້ອຍ ກໍຄື ການຮັບປະກັນໃຫ້ເດັກນ້ອຍລາວທຸກຄົນໄດ້ຮັບການພັດທະນາ ແລະ ມີອະນາຄົດທີ່ດີ. ທ່ານຍັງໄດ້ກ່າວເຖິງ ວຽກງານທີ່ສຳຄັນ ຂອງການຮ່ວມມື ໃນອະນາຄົດ ເຊ່ນ ວຽກງານ ຮັກສາສຸຂະພາບ, ໂພສະນາການ, ສັກຢາກັນພະຍາດ, ສຸຂະອະນາໄມ, ການສຶກສາຂອງເດັກ ກ່ອນໄວຮຽນ, ການປົກປ້ອງເດັກ ແລະ ການປ້ອງກັນ ແລະ ຄວບຄູມ ພະຍາດ ໂຄວິດ 19.

ສຳລັບທິດທາງການຮ່ວມມືໃນຕໍ່ໜ້າ, ທັງສອງຝ່າຍຈະໄດ້ສືບຕໍ່ສຸມໃສ່ການຈັດ​ຕັ້ງ​ປະຕິບັດ​ແຜນການ​ຮ່ວມ​ມື​ລະຫວ່າງ​ ອົງການ​ UNICEF ​ແລະ ລັດຖະບານ ສປປ ລາວ ສົກ​ປີ 2017 – 2021 ​ຊຶ່ງກວມ​ເອົາ 5 ຂົງ​ເຂດ​ເປົ້າ​ ໝາຍ​ຄື: ວຽກ​ງານ​ສາທາລະນະ​ສຸກ ​ແລະ ​ໂພຊະ​ນາ​ການ; ນ້ຳ​ສະອາດ ​ແລະ ວຽກ​ງານ​ສຸຂະ​ອະນາ​ໄມ ​ແລະ ການ​ປ່ຽນ​ແປງ​ຂອງດິນຟ້າອາກາດ;​ ການສຶກສາ; ການປົກປ້ອງເດັກ; ແລະ ວຽກງານອື່ນໆທີ່ປິ່ນອ້ອມ ໂດຍຖືສຳຄັນການມີສ່ວນຮ່ວມຂອງທຸກພາກສ່ວນໃນສັງຄົມ ແລະ ການພັດທະນາ ຄົນລາວ ລຸ້ນ ປີ 2030 Lao Generation 2030. ແຜນການຮ່ວມມືດັ່ງກ່າວແມ່ນມີຄວາມສຳຄັນຍິງ ໃນ​ການ​ປະກອບສ່ວນ​ຊ່ວຍ​ສະໜັບ​ສະ​ໜູນ​ການ​ປະຕິບັດ​ແຜນ​ພັດທະນາ​ເສດຖະກິດ-ສັງຄົມແຫ່ງຊາດ 5 ປິ ຄັ້ງທີ 8, ເວົ້າລວມ ກໍ່ແມ່ນການປະກອບສ່ວນເຂົ້າໃນການຈັດຕັ້ງຜັນຂະຫຍາຍເປົ້າໝາຍການພັດທະນາແບບຍືນຍົງ (SDGs) ແຕ່ນີ້ຮອດປີ 2030.

​ໃນໂອກາດດຽວກັນນີ້, ທ່ານ ທ່ານ ນາງປີອາ ບະຣິດໂຕ ໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ຂອງທ່ານ ປອ ສອນໄຊ ສີພັນດອນ ແລະ ຢືນຢັນວ່າ ອົງການ​ UNICEF ຈະສືບຕໍ່ໃຫ້ການຮ່ວມມືຢ່າງເຕັມສ່ວນ ກັບ ລັດຖະບານ ສປປ ລາວ ໃນການຈັດຕັ້ງປະຕິບັດແຜນການຮ່ວມມື ລະຫວ່າງ ອົງການ ແລະ ລັດຖະບານລາວ ໃຫ້ໄດ້ຮັບໝາກຜົນສູງສຸດ.